Mir'adil hesenning mejburiy emgekke sélin'ghan uchturpanliq qiz heqqidiki guwahliqining toghriliqi delillendi

Muxbirimiz shöhret hoshur
2020-09-25
Share
miradil-hesen-youtube.jpg Ijtima'iy taratqularda özining jyangsu ölkiside turuwatqanliqini ilgiri sürgen mir'adil hesen Uyghur rayonida irqiy qirghinchiliq dawam qiliwatqanliqini otturigha qoymaqta. 2020-Yili séntebir.
Social Media

Amérika awam palatasida Uyghurlarning mejburi emgekke sélinishini cheklesh qanun layihesi muzakirige qoyulushtin 3 hepte burun, xitayning jyangsu ölkiside turup xitaygha qarshi yotub qanilida söz qilghan ghayib mir'adil hesen aqsudiki xu'afu toqumichiliq zawutida mejburi emgekke séliniwatqan uchturpanliq bir qiz heqqide guwahliq bergen idi. Muxbirimizning uchturpan'gha qarita élip barghan téléfon ziyaretliri dawamida imamlirim yézisi6 ‏-kenttin xanzöhre seyid'exmet we arzugül semet isimlik 20 we 23 yashtiki ikki qizning xu'afu toqumichiliq zawutida mejburiy emgekke séliniwatqanliqi delillendi

Ghayib mir'adil hesen xitayning jyangsu ölkiside turup bergen üch qisimliq bayanatida, anisining tughut cheklesh tedbirining ziyankeshlikige uchrishi, aqsudiki lagérlar we balisi lagérgha tutulup ketken bir bowayning lagér aldidiki charisiz ehwali qatarlqlardin bashqa yene uchturpanliq bir qizning aqsudiki xu'afu toqumichiliq zawutida mejburiy ishqa séliniwatqanliqi heqqidimu guwahliq bergen idi. Bu heqte élip barghan éniqlashlirimiz dawamida, uchturpanning imamlirim yézisidiki bir kent saqchisi özi mes'ul 6 -kenttin 20 we 23 yashlardiki ikki qizning aqsudiki xu'afu toqumichiliq zawutida mejburiy ishlitiliwatqanliqini dellildi.

Melum bolushiche, 20 we 23 yashlardiki bu ikki qizning birining ismi xanzöhre seyid'exmet, yene birining ismi arzugül semet bolup, ular bir mezgil lagérda yétip chiqqandin kéyin, öz a'iliside peqet bir künla turghuzulup, etisi aqsudiki toqumichiliq zawutigha élip kétilgen. Mir'adil hesenning bayanatida özi uchratqan qizning künige 12 sa'et ishleydighanliqi, dem élish üchün ruxset bérilmeydighanliqi tilgha élin'ghan. Mezkur kent saqchisimu xanzöhre bilen arzugül semetning peqet héyt-bayramlardila öyige qaytalaydighanliqi, bashqa waqitlarda künige az dégende 10 sa'ettin ishleydighanliqini ashkarilidi. Mir'adil hesenning bayantida uchturpanliq qizning éyigha 1400-1500 yüen'ge ishleydighanliqi, eger ishidin bir kün ruxset sorap qalsa, künige 40-50 yüendin pul tutulidighanliqi, zawutning yataq bilen teminleydighanliqi, emma tamaq bilen kari bolmaydighanliqini bayan qilghan idi. Mezkur kent saqchisi arzugül we xanzöhrening belgilik miqdarda ma'ash alidighanliqini bilidighanliqi, emma qanche pul alidighanliqidin xewersizlikini, bu ishlarni bek sorap-sürüshte qilishqa bolmaydighanliqini eskertti. Mir'adil bayantida uchturpanliq qizning zawutqa ekitilishtin burun néme üchün tutulghanliqi heqqide uchur bérilmigen idi. Mezkur kent saqchisining ashkarilishiche, xanzöhre seyid'exmet téléfonidin atalmish "Chataq" chiqqanliqi, arzugül semet bolsa, qol téléfonini bashqilar "Xata" halda ishlitip qalghanliqi üchün lagérgha ekétilip, uningdin kéyin xu'afu toqumichiliq zawutida mejburi emgekke sélin'ghan.

Mir'adil mezkur bayanatida uchturpanliq qiz alghan 1500 yüen ma'ash bilen aqsuda yashashning mumkin emesliki, chünki aqsuda mal bahasining yuqiri ikenliki, nöwette pütün Uyghur rayonining xitaylar üchünla yashashqa mumkin jaygha aylan'ghanliqi, Uyghurlar üchün öz ana makanida yashashning mumkinchiliki qalmighanliqi ilgiri sürülgen.

Mir'adil hesenning bayantida özi uchratqan qizning isim-familisi tilgha élinmighan. Shunga mezkur kent saqchisining bayanliridin mir'adil tilgha qalghan qizning éniq kimliki delillenmigen bolsimu, u pash qilghan ré'alliqning chinliqi we qilchimu köptürülmigenliki delillendi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.