Ressam merwayit hapizning inisi we kélinining tutqunda ikenliki aydinglashti

Muxbirimiz shöhret hoshur
2021-04-12
Share
Ressam merwayit hapizning inisi we kélinining tutqunda ikenliki aydinglashti Gérmaniyede yashawatqan ressam merwayit hapiz xanimning ijadiyetliri.
Merwayit Hapiz teminligen

Gérmaniyede yashawatqan ressam merwayit hapiz xanimning bügün radiyomizgha ashkarilishiche, uning qumulda oqutquchiliq qiliwatqan inisi batur hapiz bilen, uning ayali gülsimay batur, 2018-yilining axiri tutqun qilin'ghan. Muxbirimizning bu heqte élip barghan éniqlashliri dawamida qumuldiki alaqidar xadimlar, merwayitning inisi we uning ayalining ehwali heqqide tepsiliy melumat bermigen bolsimu, ularning tutqunda ikenlikini inkar qilmidi.

Gérmaniyede yashawatqan ressam merwayit hapizningmu 2017-yildin bashlap qumuldiki uruq-tughqanliri bilen alaqisi pütünley üzülgen. U 2018-yilining axirigha kelgende, inisi batur hapiz bilen uning ayali gülsimay baturning tutqunda ikenliki heqqide isharetlik bir uchur alghan. Emma yurttiki uruq-tughqan we tonush-bilishlirining bixeterlikini oylship, bu heqte ilgirilep ehwal sürüshte qilalmighan we uchurning toghriliqini aydinglashturalmighan. U peqet yéqinda qumulni ziyaret qilghan bir tonushi arqiliq inisining 15 yilliq, uning ayalining bolsa 7 yilliq késilip ketkenlikidin éniq halda uchur alghan.

Gérmaniyede yashawatqan ressam merwayit hapiz xanim inisi batur hapiz we uning a'ilisi bilen. (Waqti we orni éniq emes)

Biz bu uchurning toghriliqini delillesh üchün qumuldiki herqaysi idare-organlargha téléfon qilduq.

Tonushturulushiche, batur hapiz 1973-yili, gülsimay 1975-yili tughulghan. Ular yashliri 50 ke yéqinlashqan we ikki perzentini aliy mektepke yolgha salidighan mezgilide, bu qismetke duch kelgen.

Merwayitning bayan qilishiche, inisi batur hapiz we ayali gulsimay batur qumul astane ottura mektipining oqutquchisi bolup, ular milliy örp-adetlerge sadiq halda yashap kelgen, iman-étiqadliq kishiler bolghanliqi üchünla, xitayning neziride xeterlik kishiler bolup körülgen.

Téléfonimizni qobul qilghan, qumuldiki bir ottura mektep xadimi, batur hapiz bilen gülsimay baturning qumul sheherlik 3-ottura mektepning oqutquchiliri ikenlikini tilgha aldi. Emma ularning nöwettiki ehwali heqqide melumat bérelmidi.

Inisining perzentlirini yaxshi terbiyeleshke özini atighan mes'uliyetchan bir dada ikenlikini ikenlikini tilgha alghan merwayit xanim, inisidin bekrek, kélinining her jehettiki bixeterlikidin qattiq endishe qiliwatqanliqini bayan qildi.

Téléfonimizni qobul qilghan qumul sheherlik 3-ottura mektep yeni astane ottura mektipining xadimi, batur hapizinng xizmet ornida bar yaki yoq ikenliki heqqidiki so'alimizgha jawaben "Yoq" dep jawab berdi. Özining mektep oqutush bölümining xadimi ikenlikini ashkarilighan bu xadim, qolidiki oqutquchilar tizimlikide gülsimay batur isimlik bir oqutquchiningmu yoq ikenlikini bayan qildi. Biz uningdin "Burun bolghanmu?" dep sorighinimizda "Bolghan "Dep jawab berdi. Biz bu xadimdin batur hapiz bilen gülsimay baturning qanche yilliqtin késilgenlikini sorighinimizda, téléfonni mezkur ishxanidiki yene bir xadim qoligha aldi we bu téléfonning özlirige xata urulghanliqini bayan qilish arqiliq, éniqlawatqan ishimizning dölet mexpiyetlikige yatidighanliqini isharetlidi.

Bügün'ge qeder gérmaniyediki Uyghur pa'aliyetlirige, öz kespiy sahesi boyiche hesse qétip kéliwatqan ressam merwayit hapiz xanim, inisi we kélinining bu teqdirdin éniq xewer tapqandin kéyin, siyasiy pa'aliyetlerde téximu aktip rol élish zörüriyitini hés qiliwatqanliqini bayan qildi.

Yuqirida, ressam merwayit hapizning inisi batur hapiz bilen uning ayali gülsimay baturning tutqunda ikenliki heqqide melumat berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet