Әнгилийә парламент әзалири тәминләш зәнҗиридики уйғур мәҗбурий әмгәк мәсилисини тәкшүридикән

Мухбиримиз җүмә
2020.11.01
engliye-parlament-yighin.jpg Әнглийә парламентида ечилған йиғиндин көрүнүш. 2020-Йили 18-март, лондон.
AFP

Әнгилийә парламент әзалири “буһу” мода кейим ширкити қатарлиқ даңлиқ ширкәтләрниң тәминләш зәнҗиридә уйғур мәҗбурий әмгәк күчлирини ишлитиш мәсилиси көрүлгән яки көрүлмигәнликини тәкшүридикән вә бу һәқтә гваһлиқ бериш йиғини чақиридикән.

“телеграф” гезитиниң хәвәр қилишичә, әнглийә парламенти сода комитети пәйшәнбә күни “буһу” қатарлиқ әнглийә маркилири вә әнглийәдә сода қилидиған даңлиқ ширкәтләр билип-билмәй зулумға учраватқан мусулманлар топиниң азаб-оқубәтлирини суйиистемал қилған болуши мумкин, дәп гуман қилидиғанлиқини билдүргән.

Мәлум болушичә, парламент әзалири “амазон”, “буһу”, “гәп”, “икея”, “найке”, “викторийә мәхпийити” қатарлиқ хитайда тәминләш зәнҗири мәвҗут он нәччә даңлиқ ширкәтләрдин алдинқи айда язма испат тапшурушни тәләп қилған. 

Сода комитетиниң консерватиплар партийәсидин болған әзаси нусрат ғени мундақ дегән: “әнглийәдә сетиливатқан мәһсулатларниң хитай лагерлиридики мәҗбурий әмгәккә бағлинидиғанлиқини аит бир йүрүш инкаслар бар. Биз бу мәсилиниң дәриҗисиниң зади қанчилик икәнликини техиму ениқ чүшинип йәтмәкчи.”

Әнглийәниң содиға мәсул юқири дәриҗилик әмәлдарлиридин паул скуллий вә сода вазарити әмгәк базириниң директори майкел варренму гуваһчилар тизимликидә бар икән.

Мәлум болушичә, “буһу” қатарлиқ бир нәччә ширкәт өзлириниң тәминләш зәнҗиригә мунасивәтлик дәлил-испатларни әнглийә парламентиға тапшурған вә гуваһлиқ бериш йиғиниға қатнишидиғанлиқини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.