Америка дөләт мәҗлиси әзалири дисней ширкитидин “мулән” филиминиң сүрәткә елинишиға мунасивәтлик соалларни сориған
2020.09.13
Җүмә күни америка дөләт мәҗлисиниң һәр иккила партийәсидин болған 19 нәпәр дөләт мәҗлиси әзаси дисней ширкитиниң баш иҗраийә мудириға имзалиқ Мәктуп Йоллап, “мулән” филиминиң сүрәткә елинишиға мунасивәтлик бәзи соалларни сориған.
Дисней ширкитиниң баш иҗраийә мудири боб чапекқа йолланған мәзкур мәктупта дисней ширкитидин “мулән” филимини сүрәткә елиш җәрянида уйғур аптоном райондики җ х вә тәшвиқат саһәси билән немә үчүн һәмкарлашқанлиқидин ибарәт 10 түрлүк соал соралған.
МәктупТа мундақ дейилгән: “диснейниң у йәрдә садир болған җинайәтләрдә яки у җинайәтләрни йошурушта мәсулийити әң еғир болған хитай хәлқ җумһурийитиниң хадимлири билән очуқ ашкара һәмкарлишиши адәмниң көңлини толиму паракәндә қилиду.”
Улар мәктубида дисней ширкитиниң америка сода министирлиқи 2019-йили өктәбир қара тизимликкә алған турпан шәһәрлик сақчи идарисигә рәһмәт ейтқанлиқини тилға алған болса, тәшвиқат бөлүминиң “хитай коммунист партийәсиниң бир қанити икәнлики, униң уйғурларға қаритилған мәҗбурий әмгәк, омумийүзлүк мәҗбурий туғмас қилиш, мәҗбурий бала чүшүрүш вә туғут чәкләш һәрикәтлирини өз ичигә алған инсанийәткә қарши җинайәтләрни рәт қилиш, бурмилаш яки йошуруш” қилмишлирида болғанлиқини алаһидә әскәрткән.
Мәктупта йәнә “мулән” филими сүрәткә елиништин бурун уйғурларниң кәң көләмлик һалда йиғивелиш лагерлириға соланғлиқиға аит учурларниң ашкариланғанлиқни, 2018-йили июлғичә америка, австралийә, әнглийә вә хоңкоңдики нопузлуқ хәвәр агентлиқлириниң милйондин артуқ уйғур вә башқа етник топлуқларниң лагерлириға ташланғанлиқини хәвәр қилғанлиқини, “мулән” филимини йәрлик җ х тармақлири билән һәмкарлишип уйғур аптоном районида сүрәткә елишниң “нурғун кишиләр ирқий қирғинчилиқ дәп сүртләватқан бу җинайәтләрни садир қилғучиларни қанунлуқ қилип көрситиш һилиси билән тәмин етидиғанлиқи” ни оттуриға қойған.
Мәктупқа, кеңәш палата әзаси марко рубийо, роберт мәнәдәз, том коттон, авам палатаси әзалиридин җәймс мкговерн, кирстофер симит, том малиновски қатарлиқ 19 нәпәр дөләт мәҗлиси әзаси имза қойған.
Диснейниң “мулән” филими сүрәткә елинған турпан вилайити тәвәсидә 8 орунда җаза лагери барлиқи ашкариланған иди.