Америка таможна вә чегра қоғдаш идариси иҗраийә ярдәмчи директори бренда симис ханим соаллиримизға җаваб бәрди (2)

Мухбиримиз гүлчеһрә
2020-07-10
Елхәт
Пикир
Share
Принт
Уйғур районидики хитай лагер тутқунлириниң чачлири вә яки лагердикиләрни мәҗбурий әмгәккә селиш арқилиқ ишләп чиқирилған ялған чач. 2020-Йили 1-июл, ню-йорк.
Уйғур районидики хитай лагер тутқунлириниң чачлири вә яки лагердикиләрни мәҗбурий әмгәккә селиш арқилиқ ишләп чиқирилған ялған чач. 2020-Йили 1-июл, ню-йорк.
AP

Америка тармақлири уйғур дияридин експорт қилинған барлиқ мәһсулатларға нишанлиқ тәкшүрүшни күчәйтиду

Америка таможна вә чегра қоғдаш идариси-1 июл ню-йорк портида лоп наһийәси «мейшин чач мәһсулатлири чәклик ширкити» ишләпчиқарған җәмий 13 тонна, 800 миң америка доллири қиммитидики адәм чечи қошулған мәһсулатларни қолға чүшүрди. Америка таможна вә чегра қоғдаш идариси иҗраийә ярдәмчи директори бренда симис ханим мухбиримиз гүлчеһрәниң зияритини қобул қилип, бу чачлар үстидин лабураториийәлик тәкшүрүши елип берилидиғанлиқини билдүргән. Нөвәттә мәзкур мәхсус зиярәт хатирисиниң давами диққтиңларда болсун. 

Соал: бренда симис ханим, америка таможна вә чегра қоғдаш идариси қолға чүшүргән бу чачларниң асасән мейшин маркилиқ чач буюмлири икәнлики вә бу чачлар үстидин д н а тәкшүрүшини өз ичигә алған лабораторийәлик тәкшүрүши елип баридиғанлиқини ейтип өттиңиз. 

Кейинки қәдәмдә уйғур дияридин импорт қилинған чачтин башқа йәнә қайси хил мәһсулатлар нишанлиниду?

Җаваб: билгиниңиздәк, биз илгири 2019-йили сентәбирдә шинҗаңда ишләпчиқирилған мәһсулатқа мунасивәтлик айрим-айрим 3 тутуп қелиш буйруқи чиқарғанидуқ. Бу буйруқларниң тунҗиси 2019-йили сентәбирдә, кийим-кечәкләргә мунасивәтлик иди. Байқишимизға қариғанда, адәттики ишләпчиқириш санаәт мәһсулатлири, йен тәннәрхи төвән кийим-кечәк вә електронлуқ буюмлар күп салмақни игиләйду. Бәзи йемәк-ичмәк, қисмән деһқанчилиқ вә шинҗаңға биваситә бағлиниши болмиған кан мәһсулатлири қатарлиқлар көпрәк учрайду. 

Мушу саһәләрдә давамлиқ қуллуқ әмгәккә мунасивәтлик мәсилиләрни учритимиз. Шуңа шинҗаңға мунасивәтлик бу саһәләрни изчил көзитимиз. Хитайниң бу районидин експорт қилинидиған мәһсулатларниң йәниму илгирилигән һалда хәтәр пәйда қилишиниң алдини елиш үчүн нуқтилиқ тәкшүрүшни давамлаштуримиз. 

Соал: тәтқиқатчилардин доктор адриан зенз шинҗаңдин кәлгән барлиқ мәһсулатларниң мәҗбурий әмгәк билән ишләнгәнликини, шуңа американиң шинҗаңдин һәр қандақ нәрсини импорт қилишни чәклиши керәкликини оттуриға қойди. Буниңға қандақ қарайсиз?

Җаваб: бизниң қанун иҗра қилиш орунлиримиз биздин мундақ икки ишта толиму конкрет болушимизни шәрт қилиду. Буниң бири қуллуқ әмгәк билән ишләнгән һәр қандақ мәһсулатларниң америкаға импорт қилиниши, яки импорт қилиниш еһтималлиқи болған бу хилдики мәһсулатлар үстидин тутуп қелиш буйруқи чиқириш үчүн у мәһсулатлар портқа кәлгән һаман бу мәһсулатларниң тәминләш зәнҗирини ениқлап чиқиш. Бизниң қанун органлиримиз биздин бу йүкләр һәққидә тәминлигән материяллиримизниң ениқ болушини, сәвәбләрниң пүтүнләй қайил қиларлиқ болмисиму, тутуп қелиш өлчәмлиригә уйғун келишини тәләп қилиду. 

Соал: ундақта уйғур диярида қуллуқ әмгикидә ишләнгән експорт буюмлириниң америкаға киришиниң алдини елишта, америка таможна вә чегра қоғдаш тармақлириниң қайси хилдики пакит яки учурларниң қиммити болиду ?

Җаваб: адәттә, мәҗбурий әмгәк һәққидә тәкшүрүш елип барғинимизда, әң тоғра учурға америка таможна вә чегра қоғдаш хадимлири ишләпчиқириш орунлириға қарита биваситә елип барған тәкшүрүш нәтиҗисидин кәлгән болиду. Униңдин сирт, мәҗбурий әмгәк шәртигә чүшидиған вәзийәткә қатнашқан шәхсләрниң гуваһлиқиму муһим рол ойнайду. Әмма хитайдики бу әһвалға кәлгәндә хадимлиримиз биваситә уйғур райондики завут-карханиларни биваситә тәкшүрүш имканийити болмиғанлиқи үчүн, биз кишилик һоқуқ органлири һөкүмәтсиз тәшкилатлар бу һәқтә топлиған гуваһлиқларға тайинимиз һәмдә биз йәнә тәкшүрүш ахбарати һәмдә шинҗаңға мунасивәтлик сиясәт бәлгиләш яки вәкиллик қилиш нопузиға игә кишиләр ашкариливәткән учурлириғиму тайинимиз. 

Бу йәрдә симис ханим бир муһим нуқтини тәкитләп өтүшни тоғра тапқанлиқини билдүрүп мундақ деди:

«Бир нәрсини тәкитлишим зөрүрки, биз америка сода җәмийәтлириниң бу мәсилигә арилишишини халаймиз. Биз йәнә, америкаға мал йоллайдиған һәммәйләнниң өз мәҗбурийни толуқ җари қилишини халаймиз. Биз уларниң бу мәсулийитини тонуп йетишни вә җиддий муамилә қилишини үмид қилимиз.

Қанун иҗра қилиш органлиримизниң диққити америкаға йүк тошуп келидиған ширкәтләрниңму өзлири америкаға елип келиватқан йүкләрниң мәҗбурий әмгәктин мустәсна икәнликини капаләткә игә қилишиға мәркәзләшкән.

Бизниң хизмитимиз йәнә, бу ширкәтләрниң мәһсулатлар биваситә болмиған тәқдирдиму, тәминләш зәнҗириниң үчинчи, төтинчи нуқтилирида болсиму мәҗбурий әмгәккә четилип қелиш һадисиси көрүлүшкә болмайдиғанлиқидин ибарәт шәртлиримизни толуқ чүшинишини капаләткә игә қилиш.

Иккинчи тәкитләйдиғиним, әгәрдә шәхс, тәшкилат яки органларда америка тәминләш зәнҗиридики мәһсулатларниң мәҗбурий әмгәккә четилидиғанлиқиға аит учурлар болса, буларни бизгә йоллишини хушаллиқ билән қариши алимиз. Бу учурларни бизгә биваситә йәткүзсиму яки тор бетимиздики мунасивәтлик учур йәткүзүш қаналлири арқилиқ йәткүзсиму болиду. Бу мәсилигә тақабил туруш һәммәйләнниң ортақ мәсулийити».

Мухбир: симис ханим сизниң әркин асия радийомиз зияритини қобул қилғиниңизға тәшәккүр билдүримән. 

Симис ханим: мәнму сиз вә әркин асия радийосиниң бу мәсилидә көплигән хәвәрләрни дәлилләп чиқиватқиниңларни билимиз. Бу биз нуқтилиқ диққәт қиливатқан мәсилиниң бири шундақла узундин буян силәрниң бизни бу мәсилидә муһим пакитлиқ учурлар билән тәминләп келиватқанлиқиңларға алаһидә тәшәккүр билдүримән. 

Америка таможна вә чегра қоғдаш идариси17-июн, пүтүн портларға «хотән хавлин чач буюмлири ширкити» ишләп чиқарған импорт мәһсулатларни тутуп қелиш буйруқи чүшүргәниди. 1-Июл күни хотән лоптики «мейшин чач буюмлири ширкити» дә ишләнгән 13 тонна келидиған адәм чечини ню-йорк портида қолға чүшүрүп мусадирә қилди. 

Мәҗбурий әмгәк бәдилигә ишләпчиқирилғанлиқи сәвәблик тутуп қелинған «мейшин» чач буюмлири үстидин, америка тармақлириниң д н а ни өз ичигә алған лабораторийәлик тәкшүрүш елип баридиғанлиқи мәлум.

Пикирләр (0)
Share
Толуқ бәт