Уйғур академийәси уйғур мәдәнийәт тәтқиқати бойичә илмий муһакимә йиғини өткүзмәкчи

Ихтиярий мухбиримиз әркин тарим
2017-11-05
Елхәт
Пикир
Share
Принт
Уйғур академийәси истанбулда ачмақчи болған «уйғур мәдәнийити хәлқара илмий муһакимә йиғини» ниң елани.
Уйғур академийәси истанбулда ачмақчи болған «уйғур мәдәнийити хәлқара илмий муһакимә йиғини» ниң елани.
RFA/Erkin Tarim

Мәркизи истанбулдики уйғур академийәси билән ибин хәлдун университети бирликтә тунҗи қетим уйғур мәдәнийити тоғрисида илмий муһакимә йиғини өткүзмәкчи.

«Уйғур мәдәнийәт тәтқиқати илмий муһакимә йиғини» 11-вә 12-ноябир күнлири истанбулдики фатиһ султан мәмәт вәхпи университетида өткүзүлидиған болуп, уйғур академийисиниң түркийәдә тунҗи қетим уйғур мәдәнийити темисида хәлқаралиқ илмий муһакимә уюштуруши икән. 

Уйғур академийисиниң рәиси аблимит қарахан әпәнди һәр йили бир қетим өткүзүп келиватқан уйғур әдиб, пән тәтқиқатчилири вә мутәхәссисләр учришишиниң 9-қетимлиқини мәхсус уйғур мәдәнийәт тәтқиқатиға беғишлиғанлиқини, йиғинға уйғур вә түрк тәтқиқатчилардин 20 кишиниң илмий доклат беридиғанлиқини баян қилди.

Аблимит қарахан әпәнди, бу йиғинниң мәқсити һәққидә тохтилип, хитай уйғур тили вә мәдәнийитини йоқ қилишқа урунуватқан бүгүнки күндә уйғур академийисиниң мәзкур илмий йиғин арқилиқ уйғурларниң бай мәдәнийәткә игә бир милләт икәнликини тәкитлимәкчи болғанлиқини баян қилди.

Нахша-усул, кийим-кечәк вә хәттатлиқ қатарлиқларму уйғур мәдәнийитиниң муһим бир тәркибий қисми болуп, аблимит қарахан әпәнди, мәзкур илмий муһакимә йиғини җәрянида уйғур зиялийси доктор пәрһат қурбан тәңритағли әпәнди, доктор гүлзадә тәңритағли ханим вә тонулған түрк сәнәтчи бунямин ақсуңгур қатарлиқ кишиләрниң уйғур нахша-усуллиридин өрнәкләр көрситидиғанлиқини, йиғин җәрянида уйғур мәдәнийити әкс әттүрүлгән көргәзмә ечилидиғанлиқини баян қилди.

Измирдики әгә университетиниң профессори, уйғур академийисиниң сабиқ рәиси, доктор алимҗан инайәт әпәнди истанбулда чақирилмақчи болған мәзкур илмий муһакимә йиғининиң түркийәдә мәхсус уйғур мәдәнийәт тәтқиқатлири тоғрисида чақирилған тунҗи йиғин икәнликини, мәзкур йиғинда уйғур мәдәнийитиниң йилтизи, исламийәттин бурунқи вә кейинки тәрәққият әһвали, йеқинқи заман уйғур мәдәнийитиниң ички вә ташқи амиллири вә механизми һәққидә тәйярланған мақалиләрниң оқулидиғанлиқини баян қилди.

Профессор алимҗан әпәнди бу хил тәтқиқат вә илмий муһакимә йиғинлириниң уйғур миллий кимликини қоғдап қелиш үчүн зор әһмийәткә игә икәнликини баян қилди.

Уйғур академийисиниң баш катипи батур қарахан әпәнди, уйғур мәдәнийити тоғрисидики мәзкур йиғинға истанбулдики уйғур зиялийлири вә һәрқайси университетларда оқуватқан уйғур оқуғучиларниң келип қатнишишини илтимас қилди. 

Мәркизи истанбулдики уйғур академийәси 2009-йили 9-айниң 9-күни қурулған. Өткән 8 йил ичидә түркийәдә 24 қетим, америкида 1 қетим илмий муһакимә йиғини чақирған. Истанбулда 13 қетим доклат бериш йиғини уюштурған.

Пикирләр (0)
Share
Толуқ бәт