Uyghurlar shiwétsiyede échilghan musulmanlar yighinida körgezme achti

Shiwétsiyede échilghan musulmanlar yighini sehnisidin körünüsh. 2015-Yili 24-dékabir, sitokholm.

Shimaliy yawropa islam birlikining her yili dékabir éyida ötküzülüwatqan xelq'araliq islam qurultiyining 35-nöwetlik yighini 24-dékabir küni sitokholmning osa toluq ottura mektipining yighin zalida shu yer waqti 15:00de resmiy bashlandi.

Shimaliy yawropa islam birlikining 24-dékabirdin 26-dékabirghiche ötküzülidighan 35-nöwetlik yighinigha, shiwétsiyede pa'aliyet qiliwatqan Uyghur ma'arip uyushmisi teklip bilen qatnashti.

Bu qétimliq islam birlikining yighini yildikidin kölimi kichiklitilgen bolsimu, en'gliye qatarliq döletlerdin tonulghan islam alimliri teklip qilin'ghan bolup, oxshimighan témilarda léksiye we munaziriler ötküzülmekte.

Bu qétimqi yighin “Islam dindiki tinchliq we rehim shepqet” dégen témida élip bérilmaqchi.

Yighin körgezme zalidin Uyghurlarghimu orun bérilgen bolup, Uyghur ma'arip uyushmisi yighin qatnashquchilirigha teshwiq qilish üchün, bu orun'gha dunya Uyghur qurultiyining re'isi rabiye qadir xanim tonushturulghan “Ejdiha bilen élishqan ayal” namliq kitabning shiwétchisi, Uyghurlarning hazirqi weziyiti tonushturulghan teshwiqat wariqi, “Uyghurche-shiwétche lughet”, 24 yildin buyan türmide yétiwatqan diniy ziyaliy abdulkerim abduwelining matériyali qatarliqlarni teyyarlidi.

Bu qétimliq yighin ehwalidin tepsiliy xewer élish üchün, Uyghur ma'arip uyushmisining bash katipi abdulla ehetni ziyaret qilduq.

Shiwétsiyede yashawatqan diniy ziyaliy qurbanjan özining bu yighinigha uzundin buyan qatniship kéliwatqanliqi hemde bu yighindiki mezmunlarning musulmanlarning yawropada bir kishilik rolini jari qildurup yashashta we bu yighini arqiliq sherqiy türkistanning ehwallirini bashqa musulmanlargha anglitishta muhim ehmiyetke ige ikenlikini bayan qildi.