Türkiyediki Uyghur xanim, qizlar bahar féstiwalida Uyghur medeniyitini tonutti

Türkiyening qeyseri wilayitidiki Uyghur xanim, qizliri erjiyes üniwérsitétining en'eniwiy féstiwalliridin biri bolghan bahar féstiwaligha ishtirak qildi.

5 - Ayning 20 - künidin 24 - künigiche dawamlashqan bu féstiwalda qeyseridiki Uyghur xanim, qizlar mexsus bölüm échip, Uyghur medeniyitini, bolupmu Uyghurlarning yémek - ichmek medeniyitini tonutti. Bölümni ékiskursiye qilghan kishilerning köplikidin Uyghur ayallar tamaqlarni ülgürtelmey qaldi. 3 Kün ichide bu yermenkini yüz ming etrapida kishi ziyaret qilghan bolup, bu kishilerning köpi Uyghur medeniyiti tonutulghan bölümni ziyaret qildi. Qeyseri erjiyes üniwérsitétidiki chong meydanda ötküzülgen bu féstiwalda türkiyediki dangliq naxshichilar konsértmu bergen bolup, bu féstiwal meydanini ékiskursiye qilghanlar ichide, sheher bashliqliri, herqaysi rayonlarning rehberliri, ammiwiy teshkilat mes'ulliri, oqutquchi, oqughuchilarmu bar. Biz neq meydan'gha téléfon qilip, Uyghur bölümini achqan sherqiy türkistan medeniyet we hemkarliq jem'iyiti ayallar komitéti re'isi rabiye ilktürk xanim we bahar féstiwalida Uyghur tamiqi yewatqan talas rayonluq hökümet bashliqi rifat yildirim ependi bilen téléfon söhbiti élip barduq.

Neq meydan'gha téléfon qilghinmizda, talas rayonliq hökümet bashliqi rifat yildirim ependi Uyghur medeniyiti bilen xéli burunla tonushqanliqini bayan qilip mundaq dédi:

- Leghmen men eng yaxshi köridighan yimeklerdin biri. Men Uyghurlarning yémek medeniyitini yaxshi bilimen. Uyghurlar bay medeniyetke ige bir millet. Shunga men bügün féstiwalgha kiripla birinchi qilghan ishim leghmen yéyish boldi. Men ottura asya türkiy jumhuriyetlirige barghinimdimu Uyghur ashxanilirida tamaq yeymen. Wilayitimizde Uyghur tamaqlirini yéyeligenlikim üchün özümni bexitlik hés qiliwatimen.

Rifat yildirim ependi xitayning Uyghurlargha élip bériwatqan zulumining tügeydighanliqini bayan qilip mundaq dédi:

- Zulum menggu dawamlashmaydu. Xitayning Uyghur qérindashlirimizgha élip bériwatqan zulumi méni qattiq bi'aram qilmaqta. Emma allagha ishinimizki, bu zulum axirlishidu. Biz sherqiy türkistanliq uchrawatqan zulumni yaxshi bilimiz. Uyghur qérindashlirimizning erkinliki üchün qolimizdin kelgenni qilimiz.