Jyangsuda mejburiy emgekke qarshi chiqqan günpolat témirqanning chapchaldiki lagérda 7 ay jazalan'ghanliqi ashkarilandi

Muxbirimiz shöhret hoshur
2020-04-03
Élxet
Pikir
Share
Print
Jyangsuda mejburiy emgekke qarshi chiqqan, chapchaldiki lagérda 7 ay jazalan'ghan günpolat témirqan.
Jyangsuda mejburiy emgekke qarshi chiqqan, chapchaldiki lagérda 7 ay jazalan'ghan günpolat témirqan.
RFA

Qazaqistandiki lagér shahiti baxt'alining ashkarilishiche, 2017 ‏-yilining béshida chapchalning sekkizsumbul yézisidin köpinchisi qazaqlardin teshkillen'gen 40 neper yash jyangsu ölkisige ekétilgen we mejburi emgekke sélin'ghan. Bulardin günpolat témirqan isimlik bir yash mejburiy we heqsiz emgekke qarshi turghanliqi üchün chapchalgha qayturup ekélinip, bir yil lagérda jazalan'ghan. Muxbirimizning téléfonini qobul qilghan chapchal nahiye sekkizsumbul yézisidiki alaqidar xadimlar bu ehwalning rastliqini inkar qilalmidi.

Lagér shahiti baxt'alining bayan qilishiche, 2017‏-yilining béshida chapchalning sekkizsumbul yézisidin jyangsu ölkisidiki bir kiyim-kéchek zawutigha élip bérilghan qazaq we Uyghur ishchilargha 4-5 ayche waqit ötken bolsimu ma'ash bérilmigen. Eslide yuqiri ma'ashliq xizmet wedisi bilen élip bérilghan bu kishiler ish heqqini sürüshte qilghan waqtida jawabsiz qaldurulghan we yaki til-haqaretke uchrighan.

Chet yaqidiki bir zawutta zawut qorusigha solan'ghan halette mejburi ishqa sélin'ghan bu kishiler axiri zawut rehberlirige we özini nazaret qiliwatqan qarawullargha naraziliq bildürgen. Naraziliq bildürgenlerdin biri günpolat térmirqan isimlik qazaq yash bolup, uning bu qilmishi zawut bashliqliri teripidin chapchaldiki alaqidar orunlargha "Térrorluqqa urunush" dep doklat qilin'ghan. Netijide günpolat xitay saqchiliridin teripidin jyangsudin qayturup ekélinip, chapchal 3‏-ottura mektep lagérida 7 ay jazalan'ghan.

Téléfonimizni qobul qilghan chapchal nahiye sekkizsumbul yéziliq saqchi xadimi özining günpolat térmirqanni bir qétim soraq qilghanliqini ashkarilidi. Emma u günpolatni néme üchün soraqqa tartqanliqi heqqidiki so'alimizgha jawab bérishni ret qildi. U yene sekkizsumbuldin jyangsugha ekétilgen 40 kishining nöwettiki ehwali heqqidimu jawab bérishtin özini tartti. Emma u sekkizsumbuldin 40 kishining jyangsugha ekitilgenlikini inkar qilmidi.

Baxt'ali chapchalda lagérda we lagér sirtida körgen-anglighanlirigha asasen xitay ölkilirige élip méngilghan ishchilarning asasen aldap élip bériliwatqanliqi, élip méngilghanlar arisida ishsizlarla emes, ish-oqiti yaxshi kishilerningmu barliqi, chünki da'iriler xitay ölkilirige adem yolgha sélishta aldash tedbiri kargha kelmise, lagérni isharet qilghan halda tehdit séliwatqanliqini ilgiri sürdi.

Baxt'alining bayanliridin melum bolushiche, zawutqa qamalghan Uyghur we qazaq ishchilar ishleshni ret qilghan ehwal astida zawut-séx bashliqliri yaki yalliwalghan atalmish bixeterlik küchlirining tayaq-toqmaqlirigha duch kelgen.

Baxt'alining bayanliridin chapchaldiki yerlik da'irilerning xitay ölkilirige yollan'ghan ishchilarning körüwatqan künidin toluq xewerdar ikenliki, ularning peqet xitay ölkilirige ishchi yollashni siyasiy wezipe süpitide ijra qiliwatqanliqi melum.

Téléfonimizni qobul qilghan sekkizsumbul yézisidiki bir edliye xadimi jyangsudin qayturup kélin'gen günpolat témirqanni tonuydighanliqi, u jyangsugha ekitilishtin burun uning bilen taghda bir qétim uchrashqanliqini tilgha aldi. Uning déyishiche, sekkizsumbuldin jyangsugha ekétilgen 40 kishining ehwali heqqide yéziliq hökümette bir qétim resmiy yighin échilghan. Yighinda bu 40 kishining mezkur zawutqa könelmesliki we ular ichidin bir türküm kishilerning zawut rehberlirige naraziliq bildürüshi bu yézining yüz-abruyigha selbiy tesir körsitish dep qaralghan iken.

Yuqirida chapchal nahiye sekkizsumbul yézisidin 40 etrapida kishining jiyangsugha mejburiy emgekke ekétilgenliki we ulardin ehwalgha naraziliq bildürgen günpolat témirqanning 7 ay lagérda jazalan'ghanliqi heqqide melumat berduq.

Toluq bet