Amérikidiki Uyghur putbolchilarning Uyghurlardin kütidighan ümidi we pilanliri

Muxbirimiz méhriban
2016-06-06
Share
putbol-teriner-juret-uchqun-mirshat.jpg "Uyghur amérika longqisi" putbol musabiqisidiki térinérlardin mirshat, uchqun(soldin birinchi we ikkinchi) we jür'et zayir (ongdin birinchi). 2016-Yili may.
Photo: RFA

Ötken hepte 2-nöwetlik "Uyghur amérika longqisi" putbol musabiqisini ayaghlashturup qaytip kelgen, térinérlar we potpolchi yashlar muhajirettiki Uyghur jama'iti we teshkilatlardin kütidighan ümidi we pilanlirini anglatti. Ular bu heqtiki qarash, pilan we tekliplirini otturigha qoyup, Uyghur yashliridiki putbolgha bolghan qizziqishning bashqa tenheriket türliridin yuqiriliqini, eger Uyghur jama'iti we teshkilatlarning meniwi, maddiy jehetlerdiki qollishi téximu kücheyse, putboldin ibaret bu tenheriket türi arqiliq, muhajirette yashawatqan Uyghur ewladlirining Uyghur milliy kimliki, ana til we medeniyitini saqlap qélishla emes, belki Uyghur putbolchiliqining xelq'aragha yüzlinishidimu bir ilgirilesh nuqtisi bolalaydighanliqini bildürdi

"Uyghur amérika longqisi" putbol musabiqisining 2016-yilidiki 2-nöwetlik musabiqisining sahibxaniliqini kaliforniyediki Uyghur yashlar putbol komandisining térinéri mérshat ependi we kaliforniye jama'iti üstigen alghan. Musabiqe ayaghlashqandin kéyin radiyomiz ziyaritini qobul qilghan térinérlar we yash putbolchilar, bu nöwetlik musabiqining teshkillesh we orunlashturush jehettin aldinqi qétim wérjiniyide ötküzülgen tunji nöwetlik musabiqige qarighanda téximu mukemmel we puxta bolghanliqini bayan qilip, bu, kaliforniyidiki Uyghur jama'itining qizghinliq bilen yardem bérishining netijisi dep qaraydighanliqini bildürdi.

Kaliforniye los anjilis komandisining térinéri mérshat ependi, bultur yaz peslide amérikining wérjiniye shtatida ötküzülgen tunji nöwetlik musabiqide, özining kaliforniye jama'itige wakaliten bu yilliq musabiqining sahibxaniliqini üstige élishni jakarlighandin buyan, kaliforniye jama'itining hetta amérikining herqaysi shitatliridiki Uyghurlarning maddiy, meniwi jehetlerdiki yardimi netijiside, qatnashqan komandilar bulturqidin köpeygen bolsimu, bu yilliq musabiqidiki meydan, komanda ezalirining yataq we tamaq qatarliq bir qatar mesililer hel qilinip, 3 künlük musabiqining muweppeqiyetlik élip bérilishigha kapaletlik qilin'ghanliqini bildürdi.

Térinérlardin wirjiniye komandisining térinéri jür'et zahir ependi, bu qétimqi musabiqining sahibxaniliqini öz üstige alghan kaliforniye Uyghur jama'itining qollishigha qarita alahide rehmitini bildürüsh bilen bille, putbol gerche bir tenterbiye türi bolsimu, emma muhajirette tarqaq yashawatqan Uyghur ewladlirining öz-ara tonushush, dostluq ornitish, bolupmu ana tilida alaqilishish we Uyghur örp-aditini öginish arqiliq Uyghur milliy kimlikini saqlap qélishta muhim ehmiyetke ige ikenlikini tekitlep, Uyghur jama'itining öz ewladlirining ösüp-yétilishide ehmiyiti zor bolghan bu xil kolléktip tenheriket pa'aliyetlirige köngül bolushi we qollishining tolimu zörür we texirsizlikini bildürdi.

Wérjiniye shtati amérikida Uyghurlar nisbeten merkezlik topliship olturaqlashqan rayonlarning biri.

Putbolchilardin washin'gton d s yashlar putbol komandisining komanda bashliqi arafat dilshat, wérjiniye we etrapidiki Uyghur yashliridin teshkillen'gen washin'gton d s putbol komandisining bügünkidek mukemmel bir komanda bolup shekillinishige, wérjiniye feyrfaks etrapida yashighan Uyghur jama'itining türtkilik rol oynighanliqini bildürüp, nöwettiki putbol komandisining ata-anilarning balilarni da'im uchrishish pursitige ige qilishi, putbolgha yéteklesh we eyni yilliri özi bilen teng yashtiki balilarning putbolgha bolghan hewes, qiziqishi türtkiside 10 nechche yilliq tirishchanliq netijiside bügünki halgha yetkenlikini bildürüp, bu komandining bundin kéyinki pilan we ümidlirini otturigha qoydi.

Térinér jür'et zahir ependi, özining kündilik xizmitidin qalghan barliq waqtini bu balilarning putbol meshiqige yétekchilik qilishtin ibaret xalisane wezipini üstige élishigha seweb bolghan amillar heqqidimu toxtaldi. Özi deslep amérikigha kelgen mezgillerde bu yerdiki Uyghur jama'itidiki ömlük we inaqliq shundaqla balilardiki putbolgha bolghan hewes we qizghinliqning türtke bolghanliqini bildürüp, Uyghur jama'itidiki bu xil rohning üzülüp qalmasliqini ümid qilidighanliqini, bolupmu washin'gton d s diki amérika Uyghur birliki teshkilatining muhajirettiki Uyghurlarning ewladi bolghan yash-ösmürlerining putbolgha oxshash tenheriket pa'aliyetlirige köngül bölüshi, Uyghur milliy kimlikining ana yurttin yiraq bolghan ellerde saqlinip qélishi we dawamlishishida muhim ehmiyetke ige ikenlikini tekitlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.