Kériyege ewetken shexsiy yardem buyumlirini hökümetke tizimgha aldurush telep qilin'ghan

Muxbirimiz erkin
2014.02.17
xoten-yer-tewresh-ayllar.jpeg 7.3 Bal yer tewreshte apetke uchrighan ahaliler. 2014-Yil 12-féwral, kériye.
Social Media

Kériyede 12‏-féwral yüz bergen 7.3 Bal yer tewresh apitidin kéyin Uyghur aptonom rayoni miqyasida shexsi we jama'etlerning teshkillinip, apetke uchrighan ahalilerge yardem bérish qizghinliqi qozghalghan idi.

Biraq apet rayonidiki yerlik ahalilerdin igilishimizche, da'iriler shexsiy yardemge yol qoyghan bolsimu, biraq yardem buyumlirini ahalilerge yetküzüshtin burun hökümetke tizimgha aldurushni telep qilghan. Halbuki, hökümet apetke uchrighan ahalilerge yardem qilishqa wede bergen bolsimu, biraq ahalilerning öy-makani, uchrighan ziyanlirining ornini toldurup, turmushini yolgha séliwélishigha konkrét qandaq yardem qilidighanliqi mejhul.

Xotenning kériye nahiyiside 12‏- féwral yüz bergen 7.3 Bal yer tewresh apitige bügün yeni 17‏-féwral neq 5 kün boldi. Bu qétimqi yer tewresh apitide bolupmu kériyening atchan yézisigha qarashliq kentler eng éghir buzghunchiliqqa uchrighan. Ularning ichide eng éghir buzghunchiliqqa uchrighan kentlerning biri pishker kenti.

Yer tewreshtin kéyinki qutquzush xizmiti Uyghur jem'iyiti köngül bölidighan asasliq mesilige aylan'ghan. Ürümchi, qeshqer, ghulja, börtala, xoten qatarliq sheherlerde jama'et we shexsler özlükidin teshkillinip, apet rayonigha yardem bérish herikiti qozghighan. Bu Uyghur jem'iyitide ijabiy ijtima'iy hawa yaratqan idi.

Kériyediki yer tewresh apitige uchrighan ahalilerning nöwettiki ehwali, qutquzush xizmiti we ammiwi yardem buyumlirining apetke uchrighuchilargha yétip barghan-barmighanliqi qatarliq mesililerni éniqlash üchün biz apet yüz bergen rayondiki bezi yerlik kadirlarni we apetke uchrighuchi ammini ziyaret qilduq.

Yer tewresh rayonidiki bir xadimning bildürüshiche, hökümet shexsiy we jama'et namidiki yardem buyumlirining tarqitilishigha yol qoyghan bolsimu, biraq yerlik qizil krést jem'iyiti yaki alaqidar organlargha tizimgha aldurushni belgiligen.

Xitay terepning bergen xewerliride qeyt qilishiche, bu qétimqi yer tewresh keltürüp chiqarghan iqtisadi ziyan az dégende 271 milyon yüen'ge yétidu. 3281 Éghiz öy örülgen, buzghunchiliqqa uchrighan bashqa mal-mülüklerning sani 30322, az dégende 2160 tuyaq mal-charwa ölgen. Bu ötken jüme kün'ge qeder éniqlap chiqilghan hökümet terep statistika bolup, bu san aldimizdiki künlerde dawamliq köpiyishi mumkin.

Lékin, nöwettiki eng halqiliq mesile hökümetning apetke uchrighuchi ammining öy-makanlirini tekrar qurup chiqishigha, uchrighan ziyanning ornini toldurup, turmushini retke séliwélishigha konkrét qandaq yardem qilish mesilisi bolup qaldi. Halbuki, nöwette hökümet emeldarlirining apetke uchrighuchilargha bergen quruq wedisidin bashqa, konkrét qandaq yardem pilani barliqidin héchqandaq shepe yoq. Yer tewresh rayonidiki yuqiriqi xadim özining buninggha alaqidar héchqandaq bir pilan körüp baqmighanliqini bildürdi.

Xitay qizil krést jem'iyiti qatarliq hökümetke qarashliq resmiy xeyr-saxawet organlirining burun yer tewresh, kelkün, qurghaqchiliq we bashqa her xil apetlerde xelq toplighan i'ane pulgha xiyanet qilish yaki yerlik da'irilerning xelq i'ane qilghan pul we qutquzush buyumlirini basturup qoyup, apetke uchrighuchi ammigha tarqitip bermeydighan ehwallar köp qétip yüz bergen. Netijide bu xelqning xitay resmiy xeyr saxawet organlirigha yaki yerlik da'irilirige ishenmeslik ehwalini keltürüp chiqarghan idi.

Shu seweblik kériyede yüz bergen bu qétimqi yer tewresh apitide oxshashla xelq yardem buyumlirini shexsen özi yetküzüp bérish yaki ishenchlik shexs, jama'etlerge hawale qilish yolini tutqan. Börtalada yardem buyumi toplawatqan bir xeyr saxawetchi, toplan'ghan yardem buyumlirini ürümchidiki kishilerge hawale qilip, shular yetküzüp bériwatqanliqini bildürdi.

Biz jama'et we shexsler ewetken yardem buyumlirining apet rayonigha yétip bérish ehwalini igilesh üchün kériyening yiraq taghliq rayoni-shunggila yézisigha téléfon qilduq. Bu yil 70 nechche yashliq péshqedem boway roza aka, özining hazirgha qeder bir xalta un we bir yotqan tapshurup alghanliqini bildürdi.

Xitay terepning ötken jüme küni élan qilghan sanliq melumatida körsitishiche, bu qétimqi yer tewresh xoten wilayitining 6 nahiyisige tesir qilghan. Az dégende 58 ming adem tesirge uchrighan we az dégende 19 ming adem bixeter jaygha köchüshke mejbur bolghan. Da'iriler ilgiri apetning tesirige uchrighanlarni 7800, dep élan qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.