Türk dunyasi höjjetlik filim musabiqisi resmiy bashlandi

Ixtiyariy muxbirimiz erkin tarim
2016.02.24
Share on WhatsApp
Share on WhatsApp
Turk-dunyasi-hojjetlik-filim-musabiqisi.jpg Türk dunyasi höjjetlik filim musabiqisi teshwiqati.
tdgf1.com

Merkiziy ishxanisi enqerede turushluq türk dunyasi zhurnalistlar fédératsiyesi tunji qétim türk dunyasi höjjetlik filim féstiwali ötküzmekchi. Melum bolushiche, mezkur féstiwal herqandaq ademge ochuq bolup, Uyghurlarmu eser qatnashtursa bolidiken.

Türkiye, ezerbeyjan, türkmenistan, özbékistan, qazaqistan, qirghizistan we shimaliy siprus türk jumhuriyitidin sirt, dunyaning herqaysi jayliridiki türkiy milletler yashawatqan rayonlardiki qérindash milletlerdin kishiler ishtirak qilidighan höjjetlik filim musabiqisi resmiy bashlandi.

18-Féwral resmiy bashlinip 23-awghust axirlishidighan “Türk kültüri we türk dunyasigha nezer” témidiki musabiqini uyushturghan mezkur jem'iyetning re'isi menderes demir ependi ziyaritimizni qobul qilip, bundaq bir musabiqini ötküzüshtiki meqsetning türkiy milletlerning ötmüshidiki oxshashliqlarni otturigha qoyush arqiliq türk medeniyitige we türk dunyasigha xizmet qilishtin ibaret ikenlikini tekitlidi.

Türk dunyasi zhurnalistlar birliki re'isi menderes demir ependi musabiqining waqti toghrisida melumat bérip mundaq dédi: “Höjjetlik filim musabiqisige iltimas qilish waqti 2-ayning 18-künidin 2016-yili 8-ayning 23-künigiche dawamlishidu. Musabiqide mukapatqa érishkenler 2016-yili 9-ayning 9-küni élan qilinidu. Bu yil 9-ayning 23-küni türkiye istanbulda mukapat tarqitish murasimi ötküzülidu.”

U, mezkur musabiqe tunji musabiqe ikenlikini, türkiyediki nurghun idare, jem'iyet we ammiwi teshkilatlirining qollishigha érishkenlikini tekitlep mundaq dédi: “Türk dunyasi höjjetlik filim musabiqisini istanbuldiki türk dunyasi sheherlik hökümetler birlikining yardimi bilen ötküzimiz. Mezkur pa'aliyetke dunya zhurnalistlar fédératsiyesi, türkiye bash ministirliqi tarmiqidiki muhajirettiki türkler we qérindash milletler idarisi, nighde uniwérsitéti, shimaliy siprus yéqin sherq uniwérsitéti, türkiye radi'o, téléwiziye idarisi, türkiye medeniyet ministirliqi, anatoliye xewer agéntliqi, ezerbeyjan döliti, qazaqistan medeniyet wexpi, iraq türkmen zhurnalistlar jem'iyiti, makidoniye türk zhurnalistlar birliki qatarliq organlar iqtisadiy jehettin yardem qilmaqchi. Bu musabiqige türkiy jumhuriyetler we türkiy milletler aptonom rayonliri, ammiwi teshkilatliri alahide ehmiyet bermekte.”

Menderes demir ependi türk dunyasi höjjetlik filim musabiqiside derijige kirgen filimlarning 2016-yili 10-ayning 17-18-künliri türkiyening nighde shehiride, 10-ayning 7-8-künliri ezerbeyjanning baku, she'ik we genje sheherliride, 10-ayning 28-29-künliri qazaqistanning almuta shehiride körsitilidighanliqini bayan qildi.

Türk dunyasi höjjetlik filim musabiqisige 2010-yilidin 2016-yilighiche bolghan ariliqta ishlen'gen türkiy milletlerning medeniyiti tonushturulghan höjjetlik filimlar bilen iltimas qilsa bolidighan bolup, filim türkche we in'gliz tilida ishlen'gen bolushi kérek iken.

Menderes demir ependi musabiqide birinchidin üchinchigiche bahalan'ghanlargha bérilidighan mukapat sommisi toghrisida toxtilip mundaq dédi: “Musabiqide birinchi bolghanlargha 15 ming türk lirasi, ikkinchi bolghanlargha 10 ming türk lirasi, üchinchi bolghanlargha 7 ming türk lirasi mukapat bérimiz.”

Bu musabiqige qatnishish xalaydighanlar www.tdgf1.com Tor adrésidin bu heqte tepsiliy melumat igilise bolidiken.

Ziyaritimizni qobul qilghan, hazir gollandiyede yashawatqan Uyghur rézhissor abdusalam niyaz ependi bu musabiqining Uyghur medeniyitini tonutush üchün zor ehmiyetke ige ikenlikini bayan qildi.

Abdusalam niyaz ependi Uyghur medeniyiti toghrisida ishlen'gen bezi höjjetlik filimlar xitay ichide mukapatqa érishken bolsimu, xelq'ara musabiqide mukapatqa érishken höjjetlik filimlarning yoq bolushi mumkinlikini bayan qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.