9-Nöwetlik xelq'araliq ramizan féstiwalida Uyghurlar öz medeniyitini namayan qildi

Ixtiyariy muxbirimiz erkin tarim
2018-06-18
Élxet
Pikir
Share
Print
9-Nöwetlik xelq'araliq ramizan féstiwalida Uyghurlar öz medeniyitini namayan qildi. 2018-Yili 13-iyun, türkiye.
9-Nöwetlik xelq'araliq ramizan féstiwalida Uyghurlar öz medeniyitini namayan qildi. 2018-Yili 13-iyun, türkiye.
RFA/Erkin Tarim

Türkiye paytexti enqerening kechi'ögren rayonida ötküzülgen 9-nöwetlik xelq'araliq ramizan féstiwalida Uyghurlar öz medeniyitini namayan qildi.

Bu féstiwalgha türkiyening herqaysi sheherliridin kelgen 40 jem'iyet we weqp qatnashqandin sirt yene ottura asiya türkiy jumhuriyetliri hem bashqa türkiy milletlerning naxsha- ussul ömeklirimu qatniship we mexsus bölüm échip özlirining medeniyet we sen'itini namayan qildi. Féstiwalgha istanbuldin kelgen Uyghur balilar sen'et ömiki qatniship, Uyghurche shé'ir déklamatsiye qildi, Uyghur naxsha ussulliridin örnekler körsetti. Ular bulardin sirt yene "Uyghur öyi" namida mexsus bölüm échip, Uyghurlarning tarixi, medeniyet-sen'iti, Uyghurlar toghrisida türkiyede chiqiwatqan kitab, zhurnal we gézitlerni hem kéyinki yillarda xitayning Uyghurlargha élip bériwatqan bésim siyasetliri, insan heqliri depsendichilikliri eks ettürülgen süretlerni körgezme qildi shuningdek Uyghur qol hünerwenchilik sen'iti buyumlirini satti.

10 Kün dawamlashqan pa'aliyetning eng axirqi küni, yeni 6-ayning 13-küni iptardin kéyin, Uyghur balilardin terkib tapqan sen'et guruppisi sehnige chiqip oyun körsetti. Oyunni féstiwalni uyushturghan enqere kechi'ögren rayonluq hökümetning re'isi mustafa aq ependi, herqaysi siyasiy partiyening wekilliri, türkiy milletlerning jem'iyet we weqiplirining wekilliri hem xelqtin bolup köp sanda kishi kördi. Mezkur féstiwalgha riyasetchilik qiliwatqan érol demir ependi Uyghur ömekni sehnige teklip qilip mundaq dédi: "Kechi'ögren rayonluq hökümet uyushturghan 9-nöwetlik ramizan féstiwaligha sherqiy türkistan Uyghur türkliri kéchisige xush keldinglar!. Hazir Uyghur ösmürler sen'et nomurlirini körsitidu. Türklerning ata wetini sherqiy türkistandin kelgen méhmanlirimiz bar. Xitay zulumi astida yashawatqan bu qérindashlirimizgha alla yardem qilghay".

Arqidin alqish sadaliri bilen Uyghur milliy kiyimini kiygen ösmürler sehnige chiqti.

Mezkur pa'aliyet heqqide köz qarishini igilesh üchün enqerediki yildirim beyazit uniwérsitéti oqughuchisi enwer exmet bilen söhbet élip barduq. U, Uyghur ösmürlerning Uyghurche shé'ir déklamatsiye qilip, sama ussulini oynap, kishilerning alqishigha sazawer bolghanliqini bayan qildi.
Kéyin biz 35 Uyghur ösmürdin terkib tapqan sen'et ömikini qurup, türkiyening herqaysi jaylirida Uyghurlarni tonushturuwatqan munewwer özUyghur xanim bilen söhbet élip barduq. U, féstiwalda Uyghur ösmürlerning rayonluq hökümetning bashliqigha sowghat teqdim qilghanliqini, uningdin bashqa Uyghur ösmürlerning Uyghur naxsha- ussulliridin örnekler körsetkenlikini bayan qildi.

U, sen'et pa'aliyiti axirlashqandin kéyin, "Uyghur éwi", yeni "Uyghur öyi" namida bir körgezme achqanliqini, buninggha Uyghurlarning tarixi, medeniyiti, meshhur shexislirini tonushturidighan süretler qoyulghanliqi, qisqisi pa'aliyetning ünümlük bolghanliqini bayan qildi.

Bu pa'aliyetke türklerdin sirt enqereliq Uyghurlarmu ishtirak qilghan bolup, ularghimu mikrofonimizni uzattuq. Uyghur akadémiyesi re'isi abdulxemit qaraxan ependi kechi'ögren rayonining enqerening eng chong rayoni ikenlikini, sen'et kéchilikige köp sanda kishining kelgenlikini, bu xil pa'aliyetlerning Uyghurlarni tonutush üchün zor ehmiyetke ige ikenlikini bayan qildi.

Munewwer özUyghur xanim 12 yildin buyan bundaq Uyghur medeniyitini tonushturidighan pa'aliyetlerge qatnishiwatqanliqini, Uyghurlarning tili, dini we milliy kimlikini qoghdap qélish we tonushturush üchün bu xil pa'aliyetlerni élip bérishning zor ehmiyetke ige ikenlikini tekitlidi.

Bu yil xelq'araliq ramizan féstiwalining 9-qétimliqi ötküzülgen bolup, bu, munewwer özuyghur xanim bashchiliqidiki Uyghur ösmürler sen'et ömikining 2-qétim qatnishishi iken. Mezkur pa'aliyetning 1-, 2-, we 4- qétimliqlirida sherqiy türkistan medeniyet we hemkarliq jem'iyitining enqere shöbisi "Uyghur öyi" namida mexsus bölüm échip Uyghurlarni tonushturghan idi.

Toluq bet