"ню-йорк мода кийим-кечәк һәптилики" кишиләрниң диққитини уйғур мәҗбурий әмгикигә қаратти

Мухбиримиз нуриман
2021-09-09
Share
Zara, Burberry вә Hugo Boss қатарлиқ даңлиқ маркиларни мәҗбурий әмгәкни ишләтмәсликкә капаләтлик қилишқа чақириқ қилиш намайишидин көрүнүш. 2021-Йили 9-сентәбир, ню-йоркта.
Social Media

9-Сентәбир күни уйғур һәрикити тәшкилати, әркинлик бирләшмиси вә уйғур кишилик һоқуқ қурулуши қатарлиқ алтә тәшкилат бирликтә нию-йоркта зара(Zara), бербәри(Burberry) вә хюго бос(Hugo Boss) қатарлиқ даңлиқ маркиларни мәҗбурий әмгәкни ишләтмәсликкә капаләтлик қилишқа чақириқ қилиш намайиши өткүзгән. "2021-йиллиқ ню-йорк мода кийим-кечәк һәптилики" 8-сентәбир башланған болуп, кишилик һоқуқ тәшкилатлири көргәзмә мәйданиниң сиртида бу намайишни орунлаштурған.

Паалийәттә кишилик һоқуқ паалийәтчилири нутуқ сөзләп, уйғурларниң нөвәттики әһвали, хитай һакимийитиниң системилиқ һалда уйғурларни мәҗбурий әмгәккә селиватқанлиқи һәққидә мәлумат бәргән. Намайишчилар кийгән қара кийимлири вә қоллирида көтүривалған "уйғур мәҗбурий әмгикини чәкләш вә тохтитиш" мәзмунидики һәрхил пилакатлири арқилиқ кишиләрниң диққитини уйғур мәҗбурий әмгәк мәсилисигә тартқан.

Zara, Burberry вә Hugo Boss қатарлиқ даңлиқ маркиларни мәҗбурий әмгәкни ишләтмәсликкә капаләтлик қилишқа чақириқ қилиш намайишидин көрүнүш. 2021-Йили 9-сентәбир, ню-йоркта.
Zara, Burberry вә Hugo Boss қатарлиқ даңлиқ маркиларни мәҗбурий әмгәкни ишләтмәсликкә капаләтлик қилишқа чақириқ қилиш намайишидин көрүнүш. 2021-Йили 9-сентәбир, ню-йоркта.

Қул әмгикигә қарши дунядики әң чоң тәшкилат болған "әркинлик бирләшмиси" җәмийити бу паалийәтниң асаслиқ тәшкиллигүчилиридин бири болуп, бу җәмийәтниң юқири дәриҗилик тәшвиқат хадими кериста беснауз ханим намайиш мәйданида туруп телефун зияритимизни қобул қлди. У бу намайиш һәққидә мундақ деди: "бу намайиш асаслиқ мәқсити мода саһәсидикиләрни мәҗбурий әмгикни ишләтмәсликкә капаләтлик қилишқа чақириқ қилиштур. Дунядики пахта мәһсулатлириниң 20 пирсәнттин көпрәки уйғур районидин кәлгән болғачқа, кийим-кечәк вә тоқумичилиқ санаити уйғур мәҗбурий әмгикигә четишлиқ. Хитайда зәнҗирсиман тармақлири болған нурғунлиған кийим-кечәк ширкәтлириниң уйғур мәҗбурий әмгикини ишлтиш еһтималлиқи юқири. Шуңа у ширкәтләр уйғур мәҗбурий әмгикини ишләтмигәнлики, замавниви қуллуқ арқилиқ зулумға учраватқанларниң әмгикидин пайдиланмиғанлиқини дуняға көрситиши керәк. Шуниң үчүн бу намайишни өткүздуқ."

Zara, Burberry вә Hugo Boss қатарлиқ даңлиқ маркиларни мәҗбурий әмгәкни ишләтмәсликкә капаләтлик қилишқа чақириқ қилиш намайишидин көрүнүш. 2021-Йили 9-сентәбир, ню-йоркта.

У йәнә мундақ деди: "зара, бербәри, хюго бос, юникло, найки қатарлиқ чоң маркилар мәҗбурий әмгәктин пайдилиниду. Шуңа улар зәнҗирсиман ширкәтлиридә ишләйдиған ишчилириға көп пул хәҗлимәйду. Лекин улар йилиға милйон доллар пайда алиду. Шуңа улар чоқум өз мәһсулатлириниң мәҗбурий әмгәкниң бир қисми әмәсликини испатлаш үчүн бир иш қилиши керәк."

Мәлум болушичә, хитай һөкүмити 2017-йили башланған чоң тутқун билән тәң бир тәрәптин уйғур деһқанлирини "ешинчә әмгәк күчи" намида башқа җайларға йөткисә, йәнә бир тәрәптин "җайида ишқа орунлаштуруш" намида йеза-кәтләргә кархананиларни қуруп, лагер сиртида қалғанларни бу карханиларда ишләшкә мәҗбурлиған.

‍Өткән йили найке, юникло, H&N яки адидасни ‍өз ичигә алған бир қанчә даңлиқ хәлқара маркилар баянат елан қилип, "шинҗаң пахтиси" ни ишләтмәйдиғанлиқини җакарлап, хитайниң байқут қилишиға учриған, һәтта бәзи ширкәтләр шу сәвәбтин баянатини қайтуривалған иди. Униңдин башқа йәнә франсийә агентлиқиниң хәвәр қилишичә, бу йил 4-айда фирансийәдики бир сот мәһкимиси индитекис, зара, юникло вә франсийәниң даңлиқ кийим-кечәк гуруһи болған SMCP һәмдә даңлиқ аяқ кийим ширкити скәчерни "шинҗаң пахтиси" ни яки мәҗбурий әмгәк күчлирини ишләткән-ишләтмигәнликини тәкшүрүшкә башлиған.

Кериста беснауз ханим мәҗбурий әмгәкни тохтитиш үчүн муштәри болуш сүпити билән һәр бир кишиниң мәсулийити барлиқини тәкитлиди, у йәнә мундақ деди: "‹әркинлик бирләшмиси' мәҗбурий әмгәкни тохтитиш кометитниң бир әзаси. Бизниң мода дунясидики маркиларға беридиған аддий учуримиз шуки, мәҗбурий әмгәк мәсилисигә җиддий қарап, мәҗбурий әмгәккә қарши туруш үчүн бир иш қилиши керәк. Йәни бизниң мәҗбурий әмгәкни тохтитиш чақириқимизға аваз қошиши керәк."

У йәнә кейинки пиланлири һәққидә тохтилип мундақ деди: "ню-йорктики намайишимиз түгиди. Лекин өктәбирниң башлирида дуня уйғур қурултийи вә башқа уйғур тәшкилатлар бирликтә парижда паалийитимизни давам қилимиз. Париждики паалийитимиздә асаслиқи ‹зара' ни нишан қилимиз."

Өткән йили америка авам палата әзаси җим микговерн билән кеңәш палата әзаси марку рубийо тәрипидин "уйғур мәҗбурий әмгикиниң алдини елиш қанун лайиһәси" оттуриға қоюлған болуп, өткән йили 9-айда америка авам палатасида 3 кә қарши 406 аваз билән мақулланған. Нөвәттә бу қанун лайиһәси кеңәш палатасиниң мақуллишини күтүп турмақтикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт