Qazaqistanning ikki neper Uyghur yigiti gimnastika boyiche dunya musabiqiside kümüsh médalgha érishti

Ixtiyariy muxbirimiz oyghan
2018-06-06
Share
Nariman-qurbanof-Koper-shehiri-2018-yil.jpg Nariman qurbanof(soldin birinchi) slowéniyening kopér shehiride ötküzülgen gimnastika boyiche dunya musabiqiside "At üstidiki heriket" boyiche ikkinchilikke érishken. 2018-Yili 3-iyun.
RFA/Oyghan

Yéqinda qazaqistanning eng ammiwi axbarat wasitilirining biri "Qazaq axbarat byurosi" agéntliqi ikki neper qazaqistanliq tenheriketchining gimnastika boyiche dunya musabiqiside ikkinchi orun'gha, yeni kümüsh médalgha érishkenliki toghriliq xewer tarqatqan idi. Biz bu tenheriketchilerning Uyghur yigitliri ikenlikini bilip, ular bilen alaqileshtuq.

Shularning biri almuta shehiride yashawatqan 20 yashliq nariman qurbanof. Nariman qurbanof 29-may we 3-iyun ariliqida slowéniyening kopér shehiride bolup ötken gimnastika boyiche dunya musabiqiside "At üstidiki heriket" boyiche orunlighan meshiqliri bilen ikkinchi orun'gha ériship, kümüsh médal bilen teqdirlen'gen. Birinchi orunni yaponiyelik koxéyu kaméyamé, üchinchi orunni slowéniyelik sasho bértonchélju igiligen.

Nariman qurbanof radiyomiz ziyaritini qobul qilip, özining bu qétimqi sepiri heqqide mundaq dédi: "Musabiqe aldida men aghrip qélip, özümning tenheriketchilik sheklimni pütünley yoqitip qoyghan idim. Peqet bir nechche künning ichide, yeni musabiqige qatnishish üchün uchushning aldidila özümge kélishke bashlidim. Ötkenki musabiqige qarighanda bu qétimda manga qiyinraq meshiqini orundishim kérek boldi. Musabiqide men yiqilip chüshtüm. Bu méni téximu éghir ehwalgha chüshürüp qoydi, chünki men birinchilik üchün küresh qilishim lazim idi. Bu qétimda orundighan meshiqim dunyadiki eng qiyin meshiqlerning biri bolsimu, men uning höddisidin chiqalidim. Elwette, altun médalgha ümidim köp idi, lékin salametlikim sewebidin bir xataliq ötküzüp qoyghinim üchün birinchiliktin ayrilip qaldim."

Nariman qurbanofning éytishiche, mezkur musabiqining "At üstidiki heriket" türi boyiche her memliketlerdin 42 tenheriketchi qatnashqan bolup, ularning her qaysisi birinchiliklerni igilesh üchün köp tirishqan iken. U bir heptidin kéyin qazaqistan boyiche musabiqige qatniship, andin hindonéziyede bolidighan asiya musabiqisige teyyarliq qilidighanliqini bildürdi.

Nariman qurbanof mushu yilning ikkinchi éyida awstraliyening mélburn shehiride ötken tenheriketning gimnastika türi boyiche dunya musabiqiside altun médalgha érishken idi. Shu waqitta qazaqistandin bu musabiqige besh tenheriketchi qatnashqan bolup, ularning ichidin nariman qurbanof eng yaxshi körsetküchni namayan qilghan. Nariman qurbanof awstraliye shehiride ötken musabiqide shundaqla "Atta mollaq étish" heriket usuli bilen dunya gimnastika tenherikiti saheside yéngiliq yaritip, uning téxnikisigha gimnastika fédératsiyesi teripidin "Qurbanof" yaki in'glizche "The Kurbanov" dep nam bérilgen idi

Gimnastika boyiche dunya musabiqiside "At üstidiki heriket" boyiche kümüsh médalgha érishken yene bir Uyghur yigiti 19 yashliq hakim musayéf boldi. Mezkur musabiqe xorwatiyening osiyéké shehiride bolup ötti. Uningda birinchilikni teybéy shehirining turghuni kay chin li, üchinchi orunni bélarusiyelik wasiliy mixalitsin igiligen idi. Hakim musayéf ziyaritimizni qobul qilip, özining gimnastika bilen 6 yéshidin tartip shughullan'ghanliqini, köprek kichik anisining yardem bergenlikini bildürüp, mundaq dédi: "Qazaqistan chémpiyoni boldum. Andin 2013-yili türkiyege bérip, u yerde birinchilikke érishtim. Andin shu yili tashkent shehiride bolup ötken asiya oyunlirigha qatniship, bir altun we bir kümüsh médalgha érishtim. Kéyin rusiye, giruziye we bashqimu memliketlerde ötken musabiqilerde mukapatliq orunlargha érishtim. Xorwatiyede ötken musabiqide ikkinchi orunni élishim méni nahayiti xushal qildi. Bu manga kélechekke chong ilham berdi. Elwette, manga bu yerde méning trénérlirim köp yardem berdi. Emdi asiya oyunlirigha qatnishish arzuyum bar."

Hakim musayéf ötken musabiqilerde özining qazaqistan puqrasi süpitide meghrurlan'ghan bolsa, ikkinchidin, özining Uyghur xelqining bir perzenti bolush süpiti bilen intayin xushal bolghanliqini otturigha qoydi.

"Kéntawr" qabiliyetlik tenheriketchilerge yardem qilish jem'iyetlik fondining prézidénti, qazaqistanning xizmet körsetken meshiqlendürgüchisi, asiya gimnastika birleshmisi kéngishining ezasi maxmud iskenderof shagirtliri nariman qurbanof we hakim musayéfning qolgha keltürgen bu qétimliq netijiliridin nahayiti xushal bolghanliqini, ularning pütkül qazaqistan memlikitining shenini qoghdighanliqini bildürüp, mundaq dédi: "Tarixtin alsaq, qazaqistan tenherikitining eng chong bolmighan tarixidin shuni biliwélishqa boliduki, bashqimu milletler qatarida Uyghur millitidinmu ataqliq tenheriketchilerni chiqqanliqini yaxshi bilimiz. Mesilen, hemmisi sowét ittipaqining boks boyiche ikki qétimliq chémpiyoni, yawropaning kümüsh médalining sahibi, her xil xelq'ara musabiqilerning ghalibi abduréshit abduraxmanofni yaxshi bilidu? bizde Uyghurlardin boks boyiche tejribilik trénérlar rehimjan sadiqof, xemit berayéf, jélil jalalof Uyghurlargha yaxshi tonush. Ularning ismi qazaqistan da'irisidimu meshhur. Emdi hémit toxtaxunof, zakir toxtiyéf, ghopur toxtiyéf, dolqun kamékof qatarliq boks, kik-boksing, karaté oxshash sherqning chélishish usulliri boyiche atiqi dunyagha meshhur bolghan tenheriketchilermu köplep sanilidu."

Maxmud iskenderof qazaqistan Uyghurliridin chiqqan erkin chélishish boyiche tughluq buxarbaqiyéfning, shayba boyiche xokkéydin dunya chémpiyoni atalghan zarina toxtiyéwaning, shahmat boyiche dunya chémpiyoni xélil hemrayéfning we bashqilarning qazaqistanning xelq'aradiki atiqini chiqirishqa köp küch chiqarghanliqini otturigha qoydi. U shuning bilen bille ularning köpligen shagirtlarni teyyarlap, ularningmu utuqlargha érishiwatqanliqini bildürdi.

Igilishimizche, hazir 500 ming etrapida Uyghur yashaydighan qazaqistandiki köpligen mekteplerde, tenheriket kulublirida tenheriketning her xil türliri boyiche terbiyilinip chiqiwatqan hem qazaqistan, asiya, dunya musabiqilirige qatnishiwatqan Uyghur qiz-yigitliri köplep sanilidiken. Ularning bir qismi hökümet teripidin ghemxorluqqa élinsa, bezi qismi Uyghur hamiyliri teripidin xirajet bilen teminlenmektiken. Eng yuqiri ataqqa érishken tenheriketchiler qazaqistanning qazaq, rus, Uyghur tilliq metbu'atlirida keng türde tonushturulup turmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet