Уйғур шаирә нүрәла гөктүрк ханим “түрк мәдәнийитигә хизмәт” мукапатиға еришти

Ихтиярий мухбиримиз әркин тарим
2015-11-24
Share
nurela-gokturk-xanim-mukapat-305.jpg “түрк мәдәнийитигә хизмәт” мукапатиға еришкән уйғур шаирә нүрәла гөктүрк ханим сөз қилмақта. 2015-Йили 22-ноябир, әнқәрә.
RFA/Erkin Tarim

Түркийәдә яшайдиған уйғур шаирә нүрәла гөктүрк ханим “түрк мәдәнийитигә хизмәт” мукапатиға еришти. 22-Ноябир күни әнқәрәдики юнус әмрә мәдәнийәт мәркизидә өткүзүлгән мукапат тарқитиш мурасимиға әзәрбәйҗанлиқлар, ирақ түркмәнлири вә қирим татарлиридин болуп көп санда киши қатнашти. Мукапат тарқитиш мурасиминиң ечилиш нутқини түркийә пайтәхти әдәбият вә маарип уюшмиси рәиси әхмәт қурт әпәнди сөзлиди. У, нутқида бу йилқи мукапатни тоққуз кишигә бәргәнликини, әдәбият-сәнәтниң бир милләт үчүн кәм болса болмайдиған амил икәнликини, бу мукапатни бериш арқилиқ буни йәнә бир қетим күнтәртипкә елип кәлгәнлики үчүн өзини бәхтлик һес қилидиғанлиқини баян қилди.

Арқидин мукапатқа еришкән шәхсләр сәһнигә тәклип қилинди. Әнқәрә алтиндағ районлуқ һөкүмәт башлиқи вәйсәл тиряки әпәндигә тарихий асарә-әтиқиләрни қоғдаш хизмәтлирини яхши қилғанлиқидин, 7 гүзәл адәм намлиқ телевизийә филиминиң язғучиси әхмәт тәзҗан әпәнди билән нәвим шаһин ханимға, уйғур шаири нурәла гөктүрк ханимға, түрк дуняси яшлар тәшкилати мәсуллиридин шәмсәттин күзәчи әпәндиләргә мукапат берилди.

Уйғур шаирә нүрәла гөктүрк ханим мукапатини алғандин кейин өзиниң шеирлирини декламатсийә қилип бәрди вә кишиләрниң қизғин алқишиға еришти. Мукапат тарқитиш мурасимида сөз қилған әзәрбәйҗан парламент әзаси ханим халилова ханим, шәрқий түркистан вәхпиниң сабиқ рәиси һамут гөктүрк әпәнди вә түрк дуняси яшлар қурултийи һәйәт әзалиридин шәмсәттин күзәчи әпәндиләр, бу мукапатни тәсис қилған пайтәхт әдәбият вә маарип уюшмисиға рәһмәт ейтқандин кейин уйғурларниң һазирқи вәзийити тоғрисидиму тохталди.

Мурасимдин кейин, мукапатқа еришкән уйғур шаирә нүрәла гөктүрк ханим билән һамут гөктүрк әпәндигә микрофонимизни узаттуқ.

Нүрәла гөктүрк ханим бу мукапатниң өзиниң уйғурларниң тамақ байлиқлирини тонутқанлиқи үчүн берилгәнликини, буниң өзи үчүн бир риғбәтләндүрүш икәнликини ейтти.

Нурәла гөктүрк ханим бундин кейинки һаятида уйғурларниң түркийәгә көчүшини тәсвирлигән бир китаб йезиватқанлиқини, бундин кейинки әвладларға йеңи шеир китаблири йезип қалдурушқа, пүтүн күчи билән уйғурларни түркийәдә тонутушқа тиришидиғанлиқи тәкитлиди.

Мурасимға қатнишип сөз қилған, түркийәдә яшайдиған уйғур зиялийлиридин бири һамут гөктүрк әпәнди бу мурасимда сөз қилған кишиләрниң һәммисиниң уйғур мәсилисини тилға алғанлиқини баян қилди. У йәнә, мукапат тарқитиш мурасимида түрк дунясиниң мәсилилиридин русийә тәрипидин бесивелинған қирим билән уйғурларға алаһидә орун берилгәнликини, өзлиригә уйғур мәсилисини аңлитиш пурсити бәргәнликини, бу пурсәттин пайдилинип, уйғурларниң һазирқи вәзийити тоғрисида мәлумат бәргәнликини баян қилди.

Мурасимға қатнашқан уйғур зиялийси азатҗан буғра әпәнди бу қетимқи мурасим вә нурәла гөктүрк ханимниң иҗадий паалийәтлириниң қиммитиниң етирап қилинишқа еришиватқанлиқини, униң уйғур аяллири ичидә түркийәдә яхши тонулғанлиқини баян қилди.

Уйғур шаирә нүрәла гөктүрк ханим әслидә уйғур райониниң йәкән шәһиридә туғулған, 1960-йилларда ата-аниси билән биргә түркийәгә келип йәрләшкән болуп, өзлүкидин тиришип өгинип, шаирә болуп йетишип, бир қанчә шеирлар топлими вә уйғур тамақлирини тонуштуруш китаби нәшр қилған. Униң өз әсәрлири арқилиқ уйғурларни түркийә җамаитигә тонуштурушқа һәссә қошқанлиқи билдүрүлмәктә. Униң ейтишичә, у, түркийәдә һазирғичә 48 қетим һәр хил мукапатқа еришкән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт