Quyash énérgiyesi shirketliri mejburiy emgekke chétildi

Muxbirimiz jüme
2021-01-10
Share
Quyash énérgiyesi shirketliri mejburiy emgekke chétildi Mejburiy emgekke chétilghanliqi ilgiri sürülgen xitayning bawli shyéshin (GCL-Poly) énérgiye pay kontrol cheklik shirkitining Uyghur rayonidiki zawuti.
Social Media

Yéngidin élan qilin'ghan bir doklatta, dunyadiki eng chong quyash énérgiyesi shirketliri xitay hökümiti bilen hemkarliship yolgha qoyghan Uyghur rayonidin ishchi qobul qilish programmilirining mejburiy emgekke chétilidighanliqi körsitilgen.

Gé'o-siyasiy, iqtisadiy we téxnologiyelik yéngiliqlar tetqiqati bilen shughullinidighan "Upuq meslihetchiliki (Horizon Advisory)" bu heqtiki bir doklatida, xitaydiki bawli shyéshin (GCL-Poly) énérgiye pay kontrol cheklik shirkiti, sherqiy ümid guruhi, dako yéngi énérgiye, shinté énérgiyesi we jinko quyash énérgiyesi qatarliq asasliq quyash énérgiyesi shirketliride mejburiy emgek ishlitish alametliri mewjut, dep körsetken.

"Nyu-york waqit géziti" ning xewer qilishiche, bu shirketler Uyghur élining bezi jayliridin xitay hökümitining yardimi bilen yötkelgen ishchilarni qobul qilghan we ularni xitay we kommunistik partiyesige sadiq qilish meqsitide herbiy uslubta terbiyeligen.

Xewerge qarighanda, doklatta tilgha élin'ghan quyash énérgiyesi shirketliri dunyadiki quyash énérgiyesi mehsulatlirining üchtin bir qismini ishlep chiqiridighan bolup, bularning mehsulatliri amérika we yawropada qollinilidighan quyash énérgiyesi bataréyelirige ishlitilidiken.

Bu shirketlerning köpinchisi "Nyu-york waqit géziti" ning bu heqtiki so'allirigha jawab bermigen bolsimu, emma bularning arisidiki jinko quyash énérgiyesi shirkitining bayanatchisi i'an makkaléb, öz shirkitining mejburiy emgikini ishlitishni qattiq eyibleydighanliqini hemde bu xildiki ishchilarni ishletmeydighanliqini bildürgen.

Xitay hökümitining 2017-yilidin buyan 1.8 Milyondin 3 milyon'ghiche Uyghur qatarliq türkiy milletlerni lagérlargha tashlighanliqi we bularning bir qismini xitaydiki zawut-karxanilargha "Qul ishchi" süpitide yötkewatqanliqi melum bolghan.

Xitay hökümiti teminlesh zenjiride her qandaq shekildiki mejburiy emgek mewjut emeslikini teshwiq qilip kéliwatqan bolsimu, amérika we bashqa gherb elliri Uyghur rayonidiki mejburiy emgek mesilisini eyibleshni barghanséri kücheytken. Tramp hökümiti Uyghurlargha qaritilghan mejburiy emgek qilmishlirida mes'uliyiti bar bir nechche shirket we shexske jaza yürgüzgen we Uyghur éli menbelik paxtilarda ishlepchiqiridighan mehsulatlargha imort cheklimisi élan qilghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet