Türkiyede mukapatqa érishken Uyghur yazghuchi: mukapatni xelqim namidin aldim

Ixtiyariy muxbirimiz erkin tarim
2015-12-09
Share
ekrem-exmedof-mukapat.jpg Uyghur yazghuchi ekrem exmedof(solda) "Mehmud qeshqeri" namliq drama esirige bérilgen mukapatini türkiye döletlik tiyatir idarisi mudiri néjat birejik ependining qolidin alghan körünüsh. 2015-Yili 8-dékabir, enqere.
RFA/Erkin Tarim

"Mehmud qeshqiri" namliq sehne esiri bilen türkiyede mukapatqa érishken qazaqistanliq Uyghur yazghuchi ekrem exmetof 8-dékabir enqerede ötküzülgen murasimida mukapatni Uyghur xelqi namidin tapshurup alghanliqini bildürdi. Murasim xelq'ara türk kültüri teshkilatining zalida ötküzülgen bolup, mukapatini türkiye döletlik tiyatir idarisi mudiri néjat birejik ependi ekrem exmetofqa teqdim qildi. Uning "Mehmud qeshqiri" namliq esiri "Tughulghanliqining 100-yilida xaldun taner tiyatir eserliri musabiqisi" de ikkinchilikke érishken idi.

8-Dékabir küni chüshtin kéyin sa'et üchte xelq'ara türk kültüri teshkilati enqerediki merkizide murasim ötküzüp, mukapatlarni igilirige tarqitip berdi. Murasimgha türkiye medeniyet we sayahet ministir mu'awini nihat gül ependi, xelq'ara kültür teshkilati mudiri düsen küsenof ependi qatarliqlar hemde ottura asiya türkiy jumhuriyetlirining diplomatliridin bolup köp sanda kishi qatnashti.

Düsen küsenof ependi tonulghan türk drama yazghuchisi haldun tanerning tughulghanliqining 100-yilliqi munasiwiti bilen ötküzülgen mezkur drama yézish musabiqisining ehmiyiti toghrisida toxtilip mundaq dédi: "Türkiy xelqler otturisidiki qérindashliq rishtini küchlendürüsh we türkiy milletlerning medeniyitini dunyagha tonutush üchün her xil pa'aliyetlerni élip bériwatqan xelq'ara türk kültür teshkilati türkiy milletlerning medeniyitige zor töhpilerni qoshqan meshhur kishilernimu xatirilesh pa'aliyiti ötküzüp kelmekte."

Murasimda yene yighin riyasetchisi "Tughulghanliqining 100-yilida xaldun taner drama yézish musabiqisi" ning bahalash hey'iti bu eserlerni oqup bahalash netijiside rusiye fédératsiyesi bashqurdistan rayonidin meryem burakayéwaning "Saye" namliq esirining birinchilikke, qazaqistanliq Uyghur yazghuchi ekrem exmetofning "Mehmud qeshqiri" namliq esirining ikkinchilikke, ezerbeyjanliq afak mesudning "Mensur hellaji" namliq esirining üchinchilikke, moldawiyening gagawuz rayonidin kelgen todur zanetning "Sistéma" namliq esirining tötinchilikke we türkmenistanliq nabatguli rejepofning "Nesridin ependi, sen kim?" namliq esirining beshinchilikke érishkenlikini jakarlidi. Kéyin, mukapat sahibliri ayrim-ayrim sehnige teklip qildi we ulargha mukapat buyumliri tarqitildi.

Mukapatqa érishken qazaqistanliq Uyghur yazghuchi ekrem exmedof ependi mukapatini alghandin kéyin qisqa söz qilip, bu mukapatni Uyghur xelqi namidin alghanliqini, diwanu lughatit türk heqqide türkiyede tetqiqat élip barghan barliq türkologlargha rehmet éytidighanliqini bayan qildi.

Ekrem exmedof qazaqistanda tughulup chong bolghan Uyghur bolup, qazaq tiyatirxanisi bilen almatadiki Uyghur tiyatirxanisida rézhissor bolup ishligen, uning bir qanche esiri sehnide qoyulghan. Uning bu qétim mukapatqa érishken ikki perde sekkiz körünüshlük mezkur dramisi Uyghurche yézilghan bolup, uningda mehmud qeshqerining qeshqerdin bashlinip baghdadqiche sozulghan "Diwanu lughatit türk" ni yézish sepiri mezmun qilin'ghan. Yazghuchi eserde mehmud qeshqerining izdinish usulliri, musheqqetlik hayat sergüzeshtliri, düshmenlerning her xil suyiqestlirini nahayiti janliq we qiziqarliq shekilde ipadilep bergen.

Yawro-asiya yazghuchilar birlikining uyushturushi, türkiye bash ministirliq tarmiqidiki türkiyeni tonutush fondining qollap -quwwetlishi, xelq'ara türk medeniyiti teshkilati yeni türksoy we türkiye dölet tiyatirxaniliri bash idarisining hemkarlishishi arqisida orunlashturulghan "Tughulghanliqining 100-yilida xaldun taner tiyatir eserliri musabiqisi" tunji qétimliq drama yézish musabiqisi bolup, mezkur musabiqe bundin kéyinmu dawamlishidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet