Abduraxman: widiyodiki xitayche sözlitiliwatqan bala méning öz oghlum

Muxbirimiz gülchéhre
2019-02-04
Élxet
Pikir
Share
Print
Türkiyede yashawatqan abduraxman we u xitaydin tarqitilghan sin körünüshidin tonuwalghan oghli abdul'eziz.
Türkiyede yashawatqan abduraxman we u xitaydin tarqitilghan sin körünüshidin tonuwalghan oghli abdul'eziz.
Social Media

Feysbokta Uyghurlar tarqatqan uchurlargha qarighanda türkiyede yene bir ata, xitaydin tarqitilghan bir widiyodin öz oghlini tonuwalghan. Xitayche dawyu détali arqiliq tarqalghan bu widiyoda 4 yashliq bir Uyghur bala xitayche sözlitilgen bolup, u ismini abdul'eziz dep éniq éytqan. Iz qoghlash arqiliq öz oghlini tonuwalghan abduraxmanni istanbuldin tépip ziyaret qilduq. U teminligen ispatlar widiyodiki balining abduraxmanning istanbulda-2014-yili 12-ayning 21-küni tughulghan we ikki yil awwal apisi bilen yurti aqsugha qaytqanche xewiri bolmay kéliwatqan oghli abdul'aziz ikenlikini körsitip turmaqta iken. Muxbirimiz gülchéhre bu heqte tepsiliy melumat béridu.

15 Sékuntluq bu widiyoda "Séning isming néme?qanche yashqa kirding? wetiningning nami néme? wetenning bayriqing qandaq? dep xitayche soralghan so'allargha xitayche chaqqanliq bilen inkas qayturuwatqan qoy közlük, bodruqqine abdu'ezizning bir xitay oqutquchi yaki yétekchige jawab bériwatqini chiqip turatti, bu qisqighine widiyoning axiri tamaqni nedin yeysen? dégen so'algha balining yötilip turup "Exlet sanduqidin" dep bergen jawabi bilen axirlishidu.

Xitaylashturush terbiyeside ménge yuyushqa uchrawatqanliqi éniq ipadilen'gen bu naresidining del özining ikki yildin buyan iz-dérikini qilalmay kéliwatqan yürek parisi, etiwarliq oghli ikenlikini tonup qélish abduraxman üchün teswirligüsiz bir xorluq, achchiq azablarni hés qildurmaqta iken.

"Eng endishe qiliwatqinim bu balamni xitaylashturup bir künliri özümge düshmen qiliwétermu, emdi uni yene körelermenmu dep ensireymen" dep ünsiz yash tökken bu yash ata oghlining tughulghan, özi kötürüp baqqan chaghlirini eslidi.

Abduraxmanning teminligen uchur we ispatlirigha qarighanda, abdul'eziz 2014-yili 12-ayning 21-küni istanbulda tughulghan. Abduraxman we uning ayali türkiyede ish-oqetning tayini yoq, balilarni türkiye nopusigha ötküzüsh qiyin bolushtek türlük qiyinchiliqlarda qalghan ehwalda axiri uning ayali balilarni élip yurti aqsugha tughqan yoqlashqa ketken. Ene shundin buyan ulardin xewer alalmay kelgen abduraxman, oghlining widiyosini 10 künler awwal tuyuqsiz xitayning dawyu dégen uchur alaqe détalidin körüp qalghan. U, widiyo tarqatquchi bilen alaqilishishke tirishqan bolsimu ünümi bolmighan, abduraxman bu qisqa widiyo arqiliq gerche oghlining hayat ikenlikini bilgen bolsimu, emma uning nede, qandaq halette turuwatqanliqi we bashqa qérindashliri heqqide héchqandaq uchur alalmighan.

Abduraxmanning ayali peride yasin, abdul'eziz 2 yash chéghida uningdin chong qizi we bowaq kenji qizi bolup 3 balisigha xitay konsulidin xitay pasporti ishlitip, 2016-yili 8-ayda ularni yurtqa élip mangghan iken. Epsus ularning yurtqa qaytqan peyti del xitay hökümitining türkiye qatarliq jaylardin qaytip kelgen kishilerni qattiq teqibge éliwatqan peytke toghra kelgen. Peride yasin 10 yilliq késilgen we shundin étibaren balilarningmu iz-dériki bolmighan.

Buning aldida, yeni ötken ayda istanbulda qelbinur tursun isimlik bir Uyghur ayalmu shuninggha oxshash xotendiki melum parawanliq ornidiki balilarning widiyosi ichidin özining 6 yashliq ghayib qizi aysheni tonuwalghanliqini xewer qilghan iduq. Bu xildiki hékayiler köpiyip barmaqta, bu kishilerning ré'al paji'eliri xitay hökümitining Uyghurlargha yürgüzüwatqan basturush siyasetliri, bolupmu lagérlarni qurup Uyghur we bashqa milletlerni keng da'iride qamishining selbiy tesirlirining her tereplime boluwatqanliqi, bolupmu buning balilargha élip kéliwatqan paji'elirining chongqur boluwatqanliqini ispatlap bermekte.

Yurti aqsu sheher beshtügmen yézisi yéngi östeng kentidin bolghan abduraxman toxtining échinishliq hékayisi bala bilenla tügimeydu, uning ata-anisi, ayali, qérindashliri lagérlarda, türmilerde turmaqta, ularning qaranchuqsiz qalghan ewladliri bolsa iz-déreksiz bolmaqta. Abduraxman toxtining béshigha kelgen paji'elerning dawamini kélerkin qétimliq programmida anglighaysiler.

Toluq bet