Уйғур қизи асийә қарақаш «түрк дунясиға төһпә қошқанлар» медалиға еришти

Ихтиярий мухбиримиз әркин тарим
2018-02-12
Share
asiye-qaraqash-korgezme.jpg Уйғур қизи асийә қарақаш рәсим көргәзмиси ачти. 2018-Йили 11-феврал, түркийә.
RFA/Erkin Tarim

Түркийәдики әң чоң аммиви тәшкилатлардин бири болған «үлкү очақлири» тәсис қилип, һәр йили түрк дуняси үчүн төһпә қошқанларға тарқитиливатқан медалниң «түрк дунясиниң мәдәнийәт-сәнәт саһәсигә төһпә қошқанлар медали» уйғур қизи асийә қарақашқа берилди.

«Үлкү очақлири» тәшкилатиниң тор бетидә елан қилинған хәвәргә асасланғанда, 2015-йили түркийәдики кишиләрни түрк дуняси үчүн, болупму бесим астида туруватқан түркий милләтләр үчүн ишләшкә риғбәтләндүрүш үчүн түрк дунясиға төһпә қошқанларға тарқитилидиған медал тәсис қилинған. 4-Қетимлиқ медал тарқитиш мурасими бу йил 11-феврал йәкшәнбә күни кәчтә истанбулниң әсәнләр районида өткүзүлгән. Мурасимға бәзи сиясий партийәләрниң мәсуллири, парламент әзалири, аммиви тәшкилатларниң мәсуллири вә аммидин болуп көп санда киши иштирак қилған.

Уйғур қизи асийә қарақашқа медални парламент әзаси арзу әрдәм ханим тәқдим қилди. Мурасимға риясәтчилик қилған киши асийә қарақашниң исмини мундақ елан қилди: «уни йиллардин бери тонуймән, шәрқий түркистанлиқ уйғур қизи, рәсим тартиш сәнәткари асийә қарақаш ханимға мәдәнийәт-сәнәт медали берилди».

Асийә қарақаш медални алғандин кейин сөз қилип мундақ деди: «мән бу медални өзүмниң намида әмәс, түрк дунясиниң қәлби, қаниған яриси шәрқий түркистанлиқ уйғурларниң намидин алғанлиқим үчүн пәхирлинимән».
«Түрк дуняси мәдәнийәт-сәнәт медалиға» еришкән асийә қарақаш ханим бизниң «медални парламент әзасиниң қолидин елипсиз, немиләрни һес қилдиңиз?» дегән соалимизға мундақ җаваб бәрди: «мән көчмән бир уйғур аилисидә туғулуп чоң болған. Ата-анамдин хитайниң шәрқий түркистанда уйғурларға елип бериватқан бесим сияситини аңлап чоң болдум. Миллитим үчүн немә қилип бәрсәм дәп ойлап, толуқсиз оттура мәктәптә оқуватқан вақтимда мәктәптики йиғилишларда, олтурушларда уйғурларни тонутушқа башлидим. Кейинчә рәсим тартишқа башлидим, уйғурлар өткүзгән намайишларда, йиғинларда, уйғурларниң той-төкүнлиридә рәсим тартип буларни көргәзмиләрдә көрситиш арқилиқ уйғурларни тонутушқа башлидим. Рәсим саһәсидә қолға кәлтүргән нәтиҗилирим түпәйли бир қанчә қетим ‹мәңгү түрк телевизийәси' гә чиқтим, мәзкур программиларда кәспий җәһәттики мувәппәқийәтлиримни аңлитиш билән бирликтә уйғурларниң һазирқи вәзийити, хитайниң уйғурларға елип бериватқан бесим сияситиниму аңлаттим. Мән миллитимгә қилған хизмитим үчүн бундақ бир мукапатқа еришкәнликим үчүн өзүмни бәк бәхтлик һес қиливатимән. Мән өзүмниң намимдинла әмәс, бәлки уйғурлар намидин бу мукапатни алдим.»

Асийә қарақаш мәдәнийәт-сәнәтниң уйғурларни тонуштуруштики ролиниң зор икәнликини, шуңа өзигә охшаш сәнәтниң һәрқайси саһәсидә ишләватқан уйғурларниң буниңдин яхши пайдилиниши керәкликини баян қилип мундақ деди: «технологийә зор тәрәққий қилған бу күнләрдә рәсим вә көрүнүшләрниң тәсири һәммидин күчлүк болиду. Биз хитайниң уйғурларға елип бериватқан бесим сияситини сөз билән баян қилғандин рәсим билән көрсәтсәк униң тәсири техиму күчлүк болиду, көргүчиниң каллисиға орнап кетиду. Шуңа мән алий мәктәптә сәнәт кәспидә оқуш җәрянидиму, муәллим тапшуруқ бәрсә уйғурларниң паалийәтлирини рәсимгә тартип ишләйттим, аста-аста уйғур дәвасини бу йол билән аңлитишқа башлидим. Мән тартқан рәсимлиримни көргәзмә қилипла қалмастин, иҗтимаий таратқулар биләнму тарқитиватимән. Наһайити яхши инкаслар келиватиду. Шуңа мән дуняниң һәрқайси җайлиридики уйғурларниң дәвасини аңлитишта булардин актип пайдилинишқа чақиримән».

Уйғур қизи асийә қарақаш пүтүн сорунларда әтләс көңләк, уйғур допписи билән көрүниду. У, 1993-йили истанбулда туғулған болсиму уйғурчини яхши сөзлийәләйду. У, бу һәқтә тохтилип мунуларни деди: «тилимиз, кийим-кечикимиз, өрп-адәтлиримиз бизниң миллий кимликимиз. Шуңа ата-анимиз бизни кичикимиздин тартип өйдә уйғурчә сөзлишишкә мәҗбурлайду. Уйғурлар барған сорунларға барсақ уйғурчә кийинип баримиз. Шуңа мән һәрқандақ мурасимға қатнашсам әтләс көңләк билән доппа кийип баримән. Шуңа мән чәтәлдики уйғур яшлирини буларға әһмийәт беришкә чақиримән».

Түрк дунясиға хизмәт қилғанларға тарқитиливатқан бу медални тарқитиш мурасимиға шәрқий түркистан вәқпиниң баш катипи доктор өмәр қул әпәндиму қатнашқан вә уйғурлар тоғрисида сөз қилған.

У, мурасимда баштин ахирғичә шәрқий түркистан мәсилисиниң тилға елинғанлиқини баян қилип мундақ деди: «бу мурасимниң әң яхши болған тәрипи баштин-ахирғичә шәрқий түркистан мәсилиси тилға елинди. Үлкү очақлири тәшкилати рәиси олҗай килавуз әпәндиму нутқида шәрқий түркистан мәсилиси һәққидә тохталди. Бу хил паалийәтләр шәрқий түркистан мәсилисигә җамаәтниң диққитини тартиш үчүн наһайити муһим».

Мурасимға иштирак қилған шәрқий түркистан яшлар тәшкилати муавин рәиси орхан бозқурт әпәнди мурасимға өзиниң қатнашқанлиқини, асийә қарақашниң 10 йилдин бери изчил һалда уйғур дәваси үчүн хизмәт қиливатқанлиқини баян қилди.

«Түрк дунясиға төһпә қошқанлар медали» бу йил, әдәбият-сәнәт, сиясәт, тәнтәрбийә вә ахбаратчилиққа охшаш 15 саһәдә төһпә қошқанларға тарқитилған болуп, мукапат саһиблири мукапатқа намзат көрситилгән он миңлиған киши ичидин иҗтимаий таратқуларда беләт ташлаш йоли билән таллиниду.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт