Бирюсселда уйғур мәҗбурий әмгики тоғрилиқ муһакимә йиғини өткүзүлди

Мюнхендин ихтиярий мухбиримиз әкрәм тәйярлиди
2024.02.16
biryusel-uyghur-mejburiy-emgek-yighin-2 “явропа қуяш енергийәси санаәтчиләр кеңиши” (ESMC)ниң уюштуруши билән өткүзүлгән “тәминләш зәнҗиридики пакизә енергийә вә мәҗбурий әмгәккә қарита дөләтләрниң инкаси” темисидики йиғинда сөзгә чиққанлар. 2024-Йили 15-феврал, бирюссел, белгийә.
RFA/Ekrem

15-Феврал белгийә пайтәхти бирюсселда “явропа қуяш енергийәси санаәтчиләр кеңиши” (ESMC)ниң уюштуруши билән уйғур мәҗбурий әмгики мәсилисигә беғишланған “тәминләш зәнҗиридики пакизә енергийә вә мәҗбурий әмгәккә қарита дөләтләрниң инкаси” дегән темида илмий муһакимә йиғини өткүзүлгән. Мәркизи вашингтондики уйғур һәрикити тәшкилатиниң тәшәббуси билән тәшкилләнгән бу йиғинға биваситә вә тор арқилиқ 130 дин артуқ парламент әзалири, тәтқиқатчилар, қуяш енергийәси мутәхәссислири, карханичилар вә мухбирлар қатнашқан.

“явропа қуяш енергийәси санаәтчиләр кеңиши” тәрипидин тунҗи қетим өткүзүлгән бу йиғинда явропа парламенти әзалиридин райинхард бүтикофер (Reinhard Bütikofer), анна каваззини (Anna Cavazzini), уйғур һәрикити тәшкилатиниң рәиси рошән аббас, америка коммунизим қурбанлири фондиниң тәтқиқатчиси адриян зенз (Adrian Zenz), пакиз енергийә ширкитидин аня ланге (Anja Lange), уйғур мәҗбурий әмгикини ахирлаштуруш бирләшмисидин патрисия каррер (Patricia Carrier) вә “явропа қуяш ениргийәси санаәтчиләр кеңиши” дин йоһан линдаһил (Johan Lindahl) қатарлиқлар нутуқ сөзлигән.

“тәминләш зәнҗиридики пакизә енергийә вә мәҗбурий әмгәккә қарита дөләтләрниң инкаси” темисидики йиғинда “уйғур һәрикити” тәшкилатиниң рәиси рошән аббас ханим доклат бәрмәктә. 2024-Йили 15-феврал, бирюссел, белгийә.
“тәминләш зәнҗиридики пакизә енергийә вә мәҗбурий әмгәккә қарита дөләтләрниң инкаси” темисидики йиғинда “уйғур һәрикити” тәшкилатиниң рәиси рошән аббас ханим доклат бәрмәктә. 2024-Йили 15-феврал, бирюссел, белгийә.
RFA/Ekrem

Бирюсселдин зияритимизни қобул қилған уйғур тәтқиқат мәркизиниң директори абдулһаким идрис әпәндиниң билдүрүшичә, германийәниң BASF ширкити корладин чекинип чиқиш алдида туруватқан, волкисваген үстидин үрүмчидики завутини тақаш чуқанлири әвҗ еливатқан бир мәзгилдә, явропадики қуяш енергийәси ширкәтлириниң мәхсус уйғур мәҗбурий әмгәк тоғрисида бундақ муһим бир йиғинни чақириши уйғурлар үчүн зор әһмийәткә игә икән.

Явропа иттипақи-хитай мунасивәтләр комитетиниң рәиси райинхард бүтикофер йиғинда қилған сөзидә, мәҗбурий әмгәккә селиниватқан уйғурларниң қан-тәри бәдилигә яралған мәһсулатларниң явропа базарлириға киришини чәкләшниң зөрүрийәтлирини тәкитләп өткәндин кейин, “хитай уйғур ирқий қирғинчилиқи вә уйғур мәҗбурий әмгәкини инкар қиливатиду, хитай ялған сөзләватиду, хитай тосқунлуқ қиливатиду, хитай тәтүр тәшвиқатни күчәйтиватиду, хитай диққәтни чечиватиду, әмма пакит бәрибир пакит, хитайниң көз алдимиздила заманивий қуллуқ җинайәтлирини садир қиливатқанлиқи әсли пакиттур” дегәнләрни тилға алған.

“тәминләш зәнҗиридики пакизә енергийә вә мәҗбурий әмгәккә қарита дөләтләрниң инкаси” темисидики йиғинда хатирә сүрәт. 2024-Йили 15-феврал, бирюссел, белгийә.
“тәминләш зәнҗиридики пакизә енергийә вә мәҗбурий әмгәккә қарита дөләтләрниң инкаси” темисидики йиғинда хатирә сүрәт. 2024-Йили 15-феврал, бирюссел, белгийә.
RFA/Ekrem

Рошән аббас ханим өз сөзидә, хитай һакимийитиниң уйғурдин ибарәт бир милләт үстидин ирқий қирғинчилиқ йүргүзүпла қалмай, униңдин қул сүпитидә пайдилиниватқанлиқини, уйғурларниң қан-тәри бәдилигә вуҗудқа чиққан мәһсулатларни явропа базарлирида сетиватқанлиқи мисаллири билән оттуриға қойған. У бирюсселдин зияритимизни қобул қилғанда, “явропа қуяш енергийәси санаәтчиләр кеңиши” арқилиқ бундақ бир йиғинни тәшкилләштики мәқсәтниң уйғур мәҗбурий әмгики мәһсулатлириниң явропа базарлириға киришини чәкләштин ибарәт икәнликини илгири сүрди. У сөзидә, явропа ширкәтлиригә “силәрниң еришиватқиниңлар пакизә енергийә әмәс, силәр бир милләтниң қениға шерик болуватисиләр” дегәнни билдүрүшниң зөрүрлүкини тәкитлиди.

Доктор адриян зенз йиғинда қилған сөзидә, уйғур мәҗбурий әмгикигә қурбан болуватқан уйғурларниң нә ишләш-ишлимәслик һәқлириниң йоқлуқи, уларни дөләтниң мәҗбурий йиғип санаәт завутлириға тәқсимләп ишлитиватқанлиқи, уларниң иш орнидин айрилалмайдиғанлиқи, иш һәққини тәләп қилалмайдиғанлиқи қатарлиқ бир талай мәсилиләрни баян қилип өткән.

Уйғур һәрикити тәшкилатиниң программа мудири сәркан таш әпәндиниң билдүрүшичә, “явропа қуяш енергийиси санаәтчиләр кеңиши” (ESMC)ниң уюштуруши билән өткүзүлгән “тәминләш зәнҗиридики пакизә енергийә вә мәҗбурий әмгәккә қарита дөләтләрниң инкаси” намлиқ бу йиғин явропа санаәтчилиригә уйғур мәҗбурий әмгики тоғрисида муһим бир дәрс болған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.