"Islam dunyasidiki 4 yétim diyar" témisidiki yighinda "Jaza lagérliri"mesilisi otturigha qoyuldi

Ixtiyariy muxbirimiz erkin tarim
2018-10-23
Élxet
Pikir
Share
Print
"Islam dunyasidiki 4 yétim diyar" témisidiki yighin zalidin körünüsh. 2018-Yili öktebir, türkiye.
"Islam dunyasidiki 4 yétim diyar" témisidiki yighin zalidin körünüsh. 2018-Yili öktebir, türkiye.
RFA/Erkin Tarim

Türkiyening qara déngiz rayonidiki samsun wilayitining bafra rayonida "Islam dunyasidiki 4 yétim diyar" mawzuluq doklat bérish yighini chaqirilghan bolup, pelestin, qirim tatarliri we rohin'ga musulmanlirining mesilisi bilen birlikte Uyghur élidiki "Jaza lagéri" mesilisimu otturigha qoyulghan.

Bafra rayonluq hökümetning medeniyet merkizide ötküzülgen pa'aliyetke rayondiki her qaysi idare- jem'iyet mes'ulliri, ammiwi teshkilat mes'ulliri, her qaysi partiyelerning mes'ulliri we her qaysi mekteplerning oqutquchi we oqughuchiliridin bolup köp sanda kishi ishtirak qildi.

Bafradiki insaniy yardem wexpi teripidin uyushturulghan yighinning échilish sözini weqip re'isi ilyas altuntash ependi sözligen. Yighinda tarixchi yazghuchi exmet anapatli ependi pelestin mesilisi toghrisida, hüseyin mutlu ependi bolsa qirim mesilisi toghrisida toxtalghan. Sherqiy türkistan weqpining sabiq re'isi xamit köktürk ependi bolsa Uyghurlarning hazirqi heddidin tashqiri éghir weziyiti toghrisida melumat bergen. Xamit köktürk ependi bu heqte melumat berdi.

Qimmetlik radi'o anglighuchilar türkiyede islam dunyasining mesililiri toghrisida yighinlar chaqirilsa pelestin, rohin'ga musulmanlirining mesilisige orun bérilip Uyghur mesilisige orun bérilmeytti. Bu qétim samsun bafrada ötküzülgen "Islam dunyasidiki 4 yétim diyar" mawzuluq pa'aliyette pelestin, rohin'ga mesililiri qatarida Uyghur mesilisigimu orun bérilgen. Xamit köktürk tunji qétim islam dunyasining mesililirining qatarida Uyghur mesilisigimu orun bérilgenlikini ilgiri sürdi.

Türkiyediki Uyghurlar we bezi türkler, türk xelqining shundaqla türk hökümitining pelestin mesilisige bunchiwala köngül bölüp Uyghur mesilisige köngül bölmeslikidin bi'aram bolmaqta. Undaqta türklerning pelestin mesilisige köp köngül bölüshidiki seweb néme? enqerediki istratégiyelik chüshenchiler instituti mutexessisi doktor erkin ekrem ependi pelestinning burun osmanli impériyesining zémini ikenlikini, hetta türkiyediki solchi idiyediki kishilerning bu mesilige köngül bölidighanliqini bayan qildi.

Doktor erkin ekrem ependi türk xelqining Uyghur mesilisige pelestin mesilisige köngül bölgendek köngül bölmeslikining sewebliri heqqide toxtaldi.

Samsun wilayitining bafra rayonida pa'aliyet élip bériwatqan insaniy yardem teshkilati 2015-yili qurulghan bolup, hazirghiche Uyghur mesilisi toghrisida 3 qétim pa'aliyet uyushturghan, tunji qétim islam dunyasining mesililiri toghrisida pa'aliyet ötküzgen. Teshkilat re'isi ilyas altuntash ependi öz meqsiti heqqide toxtilip mundaq dédi: "Sherqiy türkistan xelqi méning qérindishim, sherqiy türkistan méning ana yurtum. U yerdiki zulumni bilimiz. Biz mesilini türkiyening kün tertipige élip kélish meqsiti bilen achtuq. Pelestin biz üchün qanchilik muhim bolsa sherqiy türkistanmu shunchilik muhim".

Toluq bet