Gollandiyede Uyghur ta'am medeniyiti tonushturuldi

Ixtiyariy muxbirimiz ekrem
2017.10.10
uyghur-taam-urumchi-restorani-gollandiye.jpg “Az sanliq milletler medeniyet merkizi” orunlashturghan Uyghurche ta'amlardin behr élish pa'aliyitige qatnashquchilar “Ürümchi Uyghur réstoran” ining lengminidin huzurlanmaqta. 2017-Yili 9-öktebir, gollandiye.
RFA/Ekrem

Gollandiyening rottérdam shehiridiki “Az sanliq milletler kültür(medeniyet) merkizi” de Uyghurche ta'amlardin behr élish pa'aliyiti ötküzüldi.

Gollandiyening rottérdam shehiridiki “Az sanliq milletler medeniyet merkizi” rottérdamdiki “Ürümchi Uyghur réstorani” din özlirige Uyghur ta'am medeniyitini tonushturush iltimasida bolghan. 9-Öktebir küni zeynidin ependi bashliq 4 kishi bu merkezde 50 kishilik lengmen we polu hazirlap Uyghur ta'am medeniyitini namayan qilghan.

9-Öktebir küni kechte neq meydandin bizge melumat bergen zeynidin ependi, bu künidiki pa'aliyettin hem özining hem méhmanlarning köp memnun bolghanliqini, Uyghur medeniyitini yene bir qétim tonutush meqsitige yetkenlikini tilgha aldi.

Bu pa'aliyetke zeynidin ependining ayali rahile barat xanimmu hemdemde bolghan bolup, u özining bu xil shekilde Uyghur medeniyitini tonutush pursitige érishkenlikidin pexirlen'genlikini tekitlidi.

Uyghurche ta'amlargha éghiz tegken gollandiyelik bir xanimmu ziyaritimizni qobul qilghanda, lengmen we poluni éghzi éghzigha tegmey maxtap ketti. U mundaq dédi: “Uyghur ta'amliri heqiqetenmu bek bek lezzetlikken. Burun tétip baqmighan ikenmen. Bügün bu ta'amlardin shunchilik hozurlandim. Bundin kéyin ürümchi Uyghur réstoranini yoqlap turimen”.

50 Kishilik polu we lengmenni birla waqitta issiq hem öz temi bilen méhmanlarning aldigha élip chiqish asan emes. Zeynidin bashliq 4 Uyghur buning üchün köp ejir serp qilghan. Bezi téléwiziye muxbirliri neq meydanni filimgha alghan we kelgen méhmanlarning tesiratlirini igiligen. Ipade bildürgüchiler ijabiy bahalar bérishken.

Zeynidin tursun ependining inisi qehriman tursun bolsa, bu yerde noqul Uyghur ta'am medeniyiti tonushturulup qalmay, yene Uyghurlarning nöwettiki échinishliq weziyiti, tarixi heqqide chüshenchiler bérilgenlikini, Uyghurche etles könglek, badam doppa, chimen doppilarningmu körek qilin'ghanliqini qeyt qildi.

Zeynidin tursun ependi mushu ayning 23-küni özining “Ürümchi réstorani” da xelq'ara kechürüm teshkilati bilen birliship mexsus “Uyghur küni” pa'aliyiti ötküzüshning teyyarliqini qiliwatqan bolup, u sözining axirida pul tépishtin bekrek, öz millitini tonutushqa qiziqidighanliqini tekitlidi.

Zeynidin tursun ependining Uyghur jama'itini memnun qiliwatqan yene bir ishi؛ her yili yazda Uyghur bügünki zaman tarixida bolup ötken “Barin inqilabi”, “Ghulja weqesi”, “Ürümchi weqesi” we qatarliq zor weqelerni güldestiler tizip xatirileshni izchil dawamlashturush pa'aliyitidur.

Aldinqi ay, yeni 6-séntebir gollandiyediki “Xelq géziti”ning muxbirliri “Ürümchi réstorani” heqqide mexsus filim ishligen bolup, bu qisqa filimda Uyghur ta'am medeniyiti tonushturulupla qalmastin, yene Uyghurlarning kiyim-kéchekliri, örp-adetliri heqqidimu chüshenchiler bérilgen. Bu filim ijtima'iy taratqularda tarqitilghandin kéyin, qisqighina bir ay ichide ziyaretchilerning sani 65 ming kishidin éship ketken idi.

“Az sanliq milletler kültür (medeniyet) merkizi” de bu qétimqi pa'aliyetni ötküzgen “Ürümchi réstorani” ikki yil ilgiri gollandiyening rottérdam shehiride Uyghur ziyaliysi zeynidin tursun ependi teripidin échilghan bolup, bu réstoran Uyghur etlesliri, chimen doppa, badam doppa we Uyghur chalghu örnekliri bilen bézelgen. Bu sheherde aran 15 etrapida Uyghur ahalisi yashaydiken. Pütün gollandiyediki Uyghurlarning sani texminen 2 ming etrapida iken. Gollandiyede “Gollandiye sherqiy türkistan Uyghur birliki”, “Yawropa sherqiy türkistan ma'arip jem'iyiti” qatarliq teshkilatlar pa'aliyet élip baridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.