Xitay zawutlirigha mejburiy ishlemchilikke yötkiliwatqan Uyghur qiz-oghullirining barghanche yashlishiwatqanliqi melum bolmaqta

Muxbirimiz méhriban
2022-03-25
Share
Xitay zawutlirigha mejburiy ishlemchilikke yötkiliwatqan Uyghur qiz-oghullirining barghanche yashlishiwatqanliqi melum bolmaqta Xitay xojayinlar teripidin xitay ölkiliridiki zawut-fabrikilargha ishlemchilikke yötkiliwatqan Uyghur emgek küchliri. 2021-Yili iyun.
Zumret Dawut teminligen

Yéqindin buyan ijtima'iy taratqularda xitay xojayinlar teripidin xitay ölkiliridiki zuwut-fabrikilargha ishlemchilikke yötkiliwatqan Uyghur emgek küchliri heqqidiki élanlar we sin filimliri dawamliq köpeymekte.

Mezkur sin filimliride xitay ölkilirige kolléktip élip méngilghan Uyghur emgek küchlirining zor köpchilikining yashlar ikenliki, shuning bilen bir waqitta xitay zawutlirida ishlewatqan Uyghur ishlemchilirining zor qisminingmu hetta emdila ottura mekteptin ayrilghan Uyghur qiz-oghulliri ikenliki ashkara bolmaqta.

Lagér shahiti zumret dawut xanim, bu xildiki sin filimlirini izdep tépip, ijtima'iy taratqulargha üzlüksiz yollap kéliwatqan Uyghur pa'aliyetchilirining biridur.

Zumret dawut xanim bu heqte ziyaritimizni qobul qildi. U yéqinda özining xitayning ündidar, tik-tok qatarliq ijtima'iy taratqulirida mushu xildiki élan we sin filimlirini köp körgenlikini, bir qisim xitaylarning ichkiy ölkilerdiki xitay shirketlirini Uyghur ishlemchiliri bilen teminlesh heqqide mexsus élanlarni tarqitiwatqanliqini bayan qildi.

Uyghur yashlirini xitay ölkiliridiki zawut-fabrikilargha ishlemchilikke yötkesh üchün chiqirilghan chaqiriq. 2021-Yili iyun.
Uyghur yashlirini xitay ölkiliridiki zawut-fabrikilargha ishlemchilikke yötkesh üchün chiqirilghan chaqiriq. 2021-Yili iyun.
Zumret Dawut teminligen

Uning bildürüshiche, bu élanlarda xitay zawut-fabrikilirigha ishlemchilikke tonushturulghan yashlarning 18 yashtin 23 yashqiche bolghan ariliqtiki Uyghur oqughuchilar ikenliki, hetta ularning zor bir qismining qizlar ikenliki yézilghan iken.

Zumret dawut xanim yene özi xitay torliridin bayqap yollighan Uyghur ishlemchiliri heqqidiki sin filimliride, yash Uyghur mejburiy emgek küchlirining türlük xitay shirketliride éghir emgek meshghulatigha sélinipla qalmastin, belki yene ulargha xitay kompartiyesining qizil teshwiqati singdürülüp, méngisining yuyuluwatqanliqini bildürdi.

Zumret dawut xanim nöwette “Uyghur yashlirini ishqa tonushturush” namidiki élanlarning xitay torlirida barghanche köpiyiwatqanliqini bildürdi. Uning tekitlishiche, hazir bu ehwal yerlik hökümet, xitay tijaretchiliri we zawutlarni bir gewde qilghan tijaret torini shekillendürgen iken.

Uyghur mejburiy emgek küchliri heqqidiki bu xil sin filimliri nöwette chet ellerdiki Uyghurlar arisidimu küchlük inkas qozghimaqta. Gérmaniyediki musteqil analizchi enwer exmet ependining qarishiche, 18 yashtin 23 yashqiche bolghan Uyghur yashlirining asasliq yötkesh nishani qilinishi, bolupmu zor türkümdiki Uyghur qizlirining “Xizmetke orunlashturush” namida xitay ölke-sheherlirige yötkilishi, xitayning “Uyghurlarni xitaylashturush we éritip tügitish” istratégiyesining muhim bir parchisi iken.

Zumret dawut xanim, ana yurtidin ayrilip xitay zawutlirida ishleshke mejbur boluwatqan yash Uyghur qiz-oghullirining yurtigha qaytip kétish imkaniyitiningmu yoqliqini bildürdi.

Zumret xanimni eng endishige séliwatqini muhebbetlishish we nikahlinish yéshidiki bu yash Uyghur qizlirining xitay erliri bilen nikahlinishqa mejbur bolushi we uningdin kélip chiqidighan mölcherligüsiz yaman aqiwetler iken.

Amérika bashchiliqidiki bir qisim gherb démokratik döletlirining parlaméntliri, Uyghurlarning pütkül millet gewdisi bilen “Irqiy qirghinchiliq” qa uchrawatqanliqini, xitay hökümitining yene Uyghurlar asas qilghan yerlik musulman xelqlerge qarita “Insaniyetke qarshi jinayet” ötküziwatqanliqini étirap qilghan idi. Shuning bilen bir waqitta amérika hökümiti yene xitay zawutliri we shirketlirining Uyghurlarni mejburiy emgekke sélip ishlepchiqarghan mehsulatlirigha qarita jaza élan qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet