Gérmaniyede "Yawropada noruz" pa'aliyiti ötküzüldi

Ixtiyariy muxbirimiz ekrem
2017-03-27
Élxet
Pikir
Share
Print
Gérmaniyede ötküzülgen "Yawropada noruz" pa'aliyitidin körünüsh. 2017-Yili 26-mart.
Gérmaniyede ötküzülgen "Yawropada noruz" pa'aliyitidin körünüsh. 2017-Yili 26-mart.
RFA/Ekrem

26-Mart gérmaniyening karlisruhé shehiride ötküzülgen "Yawropada noruz" pa'aliyitige 5 dölettin 100 etrapida kishi qatnashti.

Yawropa sherqiy türkistan birliki teshkilatining teshebbusi, karlisruhé we etrap sheherlerde yashaydighan Uyghur jama'itining teshkillishi hem sahibxaniliq qilishi bilen 26-mart küni "Yawropada noruz" pa'aliyiti ötküzülüp, Uyghur jama'itini bayram shadliqigha chömdürdi.

Gérmaniyening karlisruhé shehiride ötküzülgen bu pa'aliyetke gérmaniyening herqaysi sheherliride yashawatqan Uyghurlardin yüzdin artuq kishi qatnishipla qalmay, Uyghur mötiwerliridin erkin aliptékin, dolqun eysa bashliq d u q rehberliri, yawropa sherqiy türkistan birliki teshkilatining re'isi turghunjan alawudun hajim bashliq teshkilat ezaliri, karlisruhé shehiride yashawatqan türk teshkilatlirining mes'ulliri, türkiye konsulxanisining karlisruhédiki wekilliri, kishilik hoquq teshkilatlirining wekilliri we Uyghurche kiyin'gen köpligen yash-ösmürlermu qatnashti. Bu pa'aliyetke yene gérmaniyege qoshna 5 dölettinmu wekiller kélip ishtirak qildi. Pa'aliyetke ablimit tursun ependi riyasetchilik qildi.

Bu qétimqi pa'aliyet sherqiy türkistanning milliy marshini orundash we uninggha hörmet bildürüsh bilen bashlandi. Mezzilik Uyghurche ta'amlardin kéyin tunji bolup sözge teklip qilin'ghan erkin aliptékin ependi Uyghurche, gérmanche, türkche tillarda sorun ehlining noruz bayrimini qizghin qutluqlidi. Erkin ependining sözidin kéyin myunxén shehiridiki xalise xanim yétekchilikidiki gérmaniye Uyghur ansambilining sen'etkarliri arqa-arqidin usul nomurlirini orundap, sorun keypiyatini yuqiri pellige kötürdi.

Mezkur pa'aliyetni biwasite teshkilligen Uyghur ziyaliysi enwer exmet ependi neq meydanda ziyaritimizni qobul qilghanda, néme üchün bu pa'aliyetni Uyghurlar merkezliship olturaqlashqan myunxén shehiride emes, belki karlisruhé shehiride teshkilligenlikige izahat bérip ötti.

Bu qétimqi noruzda her qaysi sheherlerdin kelgen Uyghur sen'etkarliri naxsha, muzika, shé'ir we usullar bilen tamashibinlarning yüreklirini lerzige sélip, sorun ehlige noruzning shatliq we huzurini hés qildurdi. Arida jama'et sorun'gha chüshüp, Uyghur usulliri bilen tamashibinlarning közlirini qamashturdi.

Pa'aliyet dawamida yene, karlisruhé shehiridiki Uyghur dewasini qollighan, Uyghurlargha yar-yölekte bolghan gérman we türklerge erkin aliptékin ependining qoli bilen yawropa sherqiy türkistan birliki teshkilati teripidin hazirlan'ghan sherepname we d u q hediye qilghan Uyghur doppisi teqdim qilindi. Sherep igiliri Uyghur doppilirini béshigha kiygende, zal ichini güldüras alqish sadaliri qaplidi.

D u q bash katipi dolqun eysa ependi sözge teklip qilin'ghanda bolsa, noruzni qedirleshning Uyghurni qedirlesh bilen barawer bolidighanliqini eskertip, Uyghur jama'itining noruz bayrimini qutluqlidi. Bu qétimqi pa'aliyette yene, türk konsulining wekili, türk teshkilatlirining wekilliri, kishilik hoquq teshkilatlirining wekilliri we köpligen Uyghur wekilliri söz élip, noruzni öz'ara mubarekleshti.

26-Mart karlisruhé shehiride ötküzülgen noruz pa'aliyitining mezmuni mol, shekli herxil bolup, Uyghur jama'itide chungqur tesir qaldurdi. Jama'et bu sorunni teshkilligen karlisruhédiki Uyghurlargha köptin köp minnetdarliq bildürüshti.

Toluq bet