Түркийәдә өткүзүлгән "түркмән-йөрүк мәдәнийәт фестивали" да уйғурлар өз мәдәнийитини намаян қилди

Ихтиярий мухбиримиз әркин тарим
2018-08-07
Share
Turkmen-Yoruk-Festiwalida-Uyghurlar-2018-01.JPG Түркийәдә өткүзүлгән "түркмән-йөрүк мәдәнийәт фестивали" дин бир көрүнүш. 2018-Йили 5-авғуст. Муғла, түркийә.
RFA/Erkin Tarim

Түркийәдә өткүзүлгән 20-нөвәтлик хәлқаралиқ "түркмән-йөрүк мәдәнийәт фестивали" да уйғурлар өз мәдәнийитини намаян қилди. Бу фестивалға түркийәниң һәрқайси шәһәрлиридин вә һәрқайси дөләтләрдин кәлгән җәмийәт вә вәқипләрниң әзалири қатнашти.

8-Айниң 4-, 5-күнлири түркийәниң муғла вилайитидә өткүзүлгән паалийәткә муғла вилайитиниң валийси, түркийә мәдәнийәт вә саяһәт министири, бәзи парламент әзалири, сиясий партийә мәсуллиридин болуп көп санда киши иштирак қилған. Фестивал җәрянида оттура асия түркий җумһурийәтлири вә башқа түркий милләтләр мәхсус бөлүм ечип, өзлириниң мәдәнийәт вә сәнитини намаян қилди. Фестивалға истанбул билән әнқәрәдин кәлгән уйғур оқуғучилар қатнишип, уйғурчә шеир декламатсийә қилди. Түркийәдә шеир декламатсийә қилиш билән тонулған уйғур өсмүр кичик муҗаһит қәшқәрли шаирә нурәла көктүрк ханим язған "биз ким?", "йирақта бир вәтән бар-шәрқий түркистан" намлиқ шеирларни декламатсийә қилди. Улар булардин сирт йәнә "уйғур өйи" намида мәхсус бөлүм ечип, уйғурларниң тарихи, мәдәнийәт-сәнити, уйғурлар тоғрисида түркийәдә чиқиватқан китаб, журнал вә гезитләрни һәм кейинки йилларда хитайниң уйғурларға елип бериватқан бесим сиясәтлири, инсан һәқлири дәпсәндичиликлири әкс әттүрүлгән сүрәтләрни көргәзмә қилди шуниңдәк уйғур қол-һүнәрвәнчилик сәнити буюмлирини сатти. 

2  Күн давамлашқан паалийәткә қатнашқан йилдирим бәязит университети оқуғучиси салаһидин қәшқәрли, әршидин идиқут, пәхирдин өзхан қатарлиқлар зияритимизни қобул қилип, 20-нөвәтлик хәлқаралиқ "түркмән-йөрүк мәдәнийәт фестивали" тоғрисида мәлумат бәрди. 

Салаһидин қәшқәрли бу қетимқи фестивалда түркләрдин сирт түркий милләтләрму чедир ечип өз "күлтүрлирини тонуштурғанлиқини", паалийәткә түркийә рәһбәрлириниңму иштирак қилғанлиқини баян қилди.

Пәхирдин өзхан уйғур, қазақ, өзбек, қирғиз вә түркмән қатарлиқ түркий милләтләрниң мәдәнийити тонуштурулған паалийәткә 6-7 миң кишиниң иштирак қилғанлиқини баян қилди. 

Пәхирдин өзхан фестивал җәрянида уйғур бөлмисини екскурсийә қилған кишиләрниң уйғурларни қоллайдиғанлиқини ипадилигәнликини баян қилди. Әршидин идиқутму паалийәт җәрянида түрк хәлқиниң уйғурларни қоллайдиғанлиқини ейтқанлиқини баян қилди. 

Бу фестивални уюштурған түркийә "түркмән-йөрүк җәмийити" рәиси җамал аққуш әпәнди бу фестивалда бурун нахшичи чақирип консерт йүргүзгәнликини, әмма бу йилдин тартип түрк дуняси фестивалиға айландурғанлиқини баян қилип: "пүтүнләй мәдәнийәт паалийити өткүзүп келиватимиз. Бурунқи түркмән-йөрүк фестиваллирида нахшичи чақирип консерт бәргүзәттуқ. Бу йилдин тартип паалийитимизни кеңәйттуқ. Бундин кейин чәтәлдин техиму көп түркий милләтләрни тәклип қилип, түркийәдики қериндашлири билән өзара чүшиниш, өзара ярдәмлишишни күчәйтишни ойлаватимиз" деди. 

Бу йил "түркмән-йөрүк күлтүр фестивали" ниң 20-қетимлиқи өткүзүлгән болуп, бу, уйғурларниң тунҗи қетим қатнишиши икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт