Yerkendiki bir lagérning mexsus tekshürgüchiler üchün teyyarlan'ghanliqi ashkarilandi

Muxbirimiz shöhret hoshur
2019-08-09
Élxet
Pikir
Share
Print

Türkiyediki yerkenlik muhajirlardin biri gugil xeritisi boyiche tordin közitish élip bérip, öz yurti yerkende atalmish "Terbiyelesh merkezliri", qamaqxanilar we daril'étamlar bolup jem'iy 16 orunda lagér barliqini bayqighan we bu heqte ijtima'iy taratqularda qisqa bir melumat élan qilghan idi. Muxbirimizning bu uchur üstide élip barghan éniqlashliri dawamida yekendiki 7 lagérning jaylashqan orunliri aydinglashti we lagérlardin birining mexsus tekshürgüchiler üchün ayrilghanliqi melum boldi.

Türkiyediki bir yerkenlik muhajir gugil xeritisi boyiche tordin közitish élip bérip, yerkendiki lagérlarning sani, orni we kölimi heqqide melumat éniqlighan. Atalmish "Terbiyelesh merkizi" din bashqa, türme, qamaqxana, daril'étam, qosh til mektipi we yeslilernimu lagérlar qatarida hésablighan bu muhajir yerkende 16 orunda lagér barliqini ilgiri sürgen. U yene bu 16 lagérning xeritidiki resimlirini élan qilghan. U her bir resimge izahat bergende shu lagér jaylashqan orun we uning etrapi heqqidimu tepsiliy melumat bergen.

Bu heqte yerken'ge qarita élip barghan téléfon ziyaretlirimiz dawamida yerkende siyasiy-qanun saheside xizmet qiliwatqan bir xadim özi xizmet jeryanida körgen we anglighanlirigha asasen yerkende az dégende 7 orunda lagér barliqini delillidi. Uning déyishiche, yerkende eng deslepki lagér nahiyelik partiye mektipide qurulghan iken. Uningdin kéyin nahiyediki eslidiki kespiy téxnika mektipimu lagérgha özgertilgen. Yerkenlik muhajirning tekshürüsh xulasiside yerkenning araslanbagh, chaharbagh, tom'östeng, yéngi'östeng, odanliq qatarliq köpinche yéza bazarlirida az dégende birdin lagér barliqi ilgiri sürülgen. Yerkendiki mezkur siyasiy-qanun xadimimu yéza-bazarlarning az dégende beshide yighiwélish lagéri barliqini ashkarilidi. Yerkenlik muhajirning doklatida yerkendiki eng chong lagérning nahiye ichidin 10 kilométir uzaqliqtiki qaraqum sana'et rayonida ikenliki, bu lagérning yanmu-yan sélin'ghan 4 qamaqxaninimu öz ichige alidighanliqi, bu lagérda 1700 kamér, 12 közitish munari barliqi we texminen 50 mingche kishining solan'ghanliqi qeyt qilin'ghan.

Ilgiri ziyaritimizni qobul qilghan yawropadiki yerkenlik muhajir, sabiq karxanichi nurmemet abdulla özining 2009‏-yili küzde del mushu qaraqumdiki jaza lagérida 6 ay yatqanliqini tilgha alghan idi. U yerkende atalmish "Terbiyelesh merkezliri" ning shu chaghlardin bashlapla sinaq teriqiside yolgha qoyulghanliqini ilgiri sürgen idi.

Yerkendiki siyasiy qanun xadimi xizmet jeryanida körgen we anglighanlirigha asasen arslanbaghdiki lagérning eng chong lagér ikenlikini tilgha aldi. Emma u bu lagérdiki kishilerning sani heqqide texminen bolsimu melumat bérelmidi.

Ilgiri qeshqerdiki lagérlar heqqide melumat bergen türkiyediki bir muhajir qeshqer döletbaghdiki 4-ottura mektepke qurulghan lagérning mexsus chet'eldin kelgen tekshürgüchiler üchün ayrilghanliqi we yasalghanliqi, bu lagérgha mexsus atalmish "Xataliq ötküzgen dölet xizmetchiliri" ning solan'ghanliqini melum qilghan. U yene mundaq tekshürgüchilerge ayrilghan lagérning her bir nahiye-sheherde az dégende birdin mewjut ikenlikini ilgiri sürgen idi.

Yerkendiki siyasiy-qanun xadimimu yerkendiki bu 7 lagéridin birining mexsus chet'eldin kelgen tekshürgüchiler üchün teyyarlan'ghanliqini delillidi. U yerkende eslidiki kespiy téxnika mektipining yéqinda körgezmilik üchün qaytidin yasalghanliqini bayan qildi.

B b s ning lagérlar heqqidiki xewiride qeshqer 4-ottura mektep lagérida ishsiz dep tonushturulghan tutqunlar ichide wilayetlik medeniyet yadikarliqliri idarisining xadimi ekber ebeydullaningmu barliqi delillen'gen idi.

Toluq bet