Bir qisim lagér tutqunlirining qeshqer yéngisheher qomushköldiki ruyi toqumuchiliq zawutida ishilitiliwatqanliqi ashkarilandi

Muxbirimiz shöhret hoshur
2019-11-08
Élxet
Pikir
Share
Print
Xitayning melum shirkitining zawutida lagérdiki Uyghurlarni mejburiy emgekke séliwatqan körünüshi. 2018-Yili 17-öktebir, xoten.
Xitayning melum shirkitining zawutida lagérdiki Uyghurlarni mejburiy emgekke séliwatqan körünüshi. 2018-Yili 17-öktebir, xoten.
CCTV via AP Video

Muxbirimizning lagérlar heqqide élip barghan éniqlashliri dawamida qeshqerning yéngisheher we yéngisar nahiyeliride lagérdiki bir qisim tutqunlarning yéngisheherdiki sawxu, yeni qomushköl dégen jaygha sélin'ghan ruyi toqumichiliq fabirikisida ishlitiliwatqanliqi we tutqunlarning terbiyelinish ehwaligha qarap heptide, ayda yaki 3 ayda bir qétim öyige qaytidighanliqi ashkarilandi.

Qeshqer yéngisheherde siyasiy-qanun sahesidiki xadimlardin biri özi waqitliq wezipe ötewatqan bir kentte lagérgha ekitilgenlerdin 14 kishining nöwette ruyi toqumichiliq zawutida ishlitiliwatqanliqini ashkarilidi. 

Ötken yili xitay "Xelq tori" diki bir xewerde ruyi toqumuchiliq guruhining yéqinqi mezgillerde qeshqer yéngisheherde zawut qurup, qeshqerning ishsizliq mesilisini belgilik derijide hel qilghanliqi, ahalilerning bu zawutlardin memnun ikenliki ilgiri sürülgen idi. Emma mezkur xadimning bayanliridin melum bolushiche, u mes'ul kenttin bu zawutqa ishqa orunlashturulghanlar kechliri a'ilisige qaytish hoquqidin mehrum bolghan bolup, ular öz ehwaligha, yeni atalmish "Terbiyelinish" jeryanidiki özgirish ehwalighan qarap, beziliri heptide, beziliri ayda, beziliri üch ayda bir öylirige qaytidiken.
Ilgiriki éniqlashlirimiz dawamida qeshqer weziyitidin xewerdar kishiler nöwette qeshqerdiki zawutlarda normal ishchilarning ish heqqining 5 ming yüen etrapida ikenliki, emma lagérdin ekilip ishlitiliwatqanlarning köpinchisining heqsiz, az bir qisimining bolsa töwen ma'ashliq ikenlikini melum qilghan. Mezkur xadim bu ishchilarning ayda 2 ming yüen ma'ash éliwatqanliqini tilgha aldi. 

"Beydu" uchur ambirida tonushturulishiche, shendongning ruyi toqumichiliq guruhi xitayda toqumichiliqta aldinqi qatardiki 5 shirketning bir bolup, bu shirketning Uyghur rayonidiki tarmiqi 2010 ‏-yilliri shixenzide ish bashlighan. Bu shirket 2014‏-yiligha kelgende qeshqerde zawut qurghan. Xitay "Xelq tori" ning ötken yil 17‏-dékabirdiki bir xewiride bayan qilinishiche, mezkur shirketning "Yéngisheher ruyi toqumichiliq shirkiti" namidiki tarmiqi 2017‏-yili 3‏-ayda ish bashlighan. Qesheqer yéngisardiki bir kent sékritari öz kentidin nöwette 202 kishining lagérda ikenliki, bulardin 13 kishining ruyidiki toqumichiliq fabrikisida ishleydighanliqini ashkarilidi. Bu sékritarmu zawutqa ekitilgenlerning eng baldur bolghanda heptide bir qétim öyge qaytidighanliqini bayan qildi. 

Weziyettin xewerdar kishilerning bayan qilishiche, ruyi toqumichiliq fabrikisi yéngisheherning baghcha yézisi tewelikidiki sawxu, yeni qomushköl dégen sazliqqa sélin'ghan. Emma bu zawutning mexsus lagér ornida ishlitiliwatqanliqi we yaki lagérgha alaqisiz kishilerningmu barliqi hazirche melum emes. 

"Xelq tori" ning mezkur xewiride yéngisheherdiki ruyi toqumichiliq shirkiti qurulghan 2017‏-yildin buyan 5000 che kishini ish bilen teminligenlikini ilgiri sürgen. Bu uchur qomushköldiki ruyi toqumichiliq zawutning mexsus lagér ornida ishlitiliwatqanliqidek éhtimalliqini isharetlimekte.

Toluq bet