Bursa shehiridiki türkiy milletler féstiwalida Uyghur medeniyiti tonushturuldi

Ixtiyariy muxbirimiz erkin tarim
2018-07-23
Élxet
Pikir
Share
Print
3-Nöwetlik türkiy milletler tenterbiye féstiwalidin bir korunush. 2018-Yili 20- iyul. Bursa, türkiye.
3-Nöwetlik türkiy milletler tenterbiye féstiwalidin bir korunush. 2018-Yili 20- iyul. Bursa, türkiye.
Social Media

Türkiye bursa wilayitide ötküzülgen 3-nöwetlik türkiy milletler tenterbiye féstiwalida Uyghurlar öz medeniyitini namayan qildi. Bu féstiwalda türkiyening herqaysi sheherliridin we dunyaning herqaysi jayliridin kelgen 16 türkiy millet milliy tenterbiye oyunlirini körsetkendin sirt, mezkur türkiy milletler mexsus chédirlarda bölme échip özlirining medeniyet we sen'itini namayan qildi. Féstiwalgha istanbulda pa'aliyet élip bériwatqan nuzugum jem'iyiti re'isi munewwer özuyghur bashchiliqida bir guruppa Uyghur qatniship, mexsus bölme échip Uyghurlarning tarixi, medeniyet-sen'iti, Uyghurlar toghrisida türkiyede chiqiwatqan kitab, zhurnal we gézitlerni hem kéyinki yillarda xitayning Uyghurlargha élip bériwatqan bésim siyasetliri, insan heqliri depsendichilikliri eks ettürülgen süretlerni körgezme qildi shuningdek Uyghur qol hünerwenchilik sen'iti buyumlirini satti.

Féstiwal jeryanida Uyghurlar türkiye parlaménti insan hoquqlirini tekshürüsh komitéti re'isi, sabiq dölet ministiri xaqan chawushoghlu, bursa sheher bashliqi we bezi parlamént ezaliri bilen körüshüp Uyghurlar hazir duchar boluwatqan éghir bésim siyasitini anglatti. 

20-Iyuldin 22-iyul künigiche bursa shehiridiki qojayayla dégen jayda ötküzülgen féstiwalda Uyghurlardin sirt türkiyede yashawatqan qazaq, qirghiz, türkmen, özbék, tatar, nogaylarmu mexsus bölme échip, özlirining yémek-ichmek, kiyim-kéchek we bügünki ehwalini tonushturghan. 

Féstiwal heqqide téximu melumat igilesh üchün nuzugum wexpi re'isi munewwer özuyghur xanim, bursa uludagh uniwérsitéti oqughuchisi abdulqadir abdulkérim we Uyghur bölmisini ékskursiye qilghan dilek yilmaz xanim bilen söhbet élip barduq. 

Abdulqadir abdulkérim pa'aliyetning bek yaxshi ötkenlikini, Uyghurlar achqan bölümde Uyghurlarning tarixi, medeniyiti, meshhur shexslirini tonushturidighan süretler qoyulghanliqi, qisqisi pa'aliyetning ünümlük bolghanliqini bayan qildi. 

Munewwer özuyghur xanim 12 yildin buyan bundaq Uyghur medeniyitini tonushturidighan pa'aliyetlerge qatnishiwatqanliqini, Uyghurlarning tili, dini we milliy kimlikini qoghdap qélish we tonushturush üchün bu xil pa'aliyetlerni élip bérishning zor ehmiyetke ige ikenlikini tekitlidi. 

Abdulqadir abdulkérim özlirining bursa sheher bashliqi elnur aqtash ependi bilen türkiye parlaménti insan hoquqlirini tekshürüsh komitéti re'isi xaqan chawushoghlu we parlamént ezalirigha Uyghurlarning hazirqi éghir weziyiti toghrisida melumat bergenlikini éytti. 

Abdulqadir abdulkérim ependi türklerning Uyghur bölmisini ékskursiye qilghandin kéyinki inkasi toghrisida toxtaldi. 

Uyghur chédirini ziyaret qilghan oqutquchi dilek yilmaz xanim Uyghur chédirini ékskursiye qilghanliqini, bu qétimqi pa'aliyette türkiye parlaménti insan hoquqlirini tekshürüsh komitéti re'isi xaqan chawush'oghluning Uyghurlarning éghir insan heq we hoquqliri depsendichilikige uchrawatqan bundaq bir peytte, Uyghur chédirini ékskursiye qilishining zor ehmiyetke ige ikenlikini bayan qilip mundaq dédi: "Bu yerde eng muhimi türkiye parlaménti insan heq we hoquqlirini tekshürüsh komitéti re'isi, parlamént ezasi xaqan chawush'oghluningmu féstiwalgha qatnishishi boldi. Hemmimizge melum bolghinidek sherqiy türkistan xitayning ishghali astida, Uyghurlar éghir bésim astida, bundaq bir weziyette xaqan chawush'oghluning Uyghurlarning bölmisini ékskursiye qilishi, uning Uyghurlarni qollighanliqining ipadisi dep oylaymen". 

Bu yil türkiy milletler tenterbiye féstiwalining 3-qétimliqi ötküzülgen bolup, ötken yildikisigimu munewwer özuyghur xanim bashchiliqidiki Uyghur oqughuchilar qatnashqan idi. Bursa wilayiti bulghariye, sabiq yugoslawiyedin kélip olturaqlashqan türk köchmenler köplep olturaqlashqan jay bolup, bu yerde dawamliq halda türk dunyasi pa'aliyetliri ötküzülüp kélinmekte.

Toluq bet