Türkiyening “Sawashchi” namliq filimida kök bayraqqa orun bérildi

Ixtiyariy muxbirimiz arslan
2017.12.06
Turkmen-buway-sawash-kino-filim-1.jpg Türkiyening fokis téléwiziye qanilida her yekshenbe küni kechte yéngi qisimliri tarqitiliwatqan “Sawashchi” namliq filimidin körünüsh.
Social Media

Türkiyening fokis téléwiziye qanilida her yekshenbe küni kechte yéngi qisimliri tarqitiliwatqan “Sawashchi” yeni “Küreshchi” dégen namdiki köp qisimliq téléwiziye filimining bu heptilik 23-qismida Uyghurlar tilgha élindi.

Filimda süriyediki türkmenlerge yardem bérish üchün barghan türkiye eskerlirining arisida bir sen'etchi, özini “Sherqiy türkistanliq Uyghur” dep rol alghan bolup, 23-qisimda “Qilich etriti”namdiki türk eskerler süriyediki türkmen yézisigha barghanda, u yerde 70 yashliq bir boway bilen uchrishidu. U bowayni sorighan eskerlerge qomandani mundaq dep tonushturidu؛ “Bu boway abdulwahit eltürki'i , 24 yil sadamning türmiside yatqan, hayati boyiche türkmenlerning erkinliki üchün küresh qilghan muhim kishi, bu yézida hemme kishi uning sözini anglaydu”.

Boway eskerlerning kiyimliridiki türkiye bayriqini körüp, “Bir minut saqlanglar”, dep qoyup öyige kirip kétidu we qolida ay yultuzluq “Sherqiy türkistan bayriqi”ni kötürüp chiqidu. Boway kök bayraqni eskerlerge körsitip turup: “Bilemsiler oghullirim! bu kök bayraq. Bu ikki ay yultuzluq bayraqning birlishishini qanche uzundin buyan kütüwatimiz, men bu ikki bayraqni ayrishqa qandaqmu közüm qiysun”deydu.

Boway ulardin her birining yurtini soraydu, biri özining chanaqqel'edin ikenlikini, yene biri enqere, yene biri déngizlidin, deydu, yene bir esker özini ezerbeyjandin, deydu. Kurshat isimlik esker,“Men bek yiraqtin tagha, yeni sherqiy türksitandin” dep jawab béridu. Boway buni anglap nahayiti hayajanlinip kétidu we“Sherqiy türkistandin” dégen eskerning yüzlirini silap mürisini tutidu.

Boway u eskerge mundaq deydu: “Sen sherqiy türkistandin shundaqmu? bir küni alla nésip qilsa, sen u yerge qaytsang, yéshing 70 yaki 90 gha kirgende bolsimu qaytsang u yerdiki her bir türkning pishanisigha söyüp qoyarsen. Ulargha, men süriyediki waqtimda put qoli boshap ketken bir yashan'ghan türkmen bowayni kördüm dégin. Kéyin ulargha: yer sharida bir böre öyge ögitilip hergizmu itqa aylandurulmaydu dégin. We yene türkler hergizmu esirge chüshmeydu, quyash bir küni choqum chiqip nur chachidu, dégin. Méni anglidingmu? bu sözlirimni ulargha eynen yetküzgin”

Boway qolidiki tapanchini Uyghur eskerge uzitip turup, “Bu tapancha fexri pasha zamanidin miras qalghan. Buni sanga hediye qilay, xalisang yéningda saqla, xalisang bu dunyada eng yaxshi köridighan birige hediye qilarsen”,deydu. U kurshat isimlik Uyghur esker bashta ret qilidu, kéyin bowayning ching turushi bilen tapanchini qobul qilidu we bowayning ay yultuzluq sherqiy türkistan bayriqini tutup turghan qolini söyüp, hörmet bildüridu we rehmet éytidu.
Eskerler komandirning buyruqi bilen yolgha chiqidu. Boway qolidiki ay yultuzluq kök bayraqni lepildetken halda eskerlerni uzitip qoyidu.

“Sawashchi”namliq bu filim türkiyede hazir eng köp körülidighan köp qisimliq filim bolup, her yekshenbe küni kechte körürmenler yéngi qisimlirini qiziqip körmekte. Metbu'atlarda her bir qisim toghrisida alahide xewerler tarqitilmaqta. Buningdin ilgiriki bir qismidimu Uyghur esker bilen qomandani otturisida Uyghurlar toghrisidiki qisqiche di'alog türkiyediki Uyghurlarning alahide diqqitini tartqan idi.

Bu filimning mushu qisimliri 12-ayning 3-künidin 6-künigiche bolghan 3 kün ichide yütübi filim tor békitide 39 ming qétim körülgen we köpligen inkaslar yézilghan.

Türkiyediki Uyghur ziyaliyliridin , enqere hajiteppe uniwérsitéti oqutquchisi doktor erkin ekrem we zhurnalist mirkamil qeshqerli ependiler mezkur filimning ishlinish arqa körünüshi, uning xitaygha körsitidighan tesiri we ehmiyiti heqqide toxtaldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.