Истанбулда өткүзүлгән паалийәттә уйғур тилиға әһмийәт бериш тәкитләнди

Ихтиярий мухбиримиз арслан
2018-03-28
Елхәт
Пикир
Share
Принт
25-Март истанбулда өткүзүлгән уйғур ана тили вә норуз паалийитидин бир көрүнүш. 2018-Йили 25-март. Истанбул, түркийә.
25-Март истанбулда өткүзүлгән уйғур ана тили вә норуз паалийитидин бир көрүнүш. 2018-Йили 25-март. Истанбул, түркийә.
RFA/Arslan

25-Март күни истанбулдики уйғур академийисиниң уюштуруши билән «уйғурларда ана тил сөйгүси» вә «норуз тәнтәниси» дегән темида паалийәт өткүзүлди.

Паалийәттә уйғур тилиға әһмийәт бериш вә уйғур аилиләрниң пәрзәнтлиригә уйғур тили өгитиш керәклики тәкитләнди. 

Паалийәттә алди билән уйғур академийисиниң рәиси абдулһәмит қарахан ечилиш нутқи сөзләп, уйғурларниң норуз байримини тәбриклиди вә бу паалийәтни орунлаштуруштики асасий мәқсити тоғрисида тохталди. 

Абдулһәмит қарахан әпәнди сөзидә, уйғур тилиниң хитай даирилири тәрипидин чәклимигә учрап уйғур маарипидин сиқип чиқирилғанлиқи, уйғур тилиниң йоқилиш хәвпигә дуч келиватқанлиқи, шуниң үчүн вәтән ичи вә сиртидики барлиқ уйғурларниң пәрзәнтлириниң өз тилини йоқитип қоймаслиқи үчүн уйғур тилға әһмийәт бериши керәкликини тәкитлиди. 

Кейин уйғур сәнәтчиләрдин мухтәр абдукерим җанбаз «уйғур тили җан тилим» дегән темида дутар билән нахша орунлиди.

Истанбулдики бәйкәнт университети оқутқучиси доктор мәғпирәт камал ханим, «ана тил вә уйғурларниң мәвҗудийити» дегән темида сөз қилип, уйғур тилиниң әһмийити тоғрисида тохталди вә уйғур тилини миллий байлиқ хәзинә дәп көрсәтти. 

Паалийәттә йәнә уйғур өсмүрлири миллий кийимләр билән сәһнигә чиқип, уйғур тили өгиниш керәклики тоғрисида һәр хил шеир вә нәсир оқуди, итот орундап йиғин әһлиниң қизғин алқишиға еришти. 

Өсмүрләр итот орундаш арқилиқ, уйғурчә билмәйдиған уйғур балилар вә уйғурчә билән түркчини арилаштуруп сөзләйдиған балиларни тәнқид қилди вә уйғур аилиләрниң пәрзәнтлиригә уйғур тили өгитиш керәкликини тәкитлиди. 

Паалийәттә йәнә уйғур вә түрк сәнәтчиләр һәр хил номур көрсәтти. Түрк сәнәтчи бунямин ақсунгүр әпәнди, «учрашқанда», «гүл ачил» дегән уйғурчә нахшиларни дутар билән орундап паалийәтчиләрниң қизғин алқишиға еришти. 

Уйғур доктор пәрһат тәңритағли қатарлиқ сәнәтчиләр сәһнигә чиқип һәр хил уйғур хәлқ нахшилири орунлиди. 

Йиғинда йәнә арәл университети оқутқучи доктор шәвкәт насир әпәнди, норуз байрими вә уйғур мәдәнийити дегән темида сөз қилди. 

3 Саәт давам қилған паалийәт ахирида паалийәттә сөз қилғучилар вә номур көрсәткән сәнәтчиләргә тәқдирнамә тәқдим қилинди. Паалийәткән қатнашқан 100 гә йеқин уйғур өсмүргә, қочақ, шаһмат дегәндәк һәр хил оюнчуқлар мукапат сүпитидә берилди.

Пикирләр (0)
Share
Толуқ бәт