Истанбулда "уйғур лоңқиси" ни талишиш өсмүрләр путбол мусабиқиси өткүзүлди

Ихтиярий мухбиримиз арслан
2018-07-18
Share
uyghur-longqisi-musabiqisi-istanbul-2.jpg Истанбулда өткүзүлгән "уйғур лоңқиси" ни талишиш өсмүрләр путбол мусабиқисидин көрүнүш. 2018-Йили 16-июл.
RFA/Arslan

Тәнтәрбийә, инсанниң тән-сағлиқини ашурупла қалмастин иҗтимаий җәмийәттики инсанларни йеқин мунасивәт вә өз-ара достлуқ орнитишқа түрткә болидиған бир иҗтимаий паалийәт болуп, путбол мусабиқиси дуняда инсанлар әң көп қизиқидиған хәлқаралиқ бир тәнтәрбийә түри һесаблиниду. Йеқиндин буян истанбулда яшаватқан уйғур яшлардинму путбол һәвәскарлири йетишип чиқмақта.

Истанбулдики шәрқий түркистан тәнтәрбийә вә тәрәққият җәмийити билән шәрқий түркистан йеңи әвлад һәрикитиниң бирликтә уюштуруши билән 7-айниң 14-күнидин 16-күнигичә истанбулда "уйғур лоңқиси" ни талишиш өсмүрләр путбол мусабиқиси өткүзүлди.

3 Күн давам қилған бу қетимқи путбол мусабиқисигә, 12-18 яшлар оттурисидики уйғур яшлардин 12 команда мусабиқигә чүшти.

Шәрқий түркистан тәнтәрбийә вә тәрәққият җәмийитиниң рәиси таһир көкбайрақ бу путбол мусабиқисини уюштуруштики мәқсити тоғрисида тохтилип мундақ деди: "биринчидин, истанбулдики уйғур яш-өсмүрләрни бир йәргә топлаш, уларни өз-ара тонуштуруш, түркийәдә өсүп чоң болған бир түркүм яш-өсмүрләр билән йеқиндин буян вәтәндин истанбулға келип олтурақлишип қалған яш-өсмүрләрни өзара тонуштуруш, бирлик-баравәрликни өгитиш, иккинчидин, яш өсмүрлиримизни өзлириниң шәрқий түркистанлиқ икәнликини унтуп қалмаслиқи, уларни өз ара бир-биригә тонуштуруш, уларниң оттурисида достлуқ-қериндашлиқни күчәйтиш, улар билән болған мунасивитимизни техиму йеқинлаштуруп, улар ата-анисидин айрилип, сеғиниш һес қилған вақитлирида уларниң ичидики ялғузлуқ, зерикиш бесимлирини азрақ болсиму йениклитиш мәқситидә бу мусабиқини уюштурдуқ. Қисмән болсиму күткән нәтиҗигә ериштуқ дәп қараймән".

Шәрқий түркистан тәнтәрбийә вә тәрәққият җәмийитиниң рәиси таһир көкбайрақниң билдүрүшичә, икки күн давам қилған бу мусабиқидә яш бойичә чоңлардин 6 команда, кичикләрдин 6 команда болуп мусабиқигә чүшкән. Нәтиҗидә, кичикләр командисидин бөрә командиси биринчи, сутуқ буғрахан командиси иккинчи болған. Биринчи болған командиға 500 түрк лираси нәқ пул билән биринчилик уйғур лоңқиси, иккинчи дәриҗилик командиға 350 түрк лираси нәқ пул вә иккинчи дәриҗилик уйғур лоңқиси берилгән.

Чоңлар командисидин изчилар командиси билән әйнәк командиси һәл қилғуч мусабиқидә кәскин тутуш қилған болуп, нәтиҗидә әйнәк командиси изчилар командисини 2 гә қарши 3 топ киргүзүп, йеңивалған. Әйнәк командисиға 500 түрк лираси вә биринчи дәриҗилик уйғур лоңқиси, иккинчи болған изчилар командисиғиму 350 түрк лираси нәқ пул вә иккинчи дәриҗилик уйғур лоңқиси берилгән. Австралийәдин истанбулға зиярәткә кәлгән җәнубий австралийә ислам җәмийитиниң рәиси абдусалам алим уйғур лоңқисини биринчи болған әйнәк командисиға тәқдим қилди. Абдусалам алим, сөз қилип, риқабәтниң яхшилиққа башлайдиғанлиқини, нәтиҗиниң оттуриға чиқишқа түрткә болидиғанлиқини ипадилиди вә мусабиқидә биринчи болғанларни тәбрикләш билән биргә австралийәдики уйғур яшлар билән хәлқаралиқ бир путбол мусабиқиси өткүзүш тәклипини оттуриға қойди.

Путбол мусабиқиси 7-айниң 16-күни мувәппәқийәтлик ахирлашти

Таһирҗан бу мусабиқиниң наһайити яхши өткәнликини, буниңдин кейинму давам қилишни тәләп қилғанлар болғанлиқини, бу мусабиқиниң ғәлибилик ахирлашқанлиқини билдүрди.

Мусабиқигә қатнашқан кастамону университетиниң оқуғучиси абдуқадир һеким бу мусабиқә тоғрисида тохтилип мундақ деди: "биз шәрқий түркистан тәнтәрбийә вә тәрәққият җәмийити тәрипидин уюштурулған путбол мусабиқисигә әйнәк командиси намида қатнаштуқ вә биринчи болуп уйғур лоңқисиға ериштуқ. Путбол мусабиқиси коллектип күч чиқирип ойнайдиған бир мусабиқә, бу қетимқи мусабиқә уйғур яш-өсмүрләрниң иқтидарини җари қилдурушқа бир сәһнә һазирлап бәрди".

Сутуқ буғрахан командисиниң әзаси сәйфидин өмәр бу путбол мусабиқиси тоғрисида тохтилип мундақ деди: "биз бу мусабиқидә сутуқ буғрахан командиси болуш сүпитимиз билән биринчиликни талишип мусабиқигә чүштуқ, лекин иккинчи болуп қалдуқ, бирақ үмидни үзмидуқ, кейинки мусабиқә үчүн техиму пухта тәйярлиқ қилип биринчиликни елишқа тиришимиз".

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт