Америка уйғур елидики мәҗбурий әмгәккә бағланған қуяш енергийә тахтилирини тутушқа башлиған

Мухбиримиз мәмәтҗан җүмә
2021-08-29
Share
Америка һөкүмити уйғур мәҗбурий әмгикигә четишлиқ болған киримнейлиқ мәһсулатларға қарита тутуп қилиш буйруқи чиқарди Бир ишчи фотоволтлуқ санаәт бағчисида қуяш енергийәсини тазилаш машиниси билән мәшғулат қиливатқан көрүнүш. 2018-Йили 22-өктәбир, қумул.
REUTERS

Америка таможна даирилири уйғур елидики мәҗбурий әмгәккә бағланған хитай ширкәтлириниң қуяш енергийә тахтилири импортини тутуп қелишқа башлиған.

"вашингтон почтиси" ниң хәвәр қилишичә, америка таможна әмәлдарлири йеқинда америка таможна вә чегра қоғдаш идариси тәрипидин чирқириған чәкләш буйруқиға асасән хитайдин келидиған бир нәччә ширкәтниң қуяш енергийә тахтисини чәкләшни йолға қойған.

Хәвәрдә мунасивәтлик кәспий хадимлар вә анализчиларниң баянлиридин нәқил елип көрситишичә, йеқинқи бир нәччә һәптә ичидә аз дегәндә үч хитай ширкитиниң қуяш енергийә тахтилири нишан қилинған икән.

Америка таможна вә чегра қоғдаш идарисиниң баянатчиси "вашингтон почтиси" ға йоллиған електронлуқ хәттә импорт қилишни чәкләш буйруқиға асасән өз идарисиниң бир қатар ширкитиниң қуяш енергийә тахтиси мәһсулатлирини тутуп қалғанлиқини дәлиллигән.

Америка таможна вә чегра қоғдаш идариси бу йил июнда қуяш енергийәси тахтисида ишлитилидиған хам әшя ишләпчиқиридиған хошин кремний ширкитигә чәклимә қойған. Улар әйни чағда, уйғур районида завути бар хошин ширкитиниң мәҗбурий әмгәк ишлитидиғанлиқиға даир учурлар барлиқини билдүргән.

Хәвәргә қариғанда, "вашингтон почтиси" гезити вә кишилик һоқуқ тәтқиқатчилири өз тәтқиқатлириға асасән хошин ширкитиниң уйғур вә башқа аз санлиқ милләтләрни нишан қилған мәҗбурий әмгәк программилириға четилидиғанлиқи дәлилләнгән.

Мәлум болушичә, хитай ширкәтлири йәр шари қуяш енергийә саһәсини монопол қиливалған болуп, бу ширкәтләрниң нурғунлири уйғур елигә җайлашқан хошинниң хам әшясини ишлитидикән.

Америка таможна вә чегра қоғдаш идарисини назарәт қилидиған америка ана вәтән хәвпсизлик идарисиниң башлиқи алехандро майоркас бу йил июнда чиқирилған импорт қилишни чәкләш қарарини елан қилиш мунасивити билән қилған сөзидә, америкиниң қайта һасил болидиған енергийәгә қурулушиға алаһидә әһмийәт беридиғанлиқини ейтқан вә: "әмма, қәйәрдә мәвҗут болушидин қәтий нәзәр, биз мәҗбурий әмгәкни йилтизидин қомуруп ташлаймиз, бу интайин муһим," дегән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт