Shiwétsiyediki Uyghur yashliri doppa bayrimini tebriklidi

Ixtiyariy muxbirimiz éhsan
2014-05-05
Share
uyghur-doppisi-doppa.JPG Uyghur yashlar bir yerge jem bolup, Uyghurlarning xelq'ara doppa bayrimini tebriklidi. 2014-Yili 3-may, shiwétsiye.
RFA/Ehsan

Shiwétsiyede yashawatqan Uyghur yashlar bir yerge jem bolup, Uyghurlarning xelq'ara doppa bayrimini tebriklidi.

Bügün Uyghurlarning kimlik belgisi bolghan, jezbdar xasliqqa ige bolghan medeniy miraslirining biri doppa medeniyet bayrimi! doppa-Uyghurlarning éstétik qarishida eks etken tebi'et güzellikining obrazi. Uyghurlar bostanliq medeniyitige qedem qoyup, sheherlishishke yüzlen'gendin tartipla madda we meniwi turmushning süpetlik bolushigha köp tirishqan. Jümlidin kiyim-kéchek medeniyitide tashqi körünüshke, yarishimchanliqqa ehmiyet bergen.

Uyghur doppisi-Uyghurlarning medeniyet kimlikidur. U körkemliki, eplikliki, milliy jelpkarliq bilen bashqilarning, bolupmu her sahe chet'ellik dostlarning yaqturushigha ériship kelmekte. Doppa kiygenler kiymigenlerni heweste qaldurup kelmekte.

Muhajirette yashawatqan Uyghur yashlirimu bu doppa medeniyitimizge warisliq qilip kelmekte. Shiwétsiyede yashawatqan Uyghur yashliri her yili her xil sheklide doppa bayrimini tebriklep kelmekte.

3-May küni dem élish küni munasiwiti bilen shiwétsiyediki Uyghur yashlirining mes'uli nur'elining teshkillishide sitokholmgha qarashliq heselbiy rayonidiki köl boyida doppa bayrimini tebriklesh dala ziyapiti ötküzüldi. Bu pa'aliyetke oghul-qiz Uyghur yashliri chimen doppilirini yarashturup kiyip, öyliridin teyyarlap kelgen Uyghur ta'amliri bilen ghizalan'ghach bir-birining doppa bayrimini tebrikleshti.

Biz bu munasiwet bilen bu pa'aliyetni teshkilligüchi nur'elini ziyaret qilduq.

U sözini pütün dunyadiki Uyghurlarning doppa bayrimini tebriklesh bilen bashlidi: "Biz shiwétsiyediki yashlar bügün bu yerge yighilip doppa bayrimini tebriklewatimiz. Uyghurning doppisi u bir medeniyetning belgisila bolup qalmay, yene bir milletning rohidur, ghururidur, biz doppa medeniyet bayrimi arqiliq özimizning ésil medeniyet en'enisini qoghdaymiz, jakarlaymiz, iptixarlinimiz... Doppa medeniyitimiz bolsa ejdadlirimizdin bizge miras qalghan medeniyet bolup, chet'elde yashawatqan bizdek yashlarning bu medeniyetke warisliq qilishi, kéyinki ewladlarningmu medeniyitimizge warisliq qilishi üchün bu pa'aliyetni uyushturduq".

U, bu pa'aliyetni ötküzüshtiki meqsiti heqqide toxtilip mundaq dédi:
"Bu xil pa'aliyetler shiwétsiyediki yashlarni bir yerge jem qilip, bolupmu bu yerde usup yétiliwatqan 18din 20 yashqiche bolghan yashlar arisida doppa bayrimimizni untup qalmasliq, ana tilni qoghdash qatarliq tereplerde ularni terbiyilesh bilen birge, kelgüside bu yashlarning shiwétsiyediki Uyghur dawasigha ige chiqishigha asas salidu dep oylaymen. Hemde bu xildiki pa'aliyetlerni dawamliq ötküzüsh arqiliq bu yerde yashawatqan yashlarning inaq,ittipaqliqini kücheytkili bolidu dep oylaymen."

Bu pa'aliyetke qatnashqan muhemmed pa'aliyetke qatnashqandin kéyin tesiratini mundaq ipadilidi:
"Men bügünki pa'aliyetke qatniship bek xushal boldum, bu pa'aliyet arqiliq öz medeniyitimizni tarqitalaydikenmiz, shuning bilen birge yashlar bilenmu ittipaqliqni, ömlükni ishqa ashuralaydikenmiz. Bu munasiwet bilen pütün dunyadiki Uyghurlarning doppa bayrimini tebrikleymen. Herqaysi döletlerdiki Uyghurlarningmu öz medeniyitimizni tonushturush bilen birge, ömlükte ötüshini ümid qilimen."

Pa'aliyetke qatnashqan Uyghurlar ziyapet jeryanida özliri doppa bayrimigha atap teyyarlap kelgen shé'ir, yumur, naxshilarni oqup köpchilikning keypiyatini kötürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet