Istanbulning zeytinburnuda “Sherqiy türkistan yermenkisi” échildi

2013 - Yili 5 - ayning 24 - küni sherqiy türkistan ma'arip we hemkarliq jem'iyiti zeytinburnu shöbisining uyushturushi bilen zeytinburnuda yashaydighan Uyghurlar sherqiy türkistan yermenkisi nami astida zeytinburnining eng awat orni bolghan poyiz istanisi yénidiki meydanda soda yermenkisi achti.

Her yili bir qétim istanbulda sherqiy türkistan soda - tijaret ijtima'i pa'aliyiti ötküzülüp kéliwatqan bolup, bu yil 4 - qétimliq soda yermenkisi ötken hepte sefaköy shöbisining oyushturushi bilen istanbulning sefaköy rayonida échilghan idi.

Bu qétim zeytinburnuda échilghan bu yermenkide her xil kiyim - kéchekler sétishqa sonulghandin sirt, yene Uyghurlarning milliy ta'amliri qoyulghan.

Bu yermenke asasliqi, Uyghurlarning milliy medeniyet we tamaqlirini tonushturush, yene bir tereptin iqtisadi kirim qilip Uyghur ana til yeslining iqtisadiy qiyinchiliqini hel qilish we meniwiy jehettin Uyghurlarning öz - ara uchriship söhbetlishish arqiliq dostluq we qérindashliqni kücheytishni meqset qilin'ghan.

Bu yermenkide bir qisim xeyir - saxawetchi tijaretchiler i'ane qilghan her xil tawar - mallar sétishqa qoyulghan we zeytinburnida yashaydighan Uyghur ayallar hemkarliship öyliride Uyghurche ta'amlarni pishurup ekilip yermenkige qoydi.

Yermenke échilghan chong meydan'gha chidir tikilgen bolup, chédirning etrapigha “Sherqiy türkistan yermenkisige xosh keldingiz” dégen chong xet yézilghan wiwiska taxtilar we türk bayriqi bilen ay yultuzluq kök bayraq ésilghan.

Igilinishche, bu yermenke bir hepte dawam qilidiken.

Biz bu yermenke toghrisida yermenkini uyushturghan sherqiy türkistan ma'arip we hemkarliq jem'iyiti ijtima'i ishlar mes'uli abdulkerim kucha we ayallar bölümi mu'awin bashliqi melikezat qatarliqlar bilen söhbet élip barduq.