Qaraqash ot öchürüsh etriti: ikki meydan ot kétish weqesi yüz berdi, biri chong bazarda

Muxbirimiz shöhret hoshur
2018.01.16
qaraqash-yepiq-terbiyelesh-ot-apiti.jpg Qaraqash nahiyesidiki bir terbiyelesh merkizide yüz bergen ot apitidin körünüsh. 2018-Yili 15-yanwar.
Social Media

15-Yanwar küni ijtima'iy taratqularda xotende bir orun'gha ot ketkenliki heqqide körünüshlük uchur tarqaldi, uchurdiki gheyriy resmiy chüshendürüshte weqening qaraqash nahiyesidiki bir terbiyelesh merkizide yüz bergenliki tilgha élin'ghan. Muxbirimiz shöhret hoshurning bu heqte ehwal éniqlishi dawamida, qaraqash nahiyelik ot öchürüsh etritining xadimi qaraqashta düshenbe küni ikki meydan ot apiti yüz bergenliki, birining abduraxman memtimin isimlik bir ahalining öyi ikenliki, yene birining bolsa qaraqash chong bazarda yüz bergenlikini bayan qildi. Mezkur xadim her ikki weqede adem ölüsh bolmighanliqini ilgiri sürse, yene bezi xadimlar, néme üchündur bu ot kétish weqesining yüz bergenlikini yoshurdi yaki jawab bérishtin özini qachurdi.

Ijtima'iy taratqularda qaraqash nahiyeside ot apiti yüz bergenliki heqqide uchur tarqalghandin kéyin, yéziliq saqchixanilargha téléfon qilduq. Saqchixana xadimliri omumyüzlük halda herqandaq bir ot apitidin xewersizlikini éytti. Qaraqash nahiyelik orman saqchixanisining xadimimu, ot apitidin pütünley xewersizlikini éytti. Biz arqidin qaraqash nahiyelik ot öchürüsh etritige téléfon qilduq. Téléfonimizni qobul qilghan xadim tünügün yeni düshenbe küni ikki meydan ot apiti yüz bergenlikini ashkarilidi. Uning bayan qilishiche, düshenbe küni kech sa'et 9:30 etrapida qaraqash “Dabaza” gha ot ketkenliki heqqide uchur kelgen. Ot öchürüsh etriti apet meydanigha kétiwatqan chéghida, yeni yérim yolgha kelgende otning tizginlen'genliki, ot öchürüsh etritining kélishige hajet yoqluqi uqturulghan. Yene bu xadimning bayan qilishiche, azraq mezgildin kéyin bir meydan ot apitidin uchur kelgen.

Emma muxbirimiz gülchéhrege uchur bergen bir muhajir Uyghurning, yeni qaraqash weziyitidin xewerdar bir kishining bayan qilishiche, mezkur ot weqesi qaraqash nahiye bazirining shimaliy qismidiki qatnash békitining yénidiki terbiyelesh merkizige özgertilgen östengboyi meschitide yüz bergen. Qaraqash nahiyelik ot öchürüsh etritining mu'awin bashliqi raxman isma'il, ot apitining bir terbiyelesh merkizide yüz bergenlikini inkar qildi. U düshenbe küni qaraqashta ikki meydanda ot ketkenliki bildürüp, ikki meydandin birining bir ahalining öyi ikenlikini éytti, emma néme üchündur yene bir orunning namini dep bérelmidi.

Ot öchürüsh etriti xadimining bayan qilishiche, ikkinchi meydan ot ketken orun, qaraqash bazar ikkinchi kent birinchi guruppa ezasi abduraxman memtiminning öyi bolup, ikkinchi meydan'gha 12 ot öchürüsh xadimi ikki mashina bilen barghan we otni öchürgen, emma ikki qewetlik oyning matériyalliri yaghach bolghachqa, öy pütünley köyüp tügigen؛ yene uning eskertishiche her ikki meydan ot kétishte adem ölüsh we yarilinish yüz bermigen. Biz torda tarqalghan ot apiti heqqidiki uchurni we adem ölgenliki heqqide taratqularda uchur barliqini eskertkinimizde, mezkur xadim, 1-meydan'gha shu teweliktiki saqchi xadimlirining barghanliqi we shular teripidin öchürülgenlikini, tepsiliy ehwaldin j x tarmaqlirining xewerdar ikenlikini éytti. U yene chong bazardiki ehwalning tepsilatini uqushimiz üchün ot öchürüsh etritining rehberliri bilen alaqilishishimizni tewsiye qildi.

Yuqiriqi uchurlardin qaraqashta düshenbe küni az dégende ikki orunda ot apiti yüz bergenliki, buning biri ahalining öyi ikenliki éniq؛ emma yene birining bolsa, terbiyelesh merkizi yaki chong bazar ikenliki, yaki mezkur terbiyelesh merkizining chong bazargha tewe yaki yéqin jay ikenliki hazirche melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.