Қазақистандики уйғур яш-өсмүрлири миллий кимликни сақлаш үчүн тиришмақта

Ихтиярий мухбиримиз ойған
2019-06-03
Елхәт
Пикир
Share
Принт

Мәлумки, қазақистанлиқ уйғурлар қазақистан мустәқиллиққа еришкәндин буян яш әвладларни миллий роһта тәрбийәләшкә алаһидә әһмийәт берип кәлмәктә.

Қазақистандики мәктәп оқуғучилири арисида һәр хил мәзмундики фестивалларни, сәнәт көрәклирини вә ана тилда сөзләш мусабиқилирини өткүзүш әнәнигә айланған. Мәзкур паалийәтләрни өткүзүшкә уйғур җәмийәт бирләшмилири, уйғур тиллиқ мәктәпләр, мәдәнийәт, сәнәт өмәклири йеқиндин қоллимақта. Кейинки вақитларда «мәниви йеңилиниш» вә «улуғ даланиң йәттә қири» мәмликәтлик программилири даирисидә өткән көплигән паалийәтләрдә яшларни әнә шу миллий роһта тәрбийәләш нишан қилинған.

1-Июнда алмута шәһиридики қазақистан мәмликәтлик мәркизий музейи бинасида «ана йәр қучиқида» темисида яш өсмүрләр арисида җумһурийәтлик 1-фестивал-көргәзмиси болуп өтти. «1-Июн хәлқара балилар байрими» мунасивити билән тәшкилләнгән бу паалийәт тонулған уйғур язғучиси вә рәссами марс һейтахунофниң 80-йиллиқ хатирисигә беғишланди. Мурасим қазақистан мәмликәтлик мәркизий музейи, «аламәт» филим ишләш мәркизи вә «шәбнәм» уйғур ханим-қизлар кулуби тәрипидин уюштурулди.

Фестивални киришмә сөз билән башлиған қазақистан мәмликәтлик мәркизий музейи мудириниң орунбасари бейбитқали қақабайеф вә «дуня арт» көргәзмә галерейәсиниң мудири һакимҗан гулийеф уйғур мәдәнийитиниң қазақистан мәдәнийитидә алаһидә орун тутидиғанлиқини тәкитлиди һәмдә фестивал қатнашқучилирини «балилар байрими» билән қизғин тәбриклиди. Һакимҗан гулийеф қазақистан тәсвирий сәнитиниң бүгүнки тәрәққиятиға мунасип төһпилирини қошуп келиватқан абдукерим әйса, руслан йүсүпоф, һашим қурбаноф, муһәббәт һейтахунова қатарлиқ рәссамларни көпчиликкә тонуштуруп, бу фестивалда яш рәссамларниң өз һүнәрлирини намайиш қилишқа барлиқ шараитларниң яритилғанлиқини билдүрди.

Фестивал яш өсмүрләр тәрипидин тәйярланған консертлиқ программа билән башланди. Уларниң орунлишидики уйғур уссуллири, нахшилири, ләпәрлири көпчиликни қаттиқ тәсирләндүрди.

Радийомиз зияритини қобул қилған тонулған шаир елахун җелилоф әпәнди мундақ деди: «мәнивий йеңилиниш программиси қәдимдин келиватқан һүниримизни, сәнитимизни, мәдәнийитимизни қайтидин тикләшкә түрткә болди, күч-ғәйрәт вә илһам бериватиду. Бүгүнки мурасимда һәммиси хош күлкиси билән өз һүнәрлирини көрситиватиду. Келәчәктә мушундақ иттипақлиқта яш әвладни тәрбийәләшкә үлүшимизни қошсақ, мәқситимизгә йетимиз.»

Фестивалниң иккинчи қисми язғучи вә рәссам марс һейтахунофни хатириләш билән башлинип, сөзгә чиққанлар униң иҗадийәт таланти һәққидә өз пикирлирини оттуриға қойди. Марс һейтахуноф 1944-йилдин тартип сабиқ совет иттипақи язғучилар иттипақиниң әзаси болған. У һәр хил мавзулардики бир қанчилиған һекайиләрниң аптори. Униң совет-герман уруши дәвридики арқа сәпкә беғишланған «әлвида, яз» намлиқ романи китабханлар арисида юқири баһаларға игә болған.

Зияритимизни қобул қилған «мирас» анилар җәмийитиниң рәиси әхтирим әхмәтова ханим мундақ деди: «бүгүн көңлимиз қара, туман болсиму, дуня йүзи бойичә пәрзәндлиримизниң байрими. Биз қазақистанда яшаватқан уйғурлар хәлқ еғиз иҗадийити болсун, мәдәнийитимиз болсун нахша-уссуллиримизниң иззәт-һөрмитини билгән ата-анилар балилиримизниң һүнирини көрүп, хушал болуватимиз. Балилиримиз өрп-адәт, рәсим-қаидилиримизни унтумай, тарихий вәтинимизгә беришиға амәт тиләймән. Шу тарихий вәтинимиздә дадисиз, анисиз қалған пәрзәндлиримизгә сәбир, хатирҗәмлик тиләймән. Пүтүн дуня балиларбайрими қутлуқ болсун. Ана вәтинимиздиму балилиримизниң һаман бир күни әркиз азадә байрамлирини өткүзүшини аллаһдин үмид қилимиз.»

Фестивалда рәсим сизип һәм һекайә йезип, мукапатқа еришкәнләр пәхрий ярлиқ вә баһалиқ совғатлар билән тәқдирләнди. Униңда яш өсмүрләрниң иҗадийитидин әсәрләр көргәзмә қилинди. Мурасимда сөзгә чиққанлар мәзкур паалийәтни уюштурушқа алаһидә күч чиқарған «аламәт» филим ишләш мәркизиниң мудири қәлбинур розийеваға миннәтдарлиқ билдүрди.

Пикирләр (0)
Share
Толуқ бәт