Mejburiy emgek meydanida otta köyüp ölgen nebijan rozining jesiti jem'iyettin xupiyane halda yerlikke qoyulghan

Muxbirimiz shöhret hoshur
2021-02-17
Share
Mejburiy emgek meydanida otta köyüp ölgen nebijan rozining jesiti jem'iyettin xupiyane halda yerlikke qoyulghan Xitay hökümitining lagérdiki Uyghurlarni mejburiy emgekke sélish qilmishigha toghriliq ishlen'gen karton.
Yettesu

Bultur toqquzaqtin aqsugha paxta térishqa barghan 16 yashliq oqughuchi nebijan rozining ot kétish weqeside jan üzgenliki heqqide ilgirilep élip barghan éniqlashlirimizda, da'irilerning mezkur weqeni toqquzaqliq ahalilerdin mexpiy tutushqa tirishqanliqi we bu sewebtin, jesetni yerlikke jem'iyettin xupiyane halda qoyghanliqi we ölüm xewirining lagérdiki dadisighimu uqturulmighanliqi melum boldi. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Ilgirilep ashkarilinishiche, mezkur ot kétish weqesi yüz bergen mejburiy emgek meydanigha eslide toqquzaqtin 2000che oqughuchi, oqutquchi we ishchi-xizmetchi ewetilgen bolup, weqede ölgen 16 yashliq nebijan rozi bilen birlikte 32 oqughuchi bir yataq yaki kepide yatqaniken. Weqeni tekshürgen da'iriler, buni tasaddipiy yüz bergen bir teb'iy apet hadisisi dep békitken. Yataq yaki kepining bixeterlik tedbirlirini muwapiq orunlashturmighan mes'ul xadimlarni sürüshte qilmighan. Melum bolushiche da'iriler weqeni mumkin qeder shawqunsiz birterep qilishqa tirishqan. Weqe toqquzaqtiki az bir qisim alaqidar idare-jem'iyet xadimliri we ölgüchining kentidiki partiye ezalirigha uqturulghan bolsimu, toqquzaqtin aqsugha ewetilgen 2000gha yéqin oqughuchining ata-anisigha bildürülmigen؛ nebijanning mehelle koyliri, hetta lagérdiki dadisi rozi toxtighimu bildürülmigen. Alaqidar bir kent mudiri, ahalilerning perzentlirini her yili paxta térishqa ewetishke qarita burundinla naraziliqi barliqi, shunga "Selbiy teshwiqat" qa matériyal bolup qalmasliq üchün, ölüm xewirining ahalilerge resmiy shekilde uqturulmighanliqini ashkarilidi.

Chet'elde yashawatqan öz ismini ashkarilashni xalimaydighan toqquzaqliq muhajirning inkas qilishiche, nebijan rozining ölüm xewiri peqet apisighila bildürülgen, uning lagérdiki dadisi rozi toxtigha bildürülmigen. Jeset peqet alaqidar mes'ul kadir we saqchilar teripidin xupiyane halda yerlikige qoyulghan. Gerche uning tupraq béshi we a'ilisining qorusi lagérda ölgenlerdikidek qoralliq saqchilar teripidin nazaret qilinmighan bolsimu, emma ma'arip idarisi, ayallar birleshmisi we birliksep xadimliridin teshkillen'gen 4 kishi mezkur a'ilige bir heptiche "Hemrah" bolup, a'ile ezalirining naraziliqini basqan we ehwalning jem'iyetke bek keng tarqilip ketmesliki üchün a'ilige idiyewiy xizmet ishligen.

Éniqlashlirimiz dawamida, alaqidar xadimlar, tutqun rozi toxtining oghlining ölümi weqesi seweblik a'ilisi bilen körüshtürülgen-körüshtürülmigenliki heqqidiki so'alimizgha jawab bermidi. Bu heqte öz perizini bayan qilghan lagér shahiti zumret dawut, Uyghur rayonining nöwettiki weziyitide, musibetlik a'ile ezalirini öz'ara uchrashturushtek, bundaq bir eqelliy insaniyliqni kütüshning mümkinsizlikini éytti؛ u bu mümkinsizlikke da'irilerning Uyghurlargha tutiwatqan düshmenlik pozitsiyesidin bashqa, tutqunlarning köplüki we a'ilisidin uzaq jaylargha qamalghanliqidek ré'alliqningmu buninggha imkan bermeydighanliqini otturigha qoydi.

Yuqirida aqsugha mejburiy emgekke ewetilgen toqquzaqliq oqughuchilardin nebijan rozining jesitining jem'iyettin xupiyane halda depne qilin'ghanliqi heqqide anglitish berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet