Хитай һөкүмити тәшвиқат аппаратлирини ишқа селип пахта мәһсулатлиридики мәҗбурий әмгәкни инкар қилишқа урунмақта

Мухбиримиз меһрибан
2021-09-09
Share
Хитай уйғурларни мәҗбурий пахта теришқа салмақта!
Yettesu

"тәңритағ тори" ниң 8-сентәбир күнидики хәвиридә дейилишичә, 7-сентәбир күни уйғур аптоном районлуқ һөкүмәт мәхсус ахбарат елан қилиш йиғини ечип, пахта мәһсулатлирини ишләпчиқириштики мәҗбурий әмгәкни инкар қилған.

Хәвәрдин мәлум болушичә, мәзкур ахбарат елан қилиш йиғинда уйғур аптонум райониниң пахта ишләпчиқириш вә тоқумучилиқ саһәсидики ширкәт хоҗайинлири вә шәхсләрдин тәркиб тапқан 7 нәпәр аталмиш "гуваһчи" сөзгә чиққан.

Улар бирдәк америка башчилиқидики хитайға қарши ғәрб дөләтлириниң "мәҗбури әмгәк" дегәнни ойдуруп чиқирип, шинҗаңниң пахта мәһсулатлириға қара сүркәватқанлиқи вә шинҗаңниң пахта игиликини зиянға учритишқа уруниватқанлиқи һәққидә шикайәт қилған.

Йиғин риясәтчиси ху җичүн "йеқинқи бир мәзгилдә америка вә ғәрбтики хитайға қарши күчләр шинҗаңдики пахта мәһсулатлири ‹мәҗбури әмгәкниң мәһсули' дегән ялғанни ойдуруп чиқарди. Бу шинҗаң пахта мәхсулатлириниң хәлқарадики базириға қилинған зомигәрлик вә уни сиясийлаштурушқа урунғанлиқниң ипадиси. Әмәлийәттә шинҗаңниң тоқумичилиқ санаити районда хизмәт пурсити яратти, пахта ишләпчиқириши пахтикарларға бейиш пурсити яратти, йәрликниң иқтисадини йүксәлдүрди. Шинҗаңда намратлиқни түгитиштәк тарихи вәзипини орунлашта пахта тоқумичилиқ саһиси интайин муһим рол ойниди, райондики пахта ишләпчиқиришини раваҗландуруп, намратларниң киримини ашурди," дегән.

Ахбарат елан қилиш йиғинда йәнә аталмиш "гуваһчи" лардин шаяр наһийәси гүлбағ базиридики "пахтизарлиқни һөддигә елип бейиған" абабәкри мәмәт исимлик деһқан сөзлитилгән.

У алди билән өзиниң һөкүмәтниң қоллаш сиясити билән пахта терип бейиғанлиқини билдүргән. Андин у 2020-йилдин башлап пахта териштин йиғивелишқичә болған мәшғулат җәряниниң 69. 83 Пирсәнтиниң машинилишип болғанлиқини билдүргән. У йәнә кевәзликтә зор санда адәм күчи сәрп қилишниң һазир һаҗәтсиз икәнликини, пахта ишләпчиқиришта "мәҗбурий әмгәк" ниң мәвҗут әмәсликини билдүргән.

Америкидики уйғур паалийәтчилиридин дуня уйғур қурултийи хитай ишлири комитетиниң мудири елшат һәсән зияритимизни қобул қилип, мәзкур ахбарат елан қилиш йиғини һәққидә җиддий инкас қайтурди.

Елшат һәсән әпәндиниң билдүрүшичә, хитай һөкүмәт даирилириниң бундақ бир ахбарат елан қилиш йиғинини ечишиға уларниң хәлқара бесимға дуч келиватқанлиқи сәвәб болғанлиқини тәкитлиди. У нөвәттә уйғурлар учраватқан ирқий қирғинчилиқниң пүтүн дуняға ашкара болуватқанлиқини, хитайдики пахта мәһсулатларниң көпинчисиниң "мәҗбурий әмгәк" билән ишләпчиқирилғанлиқини дуня хәлқиниң билип кәткәнликини, шу сәвәбтин хитай һөкүмитиниң тәшвиқат аппаратлирини ишқа селип, өзини ақлаш мәҗбурийитидә қалғанлиқини билдүрди.

Елшат һәсән әпәндиниң билдүрүшичә, йеқинқи мәзгилләрдә америка таможна вә чегра мудапийә идариси хитайдин екиспорт қилинған зор түркүмдики товарларни "уйғурларни мәҗбурий әмгәккә селиш арқилиқ ишләпчиқирилған мәһсулатлар" дәп мусадирә қилған икән.

Илшат һәсән әпәнди йәнә америка таможна идарисиниң бу йил 8-ай мәзгилидә тәнһәркәт айиқи вә пахтидин ишләнгән әрәнчә кйимләрни өз ичигә алған бир түркүм хитай товарлирини мусадирә қилғанлиқини тилға алди.

Илшат һәсән әпәнди хитай екиспорт қилған бу товарларға "вийетнамда ишләнгән" дегән хәтләр бесилғанлиқини әскәртип өтти. У америка башлиқ ғәрп дөләтлиридә хитайниң уйғур районида ишләнгән пахта мәһсулатлириға қаритилған чәклимиләр күчәйтилгәнлики үчүн, хитайниң ветнам, лаус қатарлиқ қошна дөләтләрдә завут қуруп, уйғур районида мәҗбури әмгәк билән ишләнгән пахта мәһсулатлирини ғәрп демократик дөләтлиригә екиспорт қилишқа урунуватқанлиқини, әмма бу ялғанчилиқларниң паш болуватқанлиқини билдүрди.

Ғәрптики мустәқил таратқулар хәвәрлирдин мәлум болушичә, 2021-киргәндин буян америкадин башқа йәнә әнгилийә, австралийә, франсийә қатарлиқ дөләтләрдики кишилик һоқуқ тәшкилатлири вә мунасивәтлик һөкүмәт органлиридиму хитайда уйғурлар мәҗбури әмгәк күчлири қилинған пахта мәһсулатлирини чәкләш тәшәббуслири арқа-арқидин оттуриға қойған вә мунасивәтлик тәдбирләрни алған. Йоқириқи дөләтләр йәнә уйғур дияридики мәҗбурий әмгәк билән четишлиқ хәлқара ширкәтләрниң җавабкарлиқини сүрүштүргән.

"җәнубий германийә гезити" вә германийә дөләтлик радийо-телевизийә қанили болған ARD қатарлиқларниң 5-сентәбирдики хәвиридин мәлум болушичә, мәркизи берлинда болған "явропа асасий қанун вә кишилик һоқуқ мәркизи" намлиқ тәшкилат уйғурлар учраватқан мәҗбурий әмгәккә алақидар германийәниң лидл, һюго, бос қатарлиқ 5 кийим-кечәк ширкитиниң җавабкарлиқини сүрүштүрүш үчүн, уларниң үстидин федиратсийә баш тәптиш мәһкимисигә 96 бәтлик әрзнамә сунған.

"америка авази" радийосиниң 7-сентәбирдики хәвиридә дийилишичә, франсийәдики тәптиш мәһкимилириму бу йил 7-айда шинҗаңда йүз бәргән инсанийәткә қарши җинайәт, йәни мәҗбурий әмгәк мәһсулатлириға четишлиқ болған 4 кийм-кечәк ширкити үстидин тәкшүрүш елип барған икән.

Илшат һәсән әпәндиниң тәкитлишичә, ғәрп дөләтлиридики кишилик һоқуқ тәшкилатлири вә һөкүмәт органлирида уйғурлар мәҗбури әмгәк күчи қилинған тоқулма мәһсулатлирини чәкләш тәшәббуслири күчәйгән. Хәлқаралиқ даңлиқ ширкәтләр өзликидин һәркәтлинип, бу хил мәҗбурий әмгәк мәһсулатлирини чәклигәндила, андин хитайниң мустәбитликигә тақабил турғили болидиғанлиқини тонюп йәткән.

Мәлум болушичә, бу йил 1-айда америка һөкүмити биңтүәнни асас қилған уйғур аптонум районидики барлиқ пахта мәһсулатлирини импорт қилишни чәкләш буйруқи елан қилған қилған иди. Бу йил 8-айда йәнә австралийә вә әнгилийә қатарлиқ дөләтләрму хитай ширкәтлириниң уйғурларни мәҗбури әмгәк күчи қилип ишләпчиқарған пахта тоқулма мәһсулатлириға қарита чәкләш тәшәббуслири оттуриға қойған, шундақла бир қисим тәдбирләрни алған.

"австиралийә" гезитиниң хәвәр қилишичә, австралийә кеңәш палатаси бу йил 8-айниң 23-күни беләт ташлап, уйғур мәҗбурий әмгәк мәһсулатлирини чәкләйдиған қанун лайиһәси мақуллиған. Австралийә парламент әзаси рәкис патрик бу лаһийә һәққидә тохтилип: "уйғур мәҗбурий әмгики шинҗаңниң зор көләмлик пахта ишләпчиқиришида ачқучлиқ рол ойнайдиғанлиқи, униң хәлқара маркиларниң тәминат зәнҗирини өз ичигә алған бир йүрүш хитай санаәт саһәсигә кеңәйгәнлики" ни ейтқан.

Әнгилийә "муһапизәтчи" гезитиниң 8-айниң 22-күнидики хәвиридә ейтилишичә, әнгилийәниң ишчилар партийәсидин болған парламент әзаси әмили торенбәрий ханим әнгилийә сәһийә министири саҗит җавидқа хәт йезип, әнгилийәниң теббий буюмларни сетивелишта "шинҗаң ширкәтлириниң теббий буюмлирини сетивалмаслиқ" ни тәләп қилған.

Хәвәрдә дийилишичә, әмили торенбәрий ханим хетидә әнгилийәниң маска, халат қатарлиқларни өз ичигә алған 5 милярд долларлиқ теббий буюми сетивелиш йеңи тохтаминиң, уйғур елида мәҗбурий әмгәк билән шуғуллинидиған хитай ширкәтлиригә берилмәсликигә капаләтлик қилишни тәләп қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт