Бурса шәһиридики түркий милләтләр фестивалида уйғур мәдәнийити тонуштурулди

Ихтиярий мухбиримиз әркин тарим
2018-07-23
Елхәт
Пикир
Share
Принт
3-Нөвәтлик түркий милләтләр тәнтәрбийә фестивалидин бир корунуш. 2018-Йили 20- июл. Бурса, түркийә.
3-Нөвәтлик түркий милләтләр тәнтәрбийә фестивалидин бир корунуш. 2018-Йили 20- июл. Бурса, түркийә.
Social Media

Түркийә бурса вилайитидә өткүзүлгән 3-нөвәтлик түркий милләтләр тәнтәрбийә фестивалида уйғурлар өз мәдәнийитини намаян қилди. Бу фестивалда түркийәниң һәрқайси шәһәрлиридин вә дуняниң һәрқайси җайлиридин кәлгән 16 түркий милләт миллий тәнтәрбийә оюнлирини көрсәткәндин сирт, мәзкур түркий милләтләр мәхсус чедирларда бөлмә ечип өзлириниң мәдәнийәт вә сәнитини намаян қилди. Фестивалға истанбулда паалийәт елип бериватқан нузугум җәмийити рәиси мунәввәр өзуйғур башчилиқида бир гуруппа уйғур қатнишип, мәхсус бөлмә ечип уйғурларниң тарихи, мәдәнийәт-сәнити, уйғурлар тоғрисида түркийәдә чиқиватқан китаб, журнал вә гезитләрни һәм кейинки йилларда хитайниң уйғурларға елип бериватқан бесим сиясәтлири, инсан һәқлири дәпсәндичиликлири әкс әттүрүлгән сүрәтләрни көргәзмә қилди шуниңдәк уйғур қол һүнәрвәнчилик сәнити буюмлирини сатти.

Фестивал җәрянида уйғурлар түркийә парламенти инсан һоқуқлирини тәкшүрүш комитети рәиси, сабиқ дөләт министири хақан чавушоғлу, бурса шәһәр башлиқи вә бәзи парламент әзалири билән көрүшүп уйғурлар һазир дучар болуватқан еғир бесим сияситини аңлатти. 

20-Июлдин 22-июл күнигичә бурса шәһиридики қоҗаяйла дегән җайда өткүзүлгән фестивалда уйғурлардин сирт түркийәдә яшаватқан қазақ, қирғиз, түркмән, өзбек, татар, ногайларму мәхсус бөлмә ечип, өзлириниң йемәк-ичмәк, кийим-кечәк вә бүгүнки әһвалини тонуштурған. 

Фестивал һәққидә техиму мәлумат игиләш үчүн нузугум вәхпи рәиси мунәввәр өзуйғур ханим, бурса улудағ университети оқуғучиси абдулқадир абдулкерим вә уйғур бөлмисини екскурсийә қилған диләк йилмаз ханим билән сөһбәт елип бардуқ. 

Абдулқадир абдулкерим паалийәтниң бәк яхши өткәнликини, уйғурлар ачқан бөлүмдә уйғурларниң тарихи, мәдәнийити, мәшһур шәхслирини тонуштуридиған сүрәтләр қоюлғанлиқи, қисқиси паалийәтниң үнүмлүк болғанлиқини баян қилди. 

Мунәввәр өзуйғур ханим 12 йилдин буян бундақ уйғур мәдәнийитини тонуштуридиған паалийәтләргә қатнишиватқанлиқини, уйғурларниң тили, дини вә миллий кимликини қоғдап қелиш вә тонуштуруш үчүн бу хил паалийәтләрни елип беришниң зор әһмийәткә игә икәнликини тәкитлиди. 

Абдулқадир абдулкерим өзлириниң бурса шәһәр башлиқи әлнур ақташ әпәнди билән түркийә парламенти инсан һоқуқлирини тәкшүрүш комитети рәиси хақан чавушоғлу вә парламент әзалириға уйғурларниң һазирқи еғир вәзийити тоғрисида мәлумат бәргәнликини ейтти. 

Абдулқадир абдулкерим әпәнди түркләрниң уйғур бөлмисини екскурсийә қилғандин кейинки инкаси тоғрисида тохталди. 

Уйғур чедирини зиярәт қилған оқутқучи диләк йилмаз ханим уйғур чедирини екскурсийә қилғанлиқини, бу қетимқи паалийәттә түркийә парламенти инсан һоқуқлирини тәкшүрүш комитети рәиси хақан чавушоғлуниң уйғурларниң еғир инсан һәқ вә һоқуқлири дәпсәндичиликигә учраватқан бундақ бир пәйттә, уйғур чедирини екскурсийә қилишиниң зор әһмийәткә игә икәнликини баян қилип мундақ деди: «бу йәрдә әң муһими түркийә парламенти инсан һәқ вә һоқуқлирини тәкшүрүш комитети рәиси, парламент әзаси хақан чавушоғлуниңму фестивалға қатнишиши болди. Һәммимизгә мәлум болғинидәк шәрқий түркистан хитайниң ишғали астида, уйғурлар еғир бесим астида, бундақ бир вәзийәттә хақан чавушоғлуниң уйғурларниң бөлмисини екскурсийә қилиши, униң уйғурларни қоллиғанлиқиниң ипадиси дәп ойлаймән». 

Бу йил түркий милләтләр тәнтәрбийә фестивалиниң 3-қетимлиқи өткүзүлгән болуп, өткән йилдикисигиму мунәввәр өзуйғур ханим башчилиқидики уйғур оқуғучилар қатнашқан иди. Бурса вилайити булғарийә, сабиқ югославийәдин келип олтурақлашқан түрк көчмәнләр көпләп олтурақлашқан җай болуп, бу йәрдә давамлиқ һалда түрк дуняси паалийәтлири өткүзүлүп келинмәктә.

Пикирләр (0)
Share
Толуқ бәт