Алматада түркий хәлқләр мәдәнийити хәлқара тәшкилатиниң бөлүми ечилди

Ихтиярий мухбиримиз ойған
2015-03-05
Share
exmetjan-hashirof-we-duysen-qaseyinof-turkiye-1.JPG Язғучи вә драматорг әхмәтҗан һашироф (оңда) түркий хәлқләр мәдәнийити хәлқара тәшкилатиниң баш катипи дүйсен қасейиноф әпәнди билән биллә, 2014 -йили түркийә.
RFA/Oyghan

4-Мартта алматада орунлашқан қазақистанниң әң чоң алий билим дәргаһлириниң бири әл-фариби намидики қазақ миллий университетиниң шәрқшунаслиқ факултетида түркий хәлқләр мәдәнийити хәлқара тәшкилатиниң бөлүмини ечиш мурасими болуп өтти.

Түркий хәлқләр мәдәнийити хәлқара тәшкилатиниң қоллап-қуввәтлиши билән “алмата-ислам мәдәнийитиниң мәркизи-2015” программиси даирисидә мәзкур бөлүмниң ечилиши қазақистан хәлқлири бирләшмисиниң 20 йиллиқиға беғишланди.

Ечилиш мурасимиға түркийә, әзәрбәйҗан, өзбекистан, түркмәнистан җумһурийәтлириниң қазақистандики әлчиханилириниң, қазақистан хәлқләр бирләшмисиниң тәркибидики бир қатар миллий мәдәнийәт мәркәзлириниң вәкиллири, алимлар, алий оқуш орунлириниң оқутқучи вә оқуғучилири қатнашти. Униңда сөзгә чиққан түркий хәлқләр мәдәнийити хәлқара тәшкилатиниң баш катипи дүйсен қасейиноф мундақ деди: “бу бөлүм қазақистан вә түркий дуняси һәмкарлиқиниң йәнә бир көврүки болуп хизмәт қилишқа қаритилған. Униң паалийити қериндаш түркий хәлқләрни йеқинлаштурушқа, мәдәний-җәмийәтлик вә илмий-техникилиқ бирлишишни чоңқурлаштурушқа, илмий-билим алақилирини раваҗландурушқа ярдәм бериду. Бөлүм түркий хәлқләрниң тилини, түркий тиллиқ мәмликәтләрниң иҗтимаий-иқтисадий вә сиясий җәрянлириниму тәтқиқ қилиш мәркизи болуп қалиду”.

Радиомиз зияритини қобул қилған қазақистан билим вә пән министирлиқи мухтәр әвезоф намидики әдәбият вә сәнәт институтиниң баш илмий хадими, филологийә пәнлириниң доктори алимҗан һәмрайеф мәзкур бөлүмниң мәқсити, униңда қаралған мәсилиләр вә униң түркий хәлқләр, шу җүмлидин уйғурлар һаятидики роли һәққидә тохталди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт