14 - Nöwetlik türk dunyasi sha'irlar uchrishishigha Uyghurlarmu qatnashmaqta

Ixtiyariy muxbirimiz erkin tarim
2016-04-23
Share
turk-shairlar-uchrishishi-uyghurlar.jpg Türk dunyasi sha'irlar uchrishishigha mersin shehirining bashliqi qojamaz ependi qatnashti
RFA/Erkin Tarim

Türkiyening jenubigha jaylashqan mersin sheherlik hökümet uyushturghan 14 - nöwetlik türk dunyasi sha'irlar uchrishishigha Uyghurlarmu qatnashti. 20 - Aprél küni mersin wilayitining tarsus shehiride bashlan'ghan pa'aliyet 4 kün dawamlishidighan bolup, pa'aliyetke ottura asiya türkiy jumhuriyetliri, ezerbeyjan, wén'giriye, makédoniye qatarliq 10 etrapida dölet we rayondin kelgen sha'irlar qatnashmaqta. Uyghurlargha wakaliten sha'ire nur'ela göktürk xanim qatnashmaqta.

Biz bu uchrishish toghrisida pikir - qarashlirini élish üchün yighin'gha qatnashqan bu uchrishishni uyushturghan qudret bilal, Uyghur sha'ire nur'ela köktürk xanim we sherqiy türkistan wexpining sabiq mudiri hamut göktürk ependiler bilen söhbet élip barduq.

Mezkur sha'irlar uchrishishini uyushturghan mersin sheherlik hökümetning mes'ulliridin qudret bilal ependi bilen téléfon söhbiti élip barduq. U, 14 - qétimliqi ötküzülgen bu uchrishish heqqide melumat bérip mundaq dédi: "14 Yildin béri her dölettin ikki sha'ir teklip qiliwatimiz. Bu qétim 24 kishi boldi. Bu qétim chuwashistandin, iraqtin, qirghizistandin, altaydin, ezerbeyjandin, süriyedin, wén'giriyedin, sherqiy türkistandin kelgen sha'irlar qatnishiwatidu."

Nur'ela göktürk xanim 1998 - yilidin tartip izchil halda bu xil sha'irlar uchrishishigha qatnishiwatqanliqini, bezi yillarda ikki uchrishishqa qatnashqanliqini bayan qildi.

Nur'ela köktürk xanim, bu xil uchrishishlarda shé'ir déklamatsiye qilipla qalmastin, Uyghurlar tartiwatqan derd - elemlerni we Uyghurlarni tonutuwatqanliqini, buning ehmiyitining zor ikenlikini tekitlidi.

Türk dunyasi sha'irlar uchrishishigha qatnishiwatqan hamut göktürk ependi bu qétimqi pa'aliyetning nahayiti yaxshi ötüwatqanliqini, buning herqaysi türkiy xelqlerning ittipaqliqini kücheytish üchün zor ehmiyetke ige ikenlikini tekitlidi.

Hamut göktürk ependi sha'irlargha Uyghur mesilisini tonutushning ehmiyitining zor ikenlikini bayan qildi.

Sha'ire nur'ela göktürk xanim 1957 - yili küzde qeshqer wilayitining yeken nahiyiside dunyagha kelgen bolup, eyni waqitta uning dadisi türmide idi. Dadisi séyit abdulweli ependigil bilen anisi fatma xanimning 3 qiz 4 oghul jem'iy 7 perzenti bar bolup, balilarning altinchisi bolghan nur'ela göktürk xanim 1965 - yili a'ilisi bilen birlikte öz yurtidin ayrilghan. Ular 3 ayliq seperdin kéyin afghanistanning kabul shehirige yétip kelgen bolup, 1965 - yili türkiye jumhuriyiti teripidin köchmen dep qobul qilin'ghan. Nur'ela xanim we a'ilisi 106 kishidin terkib tapqan Uyghur musapirliri bilen birlikte türkiyening qeyseri shehirige orunlashturulghan.

Nur'ela göktürk xanim téxi bala waqtidila shé'irgha ishtiyaq baghlighan bolup, shé'ir oqushqa we shé'ir yézishqa intayin hewes qilatti. Mana bu ishtiyaqi netijiside, umu sha'irliqta barghanséri piship yétildi we türkiyediki shé'ir heweskarlirining alqishigha sazawer, tonulghan bir sha'ire bolup yétiship chiqti. Nur'ela göktürk xanimning hazirghiche türkiyede köp sanda shé'irliri we shé'irlar toplimi neshr qilin'ghan bolup, uning shé'irliri kitabxanlarning söyüp oqushigha muyesser bolmaqta. U shé'ir yézishtin bashqa yene, Uyghurlarning milliy yémek - ichmek medeniyiti tonushturulghan "Uyghur ta'amliri" namliq chong hejimlik resimlik kitabinimu neshr qildurghan bolup, uning bu kitabi türkiyede Uyghurlarning ta'am medeniyitige a'it matériyal yoq bolushtek bir boshluqni toldurghan idi. Uyghur ta'amliri namliq bu kitab kitabxanlarning, bolupmu Uyghurlar üstide izdinish élip bériwatqan tetqiqatchilar we oqughuchilarning qizghin alqishigha sazawer boldi. U hazirghiche 40 etrapida mukapatqa érishken bolup, köp qétim sha'irlar uchrishishlirigha qatniship Uyghurlarning yürek sadasi bolmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet