En'gliye emgekchiler partiyesining yilliq yighinida Uyghur mejburiy emgek mesilisi asasiy téma boldi

Muxbirimiz nur'iman
2021-09-27
Share
En'gliye emgekchiler partiyesining yilliq yighinida Uyghur mejburiy emgek mesilisi asasiy téma boldi "Emgekchiler partiyesining 2021-yilliq yilliq yighini" da kishilik hoquq teshkilatliridin "Kishilik hoquq emgek herikiti" we "Xelq'araliq tereqqiyat emgek herikiti" birlikte orunlashturghan "Kishilik hoquq we karxana teminlesh zenjiri: en'gliye shirketlirining qul emgikidin payda élishining aldini élish" témidiki muhakime yighinidin körünüshler. 2021-Yili 26-séntebir, london.
Rehime Mexmut teminligen

En'gliyediki asasliq partiyelerdin biri bolghan emgekchiler partiyesining yilliq yighini 25-séntebir bashlan'ghan. Mezkur yighin 29-séntebirgiche dawam qilidighan bolup, 26-séntebir küni partiye tarixida tunji qétim bir Uyghur pa'aliyetchini emgekchiler partiyesining yilliq yighinda sözleshke teklip qilghan.

Dunya Uyghur qurultiyi london ishxanisining mudiri rehime mehmut xanim "Emgekchiler partiyesining 2021-yilliq yilliq yighini" da kishilik hoquq teshkilatliridin "Kishilik hoquq emgek herikiti" we "Xelq'araliq tereqqiyat emgek herikiti" birlikte orunlashturulghan muhakime yighinining asasliq sözligüchisi süpitide teklip qilin'ghan. Mezkur muhakime yighini en'gliyediki shirketlerni mejburiy emgekke chétilip qalmasliqqa agahlandurushni meqset qilghan bolup, mexsus "Kishilik hoquq we karxana teminlesh zenjiri: en'giliye shirketlirining qul emgikidin payda élishining aldini élish" dégen téma muhakime qilin'ghan.

"Emgekchiler partiyesining 2021-yilliq yilliq yighini" da kishilik hoquq teshkilatliridin "Kishilik hoquq emgek herikiti" we "Xelq'araliq tereqqiyat emgek herikiti" birlikte orunlashturghan yighinda rehime mexmut xanim sözlimekte. 2021-Yili 26-séntebir, london.

Rehime mehmut xanim mezkur yighin heqqide ziyaritimizni qobul qilip mundaq dédi: "En'gliyediki üch chong partiyening biri bolghan emgekchiler partiyesining yilliq yighinigha méni, yeni bir Uyghurni tekilip qilishi bir tarixiy weqe boldi."

Yighin'gha yene parlaménit ezaliridin xelq'ara soda ishliri teptish ministiri émiliy tornbéréy, asiya we tinch okyan teptish ministiri stéfin kénnok qatarliq döletning muhim erbablirimu qatnashqan.

Émiliy tornbéri "Muhapizetchi" gézitining ziyaritini qobul qilghanda mundaq dégen: "Bilginingizdek, yéqinqi yillardin buyan xitay hökümitining sistémiliq halda Uyghurlarni shinjang rayonidiki zawutlarda, déhqanchiliq meydanlirida, türme we lagérlarning ichide mejburiy emgekke séliwatqanliqigha da'ir pakitlar otturigha chiqti. Shuningdek Uyghurlarni atalmish 'emgek küchlirini yötkesh' pilanigha asasen xitayning ichkiridiki sheherlerge mejburiy yötkep, u yerlerdiki zawut-karxanilarda ishletmekte."

Émiliy tornbéri mezkur muhakime yighinidimu Uyghurlarning mejburiy emgekke séliniwatqanliqini tilgha alghan.

Rehime mehmut xanim muhakime yighinda némiler toghrisida toxtalghanliqini biz bilen ortaqlashti, u mundaq dédi: "Men ulargha méning sözligenlirim gi'o-poltika emes, belki uyghular her küni duch kéliwatqan intayin azabliq hayat ikenlikini chüshendürdüm."

Mezkur muhakime yighinining teshkilligüchisi, "Kishilik hoquq emgek herikiti" ning xadimi metiyü térnir muhakime yighini heqqide ziyaritimizni qobul qilip mundaq dédi: "Yighin'gha nahayiti köp kishi qatnashti. Nurghun témilarda muhakime ilip bérildi. Lékin qatnashquchilar asasliqi en'gliye hökümiti teminlesh zenjiri mejburiy emgekke chétishliq bolghan shirketlerning mes'uliyiti sürüshte qilishta jiddiy tedbir qolinishi kéreklikini tekitleshti. En'gliyediki bezi shirketlerning shinjang rayonidiki mejburiy emgekke siliniwatqan Uyghurlar teripidin ishlepchiqirilghan mehsulatlarni import qilghan bolushi mumkinliki otturigha qoyuldi. Xulasiligende, mejburiy emgekke chétilish éhtimalliqi bolghan import-éksport mallirigha qarita tekshürüshni kücheytish, shirketlerdin mallirining mejburiy emgektin xali ikenlikini ispatlashni telep qilish, uningdin bashqa yene kishilik hoquq depsenichilikikige chétishliq bolghan munasiwetlik orun we shexslerge jaza tedbirliri, iqtisadiy jaza qollinish qatarliq témilar muzakire qilindi."

Amérika we en'gliye bashchiliqidiki bir qisim gherb döletliri Uyghurlar duch kéliwatqan zor kölemlik tutqun we siyasiy basturush herikitini "Irqiy qirghinchiliq" dep élan qilghandin kéyin, buninggha mas halda bir qisim jaza tedbirlirini otturigha qoyghanidi. Bularning ijra qilinishigha egiship bulardin bezilirining, jümlidin mejburiy emgekke chétishliq bolghan mehsulatlarning amérika bazirigha kirishini cheklesh tedbirlirining heqiqetenmu zor ünümge ige ikenliki tézla namayan bolghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet