Qazaqistandiki Uyghurlar milliy örp-adetlirini saqlap qélishqa tirishmaqta

Ixtiyariy muxbirimiz oyghan
2015.01.28
orp-adet-saqlap-qelish.jpg Qazaqistandiki Uyghurlarning milliy örp-adetlirini saqlap qélish pa'aliyitidin körünüsh. 2015-Yili yanwar, almata.
RFA/Oyghan

Qazaqistan Uyghurliri özlirining tarixiy wetinidin üzülüp turghinigha qarimastin, ötmüsh tarixini, tilini, milliy örp-adetlirini saqlap qélish yolida köpligen pa'aliyetlerni uyushturmaqta.

Elwette, buning dölet prézidénti nursultan nazarbayéf rehberlikidiki qazaqistan hökümitining milletler ara dostluq, razimenlik yönilishide yürgüzüwatqan ichki siyasiti arqisida emelge éshiwatqanliqi otturigha qoyulmaqta. Melumatlargha qarighanda, qazaqistanliqlar 2015-yili qazaq xanliqining 550 yilliqini, qazaqistan xelqi assambléyisining 20 yilliqini, memliket asasiy qanunining 20 yilliqini nishanlashni pilanlighan bolup, shu meqsette Uyghurlar zich olturaqlashqan chélek tewesining yurt-jama'etchiliki bash qoshup, Uyghurlarning ataqliq shexslirini yad étish, milliy en'enilirini tiklesh, dostluq we razimenlik qedriyetlirini teshwiq qilish ishlirini yürgüzmekte.

25-Yanwarda almata wilayitining chélek tewesige qarashliq qoram yézisida Uyghurlarning milliy en'enilirige béghishlap ötküzülgen murasim shuning yarqin bir ispatidur. Mezkur murasimning birinchi qismi meripetchi, sha'ir we jama'et erbabi, “Jasaret”, “Aq térek”, “Oyundin bilimge” qatarliq shé'iriy toplamlarning aptori hébibullam gayitofning 80 yilliq tewelludigha béghishlandi. Uningda edibning terjime hali we ijadiyiti toghriliq doklat qilin'ghandin kéyin, mektep oqughuchiliri uning shé'irlirini oqudi. Ikkinchi bölümde Uyghurlarning milliy toyigha béghishlan'ghan körünüshler orun aldi.

Radi'omiz ziyaritini qobul qilghan qoram yézisi aktiplirining biri sha'ire tashgül héziyarowa mezkur murasimning meqsiti, ehmiyiti heqqide öz qarashlirini otturigha qoydi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.