Qirghizistanda 2-nöwetlik sherqiy türkistan milliy kéngishining netijiliri tonushturuldi

Ixtiyariy muxbirimiz féruze
2022.06.22
Share on WhatsApp
Share on WhatsApp
Qirghizistanda 2-nöwetlik sherqiy türkistan milliy kéngishining netijiliri tonushturuldi Bishkek shehiride qirghizistan Uyghurliri “Ittipaq” jem'iyitining uyushturushi bilen ötküzülgen 2-nöwetlik sherqiy türkistan milliy kéngishining rohini yetküzüsh pa'aliyitidin körünüsh. 2022-Yili 20-iyun, bishkek.
RFA/Féruze

Melum bolushiche 5-ayning axirlirida gérmaniyediki myunxén shehiride 2-nöwetlik sherqiy türkistan milliy kéngishi ötti. Bu murasim dunya Uyghur qurultiyi we bashqa Uyghur teshkilatlirining hemkarliqida ötküzülüp, Uyghur xelqining milliy küresh herikitide alahide ehmiyetke ige bolup, xelq'ara jama'etke Uyghur xelqining özini bashqurush iqtidarini körsetti. 2-Nöwetlik sherqiy türkistan milliy kéngishige qanun we ilim-pen mutexessisliri, siyaset belgiligüchiler we siyasiyonlar, pa'aliyetchiler we Uyghur teshkilatliri wekilliri qatnashti.

20-Iyun küni bishkek shehiride qirghizistan Uyghurliri “Ittipaq” jem'iyitining uyushturushi bilen 2-nöwetlik sherqiy türkistan milliy kéngishining rohini yetküzüsh pa'aliyiti ötküzüldi. Pa'aliyet “Ittipaq” jem'iyitining idariside orun alghan bolup, Uyghurlar zich olturaqlashqan mehellilerning yigit bashliri we dunya Uyghur qurultiyining wekilliri qatnashti. Mezkur yighin qirghizistan Uyghurliri “Ittipaq” jem'iyitining mu'awin re'isi ekberjan bawudunofning riyasetchilikide élip bérildi. Aldi bilen riyasetchi, 2-nöwetlik sherqiy türkistan milliy kéngishige qirghizistandin wekil bolup qatnashqan esqer qasimofqa teshekkür bildürüp uni nutuq sözleshke teklip qildi. Esqer qasimof 2-nöwetlik sherqiy türkistan milliy kéngishining alahidilikini tilgha élip, Uyghur milliy küresh herikitide dunya Uyghur qurultiyining muhim rolini tekitlep ötti.

Bishkek shehiride qirghizistan Uyghurliri “Ittipaq” jem'iyitining uyushturushi bilen ötküzülgen 2-nöwetlik sherqiy türkistan milliy kéngishining rohini yetküzüsh pa'aliyitidin körünüsh. 2022-Yili 20-iyun, bishkek.

Igilinishiche, 2-nöwetlik sherqiy türkistan milliy kéngishige qirghizistandin 7 wekil qatnashmaqchi bolghanidi. Lékin wiza, waksina we bashqa seweblerdin ular baralmay qélip, peqetla esqer qasimofla qatnashqanidi.

Adette qirghizistan Uyghurliri “Ittipaq” jem'iyiti Uyghur xelqige munasiwiti bolghan türlük xelq'ara yighinlarning rohini jama'etke yetküzüp we netijilirini tonushturup kelmekte. Aldinqi yilliri bu tiptiki pa'aliyetler chong zallarda uyushturulup köp sanda kishiler qatnashqan, lékin bu qétim “Ittipaq” jem'iyitining xizmet komitétining qarar qilishi bilen pa'aliyet tar da'iride ötküzüldi.

Radiyomiz ziyaritini qobul qilghan qirghizistan Uyghurliri “Ittipaq” jem'iyitining re'isi esqer qasimof özining xelq'ara Uyghur teshkilatlirining yighinlirigha birinchi qétim qatnashqanliqini tilgha élip, shu yighindin alghan tesiratliri bilen ortaqlashti.

2-Nöwetlik sherqiy türkistan milliy kéngishining rohini yetküzüsh pa'aliyitige qatnashqan siyasetshunas abdurexim hapizof, yighin dawamida öz pikirlirini otturigha qoyup, bügünki künlerde Uyghur mesilisi xitayning ichki mesilisi emes, belki xelq'ara mesilisige aylinip, yersharidiki eng muweppeqiyetlik döletler teripidin diqqet qilinip kéliwatqanliqini tilgha aldi.

Bishkek shehiride qirghizistan Uyghurliri “Ittipaq” jem'iyitining uyushturushi bilen ötküzülgen 2-nöwetlik sherqiy türkistan milliy kéngishining rohini yetküzüsh pa'aliyitidin körünüsh. 2022-Yili 20-iyun, bishkek.

Bishkekte ötküzülgen murasim dawamida yene xelq'araliq iqtisad, siyasiy özgirishler, ukra'ina we bashqa mesililer muzakire qilindi. Dunya Uyghur qurultiyining qirghizistandiki wakaletchisi rozimuhemmed abdulbaqi dunya Uyghur qurultiyi rehberlirining kanada hökümitige muraji'et xéti yézip, Uyghur musapirlirini qobul qilishni telep qilghanliqini tekitlidi.

Mezkur murasimgha qatnashqan qirghizistan Uyghurliri “Ittipaq” jem'iyitining sabiq re'isi dilmurat ekberof 2-nöwetlik sherqiy türkistan milliy kéngishining Uyghur xelqini xelq'ara jama'etke bir millet qatarida tonushturghanliqini tilgha aldi we yighinning doklatlirining toluqi bilen “Ittipaq” gézitide neshr qilinidighanliqini tekitlep ötti.

Qirghizistan Uyghurliri imkaniyitining yétishiche, türlük pa'aliyetlerni qilmaqta, ular milliy-kimliki we tarixini, shundaqla til we medeniyitini saqlap qélishqa tirishmaqta. Bu septe qirghizistan Uyghurliri ottura asiyadiki özbékistan we qazaqistan, shundaqla rusiyediki Uyghur jama'etliri bilen yéqindin alaqiliship kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet