Gollandiyede "Uyghur küni" pa'aliyiti ötküzülgen

Ixtiyariy muxbirimiz ekrem
2018-05-17
Élxet
Pikir
Share
Print

Gollandiyening rottérdam shehiridiki ürümchi réstoranida 14-may "Uyghur küni" pa'aliyiti ötküzülgen.

Gollandiyening rottérdam shehiridiki ürümchi réstoranining xojayini zeynidin tursun ependining bergen melumatigha asaslan'ghanda, 14-may küni bu réstoranda gollandiyediki türk ish ademliri jem'iyitining mes'ulliri, gollandiyediki herqaysi türk teshkilatlirining rehberliri, adwokatlar we uniwérsitétta oquwatqan yashlarning ishtirakida "Uyghur küni" pa'aliyiti ötküzülgen. Bu pa'aliyet "Sherqiy türkistan istiqlal marshi" bilen bashlan'ghan.

Zeynidin tursun ependining bildürüshiche, bu qétimqi pa'aliyetning asasiy meqsiti Uyghur élida höküm sürüwatqan nöwettiki éghir weziyetni gollandiyediki türklerge anglitish arqiliq ularning hésdashliqini qozghash we kélechekte Uyghurlargha munasiwetlik pa'aliyetlerde ularning yardimini qolgha keltürüshtin ibaret bolghan.

Bu qétimqi pa'aliyetke dunya Uyghur qurultiyining re'isi dolqun eysa ependimu teklipke bina'en qatniship, Uyghurlarning tarixi we nöwettiki weziyitidin melumatlar bergen. Zeynidin tursun ependining bayan qilishiche, d u q ning re'isi dolqun eysa pa'aliyet jeryanida türk teshkilatliri rehberliri bilen hemkarliqlar ornitish toghrisida kélishken.

Yighin'gha qatnashqan türk teshkilatliri wekilliri Uyghur éli we xelq'ara weziyet toghrisida ilmiy munaziriler élip barghan. Xitayning "Bir yol, bir belwagh" pilani heqqidimu etrapliq muhakimiler yürgüzgen hemde özlirining Uyghurlargha bolghan qérindashliq söygüsi, héssidashliqlirini bayan qilishqan.

D u q re'isi dolqun eysa ependi bu heqte ziyaritimizni qobul qilghanda, bu qétimqi pa'aliyet toghrisida qisqiche izahat bérip ötti hemde pa'aliyetning menilik, netijilik bolghanliqini mu'eyyenleshtürdi.

Ürümchi réstorani bundin 3 yil ilgiri gollandiyening rottérdam shehiride zeynidin tursun ependi teripidin échilghan bolup, d u q medeniyet komitétining mes'uli bolghan zeynidin ependi bu réstoranda hazirgha qeder Uyghurlargha munasiwetlik köpligen siyasiy, medeniy pa'aliyetlerni uyushturup kelgen. U yene xelq'ara kechürüm teshkilatining ezasi bolush süpiti bilen bu teshkilat namida birqanche qétim Uyghur éli weziyitidin melumat bérish yighinlirini uyushturghan. Uning bildürüshiche, ürümchi réstoranining noqul iqtisadiy menpe'et qoghlishish emes, Uyghur milliti üchün xizmet qilish wezipisimu bar iken.

Zeynidin tursun ependi sözining axirida muhajirettiki barliq Uyghurlarni qolidin kélishiche weten-millet xizmitige bir ülüsh hesse qoshushqa chaqirdi. Bu qétimqi pa'aliyetke hesse qatqan zeynidin ependining ayali rahile xanimmu pa'aliyetning muweppeqiyetlik ötkenlikidin memnun bolghanliqini eskertti shundaqla "Istiqlal marshi" orundalghanda hayajan yashlirining tökülgenlikini tilgha aldi.

Toluq bet