Norwégiyediki Uyghurlar putbol komandisi tereqqiy qilmaqta

Norwégiyediki Uyghurlar putbol komandisi.

Uyghurlar norwégiyege köchmen bolup kelgili 20 yildin ashti. Norwégiyege kelgen Uyghurlar asasliq Uyghur diyaridin kelgenler bolup, norwégiyede texminen 2000 gha yéqin Uyghur yashaydu.

Norwégiyege yerleshken Uyghurlar arisida yashlar köp salmaqni teshkil qilidighan bolup, norwégiye Uyghur komitétining biwasite teshkillishi we mutellip ependining bashchiliqida 2007-yili “Uyghur putbol komandisi ”resmiy qurulghan.

Bu putbol komandisi qurulghandin buyan izchil tereqqiy qilip, norwégiyening besh shehiride tarmaq komandilarni qurghan.

Uyghur yashlar dem élish künliridin paydilinip komandilar öz-ara uchriship, dostluq musabiqe oynash arqiliq yashlar öz-ara tonushidighan, dostluq, qérindashliq berpa qilip Uyghur dawa sépini küchlendürüshke türtkilik rol oynimaqta.

Norwégiyediki Uyghur putbol komandisi norwégiye ichide hemde norwégiyediki bashqa ishtin sirtqi komandilar ara dostluq musabiqisi oynapla qalmay, belki shiwétsiye, bélgiye, gollandiyediki Uyghur komandilar bilen yilda bir qétim dostluq musabiqisi oynashni dawamlashturup kelmekte.

Qoshna dölettiki Uyghur komandilar bilen peqetla musabiqidiki netijini nishan qilish emes, belki Uyghur yashliri öz-ara tonushush, dostluq ornitish, eng muhimi Uyghur dawa sépini küchlendürüshke asas sélish meqsitide top oynap, putbol wasitisi bilen hemkarliq we ittipaqliqini kücheytmekte.

Norwégiye Uyghur komandisi 2011-yili gollandiyede, 2013-yili türkiyening qeysiri shehiride ötküzülgen “Rabiye xanim longqisi”ni talishish putbol musabiqiside yaxshi netijilerge érishken.

Norwégiye Uyghur komitétining re'isi nighmet türsun ependi ziyaritimizni qobul qilip, Uyghur putbol komandisining qurulush meqsiti, nishan-ghayiliri heqqide toxtilip ötti.

Norwégiye Uyghur putbol komandisining mes'uli mutellip ependi komandining qolgha keltürgen netijiliri heqqide toxtaldi.

Asasliq musabiqilerde komanda bashliqi wezipisini éliwatqan komanda ezasi muzepper ziyaritimiz jeryanida, putbol arqiliq qérindashliq, dostluqni, ittipaqliqini ilgiri sürgili bolidighanliqini hemde putbol musabiqiliri dawamida Uyghur tilini qollinip, uni untup qalmasliqqa paydisi barliqini eskertti.

Norwégiyediki Uyghur komitétining teshkillishi arqisida norwégiyediki Uyghur jama'iti her qétimliq musabiqilerde putbol komandisigha izchil türde maddiy we meniwi jehettin yardemde bolup kelmekte.