Мирадил һәсәнниң мәҗбурий әмгәккә селинған учтурпанлиқ қиз һәққидики гуваһлиқиниң тоғрилиқи дәлилләнди

Мухбиримиз шөһрәт һошур
2020-09-25
Share
miradil-hesen-youtube.jpg Иҗтимаий таратқуларда өзиниң җяңсу өлкисидә туруватқанлиқини илгири сүргән мирадил һәсән уйғур районида ирқий қирғинчилиқ давам қиливатқанлиқини оттуриға қоймақта. 2020-Йили сентәбир.
Social Media

Америка авам палатасида уйғурларниң мәҗбури әмгәккә селинишини чәкләш қанун лайиһәси музакиригә қоюлуштин 3 һәптә бурун, хитайниң җяңсу өлкисидә туруп хитайға қарши йотуб қанилида сөз қилған ғайиб мирадил һәсән ақсудики хуафу тоқумичилиқ завутида мәҗбури әмгәккә селиниватқан учтурпанлиқ бир қиз һәққидә гуваһлиқ бәргән иди. Мухбиримизниң учтурпанға қарита елип барған телефон зиярәтлири давамида имамлирим йезиси6 ‏-кәнттин ханзөһрә сәйидәхмәт вә арзугүл сәмәт исимлик 20 вә 23 яштики икки қизниң хуафу тоқумичилиқ завутида мәҗбурий әмгәккә селиниватқанлиқи дәлилләнди

Ғайиб мирадил һәсән хитайниң җяңсу өлкисидә туруп бәргән үч қисимлиқ баянатида, анисиниң туғут чәкләш тәдбириниң зиянкәшликигә учриши, ақсудики лагерлар вә балиси лагерға тутулуп кәткән бир бовайниң лагер алдидики чарисиз әһвали қатарлқлардин башқа йәнә учтурпанлиқ бир қизниң ақсудики хуафу тоқумичилиқ завутида мәҗбурий ишқа селиниватқанлиқи һәққидиму гуваһлиқ бәргән иди. Бу һәқтә елип барған ениқлашлиримиз давамида, учтурпанниң имамлирим йезисидики бир кәнт сақчиси өзи мәсул 6 -кәнттин 20 вә 23 яшлардики икки қизниң ақсудики хуафу тоқумичилиқ завутида мәҗбурий ишлитиливатқанлиқини дәллилди.

Мәлум болушичә, 20 вә 23 яшлардики бу икки қизниң бириниң исми ханзөһрә сәйидәхмәт, йәнә бириниң исми арзугүл сәмәт болуп, улар бир мәзгил лагерда йетип чиққандин кейин, өз аилисидә пәқәт бир күнла турғузулуп, әтиси ақсудики тоқумичилиқ завутиға елип кетилгән. Мирадил һәсәнниң баянатида өзи учратқан қизниң күнигә 12 саәт ишләйдиғанлиқи, дәм елиш үчүн рухсәт берилмәйдиғанлиқи тилға елинған. Мәзкур кәнт сақчисиму ханзөһрә билән арзугүл сәмәтниң пәқәт һейт-байрамлардила өйигә қайталайдиғанлиқи, башқа вақитларда күнигә аз дегәндә 10 саәттин ишләйдиғанлиқини ашкарилиди. Мирадил һәсәнниң баянтида учтурпанлиқ қизниң ейиға 1400-1500 йүәнгә ишләйдиғанлиқи, әгәр ишидин бир күн рухсәт сорап қалса, күнигә 40-50 йүәндин пул тутулидиғанлиқи, завутниң ятақ билән тәминләйдиғанлиқи, әмма тамақ билән кари болмайдиғанлиқини баян қилған иди. Мәзкур кәнт сақчиси арзугүл вә ханзөһрәниң бәлгилик миқдарда мааш алидиғанлиқини билидиғанлиқи, әмма қанчә пул алидиғанлиқидин хәвәрсизликини, бу ишларни бәк сорап-сүрүштә қилишқа болмайдиғанлиқини әскәртти. Мирадил баянтида учтурпанлиқ қизниң завутқа әкитилиштин бурун немә үчүн тутулғанлиқи һәққидә учур берилмигән иди. Мәзкур кәнт сақчисиниң ашкарилишичә, ханзөһрә сәйидәхмәт телефонидин аталмиш «чатақ» чиққанлиқи, арзугүл сәмәт болса, қол телефонини башқилар «хата» һалда ишлитип қалғанлиқи үчүн лагерға әкетилип, униңдин кейин хуафу тоқумичилиқ завутида мәҗбури әмгәккә селинған.

Мирадил мәзкур баянатида учтурпанлиқ қиз алған 1500 йүән мааш билән ақсуда яшашниң мумкин әмәслики, чүнки ақсуда мал баһасиниң юқири икәнлики, нөвәттә пүтүн уйғур райониниң хитайлар үчүнла яшашқа мумкин җайға айланғанлиқи, уйғурлар үчүн өз ана маканида яшашниң мумкинчилики қалмиғанлиқи илгири сүрүлгән.

Мирадил һәсәнниң баянтида өзи учратқан қизниң исим-фамилиси тилға елинмиған. Шуңа мәзкур кәнт сақчисиниң баянлиридин мирадил тилға қалған қизниң ениқ кимлики дәлилләнмигән болсиму, у паш қилған реаллиқниң чинлиқи вә қилчиму көптүрүлмигәнлики дәлилләнди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.