«Хәлқара уйғур тәтқиқати журнили» ниң 11-сани оқурмәнлири билән йүз көрүшти

Ихтиярий мухбиримиз әркин тарим
2018-07-11
Елхәт
Пикир
Share
Принт
«Хәлқара уйғур тәтқиқати журнили» ниң 11-сани.
«Хәлқара уйғур тәтқиқати журнили» ниң 11-сани.
uygurarastirmalari.com

Түркийәдә тунҗи вә мәхсус уйғур тәтқиқати һәққидики алтә айда бир, түрк тилида нәшр қилинидиған мәзкур илмий журналниң 11-сани оқурмәнлири билән йүз көрүшти.

Бу тор журнилиниң 11-санида уйғур тили, әдәбияти, фолклори, тарихи вә мәдәнийити тоғрисида йезилған 10 парчә мақалә билән 3 китаб тонуштуруш мақалисигә орун берилгән. Журналниң қануний игиси вә баш тәһрири измир егә университети түрк дуняси тәтқиқат мәркизиниң оқутқучиси профессор алимҗан инайәт әпәнди журналниң 11-санида елан қилинған мақалиләр ичидә доктор аспирант һәсәнҗан абдувайит язған «һазирқи заман уйғур язғучилиридин халидә исрайил вә униң әсәрлири» намлиқ мақалисидә йеңи мәзмунлар йорутуп берилгәнликини билдүрди. У бу санда елан қилинған доктор пәрһат қурбан тәңритағли әпәндиниң «уйғур музикисиниң хитай музика тарихиға көрсәткән тәсири» мавзулуқ мақалисиниң мәзмуни тоғрисида мәлумат бәрди.

Алимҗан инайәт истанбулдики мармара университетида докторлуқ унвани үчүн оқуватқан мәмтимин бәйтәмур әпәнди язған «уйғур мәтбуат тарихи» мавзулуқ мақалидиму йеңи мәзмунларниң оттуриға қоюлғанлиқини баян қилди.

Профессор алимҗан инайәт әпәнди журнални чиқириштики мәқситиниң дуняниң һәр қайси җайлиридики уйғуршунасларниң мақаллирини бир йәргә йиғип, оқурмәнләрниң пайдилинишиға сунуш икәнликини, бу мәқситигә йәткәнликини баян қилди.

Түркийәдә докторлуқ үчүн оқуватқан уйғур зиялийси абдуваһит әпәнди «хәлқара уйғур тәтқиқати илмий журнили» ниң 11-саниниң мәзмун җәһәттин көп хиллиққа игә икәнликини, муһит, сәнәт тарихи, бағвәнчилик вә компютер кәспигә даир мақалиләргиму орун берилгәнликини, буниң уйғур тәтқиқатиниң кеңийишигә түрткә болидиғанлиқини баян қилди.

Һазир түркийәдә 14 университетта уйғур тили дәрси өтүлмәктә. Уйғурларни тәтқиқ қилидиғанларниң саниму көпәймәктә. Түркийәдики мәлум бир университетта докторлуқ үчүн оқуватқан һәсәнҗан абдуваһит әпәнди журнални 5 йилдин бери изчил һалда торда чиқиватқанлиқи, торни зиярәт қиливатқанларниң саниниң күнсайин көпийиватқанлиқини, буниң түркийәдики уйғур тәтқиқатиниң тәрәққияти үчүн зор төһпә қошуватқанлиқини баян қилди.

Һәсәнҗан абдуваһит әпәнди дуняниң һәрқайси җайлиридики уйғурларниң өзлири туруватқан дөләт тилида журнал чиқириши керәкликини баян қилди.

Әнқәрәдики ғази университети һазирқи заман түркий тиллири вә әдәбиятлири факултети оқутқучиси айсун дәмирәз гүнәри ханим өзиниң «хәлқара уйғур тәтқиқати» журнилидин пайдилиниватқанлиқини, түркийәдики уйғур тәтқиқати үчүн пайдилиқ болуватқанлиқини тәкитлиди.

5 Йилдин бери журналниң11 санида 110 мақалә елан қилинған болуп, мақалиләр дуняниң һәрқайси җайлиридики уйғур вә башқа милләт зиялийлириниң илмий әмгики болуп, булар уйғурларниң тарихи, тили, әдәбияти, фолклори, сәнәт тарихи, иҗтимаий әһвали вә сиясий вәзийитини өзигә сиңдүргән һалда «хәлқара уйғур тәтқиқати» журнилиниң бир пүтүн гәвдисини тәшкил қилиду.

Пикирләр (0)
Share
Толуқ бәт