Türkiyede ötküzülgen "Türkmen-yörük medeniyet féstiwali" da Uyghurlar öz medeniyitini namayan qildi

Ixtiyariy muxbirimiz erkin tarim
2018-08-07
Share
Turkmen-Yoruk-Festiwalida-Uyghurlar-2018-01.JPG Türkiyede ötküzülgen "Türkmen-yörük medeniyet féstiwali" din bir körünüsh. 2018-Yili 5-awghust. Mughla, türkiye.
RFA/Erkin Tarim

Türkiyede ötküzülgen 20-nöwetlik xelq'araliq "Türkmen-yörük medeniyet féstiwali" da Uyghurlar öz medeniyitini namayan qildi. Bu féstiwalgha türkiyening herqaysi sheherliridin we herqaysi döletlerdin kelgen jem'iyet we weqiplerning ezaliri qatnashti.

8-Ayning 4-, 5-künliri türkiyening mughla wilayitide ötküzülgen pa'aliyetke mughla wilayitining waliysi, türkiye medeniyet we sayahet ministiri, bezi parlamént ezaliri, siyasiy partiye mes'ulliridin bolup köp sanda kishi ishtirak qilghan. Féstiwal jeryanida ottura asiya türkiy jumhuriyetliri we bashqa türkiy milletler mexsus bölüm échip, özlirining medeniyet we sen'itini namayan qildi. Féstiwalgha istanbul bilen enqeredin kelgen Uyghur oqughuchilar qatniship, Uyghurche shé'ir déklamatsiye qildi. Türkiyede shé'ir déklamatsiye qilish bilen tonulghan Uyghur ösmür kichik mujahit qeshqerli sha'ire nur'ela köktürk xanim yazghan "Biz kim?", "Yiraqta bir weten bar-sherqiy türkistan" namliq shé'irlarni déklamatsiye qildi. Ular bulardin sirt yene "Uyghur öyi" namida mexsus bölüm échip, Uyghurlarning tarixi, medeniyet-sen'iti, Uyghurlar toghrisida türkiyede chiqiwatqan kitab, zhurnal we gézitlerni hem kéyinki yillarda xitayning Uyghurlargha élip bériwatqan bésim siyasetliri, insan heqliri depsendichilikliri eks ettürülgen süretlerni körgezme qildi shuningdek Uyghur qol-hünerwenchilik sen'iti buyumlirini satti. 

2  Kün dawamlashqan pa'aliyetke qatnashqan yildirim beyazit uniwérsitéti oqughuchisi salahidin qeshqerli, ershidin idiqut, pexirdin özxan qatarliqlar ziyaritimizni qobul qilip, 20-nöwetlik xelq'araliq "Türkmen-yörük medeniyet féstiwali" toghrisida melumat berdi. 

Salahidin qeshqerli bu qétimqi féstiwalda türklerdin sirt türkiy milletlermu chédir échip öz "Kültürlirini tonushturghanliqini", pa'aliyetke türkiye rehberliriningmu ishtirak qilghanliqini bayan qildi.

Pexirdin özxan Uyghur, qazaq, özbék, qirghiz we türkmen qatarliq türkiy milletlerning medeniyiti tonushturulghan pa'aliyetke 6-7 ming kishining ishtirak qilghanliqini bayan qildi. 

Pexirdin özxan féstiwal jeryanida Uyghur bölmisini ékskursiye qilghan kishilerning Uyghurlarni qollaydighanliqini ipadiligenlikini bayan qildi. Ershidin idiqutmu pa'aliyet jeryanida türk xelqining Uyghurlarni qollaydighanliqini éytqanliqini bayan qildi. 

Bu féstiwalni uyushturghan türkiye "Türkmen-yörük jem'iyiti" re'isi jamal aqqush ependi bu féstiwalda burun naxshichi chaqirip konsért yürgüzgenlikini, emma bu yildin tartip türk dunyasi féstiwaligha aylandurghanliqini bayan qilip: "Pütünley medeniyet pa'aliyiti ötküzüp kéliwatimiz. Burunqi türkmen-yörük féstiwallirida naxshichi chaqirip konsért bergüzettuq. Bu yildin tartip pa'aliyitimizni kéngeyttuq. Bundin kéyin chet'eldin téximu köp türkiy milletlerni teklip qilip, türkiyediki qérindashliri bilen öz'ara chüshinish, öz'ara yardemlishishni kücheytishni oylawatimiz" dédi. 

Bu yil "Türkmen-yörük kültür féstiwali" ning 20-qétimliqi ötküzülgen bolup, bu, Uyghurlarning tunji qétim qatnishishi iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet